ءانشى نۇرلان ابدۋلليندى رەسەيدىڭ شوۋ- بيزنەسى شاقىرىپ وتىر - فوتو

بۇل تۋرالى ءانشىنىڭ «ءومىرىمنىڭ 7 ءساتى» اتتى مەرەيتويلىق كونسەرتى قارساڭىندا وتكەن باسپا ءسوز ءماسليحاتىندا ءانشى، كومپوزيتور يسلام راحىمجانوۆ مالىمدەدى.

«مەن، نۇرلاننىڭ سوڭعى «بارلىعى باسقاشا» دەپ اتالاتىن البومىن بەلگىلى رەسەيلىك پروديۋسەرلەرگە كورسەتتىم. ولار قاتتى قىزىقتى. ەسىمدەرى تانىلا قويماعان پروديۋسەرلەردەن دە ۇسىنىستار ءتۇستى. ءبىراق، ءالى كەلىسىم- شارتقا قول قويىلعان جوق. سوندىقتان، ولاردىڭ كىم ەكەنىن ايتۋ ازىرگە ورىنسىز»، - دەدى ي. راحىمجانوۆ.

نۇرلان ابدۋللين قازىرگىدەي مادەنيەتتەر ارالاسىپ جاتقان شاقتا وتاندىق ەسترادا جۇلدىزدارىنىڭ دا الەمدىك ساحنالارعا شىعىپ، وزدەرىنىڭ باسەكەگە قابىلەتتى ەكەندىگىن تانىتاتىن ۋاقىت جەتكەنىن ايتتى.

«مەن «مۇحيدا شايبان» البومىن لوندوندا اتى الەمگە بەلگىلى «Abbey Road» ستۋدياسىندا جازدىم. سوندا اعىلشىندار ءبىزدىڭ ۇلتتىق مۋزىكا اسپاپتارىمىزدىڭ ءۇنىن ەستىپ، قاتتى قىزىقتى. ول جاقتان دا ۇسىنىستار ءتۇسىپ جاتىر. بۇل دا - ابىروي»، - دەدى ن. ابدۋللين.

نۇرلان ابدۋلليننىڭ «بارلىعى باسقاشا» دەپ اتالاتىن سوڭعى البومىنداعى اندەردىڭ ءسوزى مەن مۋزىكاسىن يسلام راحىمجانوۆ جازعان.

ال، نۇرلان ابدۋلليننىڭ «ءومىرىمنىڭ 7 ءساتى» اتتى مەرەيتويلىق شوۋ- كونسەرتى الداعى 27 - ناۋرىزدا الماتىداعى «رەسپۋبليكا سارايىندا» وتەدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى