ايتىستى باعالاۋدىڭ جاڭا جۇيەسى پايدا بولدى
ايتىستىڭ دەڭگەيى، وندا ايتىلعان جىر شۋماقتارى ءوز الدىنا بولەك اڭگىمە.
مەنى ءادىل قازىلار القاسىنىڭ اقىنداردىڭ ونەرىن باعالاۋ ءتاسىلى تاڭ قالدىردى.
جاڭاشىلدىق دەۋگە بولار مۇنى. كادىمگى سپورتتا كەڭىنەن قولدانىپ جۇرگەن بالدىق جۇيە. قازىلار قاتار- قاتار وتىرىپ، الدارىنا ءبىر- ءبىر كومپيۋتەر قويىلعان.
ولار اقىنداردىڭ ءار كەزەك، ءار شۋماعىنا كومپيۋتەردىڭ باتىرماسىن باسۋ ارقىلى ۇپاي بەردى. بۇل ۇپايلار سانى كورەرمەن زالىنا قويىلعان ۇلكەن ەكرانداردان كورىنىپ تۇردى.
ال، مۇنىڭ تيىمدىلىگى نەدە دەگەن وي تۋۋى مۇمكىن. ءبىز بۇرىنعى ءداستۇرلى جانە كەيىنگىنى جاڭاشىل باعالاۋدىڭ ارتىقشىلىعى مەن كەمشىلىگىن سالىستىرىپ كورسەك.
ارتىقشىلىعى. بارىمىزگە بەلگىلى، ءداستۇرلى باعالاۋ جۇيەسى بويىنشا ەكى اقىن ايتىسىپ بولعاسىن قازىلار ۇپايدى سوڭىنان بەرەدى. ول كوبىنە 5-10 باللدان قۇرالدى. قاراپ وتىرساق، كەيدە مۇنىڭ اتتەگەن- ايلارى دا بولىپ جاتادى. ءسوز سايىسىنىڭ باسىندا ارىنداپ وتىرعان اقىن كەيدە سوڭىنا قاراي اياڭداپ قالادى.
نەمەسە كەي اقىننىڭ ءسوزى مىقتى بولسا دا، قارسىلاسىنىڭ تاساسىندا قالىپ قوياتىنى بار. ءتىپتى، ەكەۋى بىرىنەن ءبىرى اسىپ ءتۇسىپ جاتادى. مۇنداي ساتتە العاشىندا ايتىلعان ماعىنالى ءسوزى، ۇتىمدى ويى، تاپ بەرمەدەگى تاپقىرلىعى سوڭىندا ەلەنبەي قالىپ جاتادى.
ال، ءسوزىنىڭ سالماعى بولماسا دا، كەرەمەت ايتىس جاساماسا دا، سوڭىندا اندەتىپ، تەرمەلەتىپ، ەكپىندەتىپ جىر ايتىپ، حالىقتى تارتىپ، جوعارى ۇپاي الاتىن دا جاعداي بولادى. جاڭاشىل باعالاۋدىڭ ارتىقشىلىعى وسى سەكىلدى اتتەگەن-ايلاردىڭ الدىن الا ما دەپ ويلايمىز. سەبەبى باللدىق جۇيەدە اقىننىڭ سالەمدەسۋىنەن باستاپ، ءاربىر كەزەك، ونداعى ءاربىر شۋماعىنا، قارسىلاسىنا جاساعان شابۋىلى، شابۋىلعا بەرگەن قارىمتاسى، تاقىرىپتى اشا ءبىلۋى، كورەرمەندى تارتۋى، قىسقاسى بارلىعىنا قازىلار القاسى جەكە- جەكە 1 دەن، 7 گە دەيىنگى قالاعان ۇپايىن بەرىپ وتىرادى. سوڭىندا قورىتىندى ۇپايى شىعارىلادى.
كەمشىلىگى. باعالاۋدىڭ جاڭاشىل ءتاسىلى بولعاسىن مۇندا زامانۋي تەحنيكا قولدانىلادى. ءار قازىنىڭ الدىنا نوۋتبۋك، زالعا ەكران قويۋ كەرەك. ولاردى ۇيلەستىرەتىن مامان كەرەك. ءسوز تانيتىن، قازىلىق جاساي الاتىن ۇلكەن كىسىلەردىڭ كوبى كومپيۋتەردەن حابارسىز ەكەنىن ەسكەرسەك، ولار قاتەلەسىپ، ءبىرىنىڭ ۇپايىن ەكىنشىسىنە بەرىپ قويۋى مۇمكىن.
ايتسە دە، جاڭاشىل باعالاۋ - زامان تالابى دەۋگە بولادى. قازىر ەلدىڭ ءبارىنىڭ كومپيۋتەردى يگەرىپ جاتقانىن ويلاساق، بولاشاق بۇل كەمشىلىكتىڭ تۇزەلەرى ءسوزسىز.
بەكارىس نۇريمان، ماگيستر
