شىمكەنتتە جاڭا الاڭدا ناۋرىز مەرەكەسى تويلانۋدا - فوتو
مىڭداعان شىمكەنتتىكتەر بۇگىن جاڭا اكىمشىلىك ورتالىعىنىڭ الاڭىنا جينالدى. مەرەكە مۇنداي اۋقىمدى دەڭگەيدە العاش رەت وتۋدە.
«وتە ادەمى، ءارى ءۇيىمنىڭ ءدال جانىندا. مەرەكەنى سەزىنۋ ءۇشىن كەرەمەت مۇمكىندىك، كونسەرت تاماشالايسىڭ، ادامداردىڭ بال- بۇل جانعان جۇزەرىن كورىپ قۋاناسىڭ. ناۋرىز قۇتتى بولسىن، باق- بەرەكە تىلەيمىن!» ، - دەدى قالا تۇرعىنى ءسانيا اقبەرگەنوۆا.
الاڭ كادىمگى ساحناعا اينالدى. كورەرمەندەرگە وتىراتىن ورىن جەتىسپەي جاتتى. سالتاناتتى جيىن سۇگىر اتىنداعى قازاق ۇلت اسپاپتار وركەسترىنىڭ مۋزىكالىق تۋىندىسىمەن اشىلدى. سوسىن جۇرتشىلىققا «قىس پەن كوكتەم ارپالىسى» اتتى حورەوگرافيالىق ءنومىر ۇسىنىلدى.
حالىقتار دوستىعى ءبيىن دە حالىق ەرەكشە قوشەمەتپەن قابىلدادى. ەلدە تۇراتىن ءار ەتنوس وكىلدەرى ساحناعا شىعىپ، مىڭ بۇرالعان بيشىلەر ەتنوستاردىڭ تاتۋ- ءتاتتى ءومىرىن بەينەلەۋگە تىرىستى. «ماعان باعدارلاما وتە قاتتى ۇنادى، دەدى شىمكەنتتىك تۇرعىن ءاسيا اناروۆا. - قىزدار مەن جىگىتتەر گۇلدەي جايناپ ءجۇر، كەرەمەت بيشىلەر، اۋا رايى دا ەرەكشە قۇلپىرىپ تۇر. ناۋرىز تاماشا وتۋدە. بارلىقتارىڭىزعا ءاز ناۋرىز جاقسىلىق اكەلسىن!» .
الاڭدا ارنايى 20 كيىز ءۇي تىگىلدى. ءارقايسىسى ناۋرىز كوجە، قازاقتىڭ ءتۇرلى ۇلتتىق تاعامدارىمەن تولتىرىلعان. كەي كيىز ۇيلەردە ۇلتتىق تاعامدارمەن قوسا، قوناقتارعا ۇلتتىق اندەر شىرقالىپ، سالت- داستۇرلەر كورسەتىلىپ، ءتىپتى كەيبىرى ەجەلگى قازاق تۇرمىسىن پاش ەتۋدە.
«وتە قىزىقتى. بالالار، اسىرەسە وزگە ۇلت وكىلدەرى حالىقتىڭ كوپتەگەن داستۇرلەرىن بىلە بەرمەيدى. بۇل جەردە بەتاشار، بەسىككە سالۋ، تۇساۋ كەسەر راسىمدەرى كورسەتىلۋدە» ، - دەپ اسەرىمەن ءبولىستى ولگا كونوۆالوۆا. 
