قىتايدىڭ اسكەري قىزمەتشىلەرى تانك بياتلونىنان تاجىريبە الۋ ءۇشىن قازاقستانعا كەلەدى
كەزدەسۋ بارىسىندا ەكى ەلدىڭ اسكەريلەرى «تانك بياتلونى-2015» حالىقارالىق چەمپيوناتىنا دايارلىق اياسىندا تانك ەكيپاجدارىن بىرلەسىپ جاتتىقتىرۋدى تالقىلادى، دەپ حابارلايدى BNews.kz.
ق ر قورعانىس مينيسترلىگى باسپا ءسوز قىزمەتىنىڭ مالىمەتىنشە، بيىلعى جىلى قازاقستان اۋماعىندا ق ح ر قارۋلى كۇشتەرىنىڭ 4 تانك ەكيپاجى ارنايى دايارلىقتان وتسە، ماۋسىم ايىندا قازاقستاندىق اسكەرلەر قىتاي اۋماعىندا دايىندىقتان وتەدى.
ەكى ەلدىڭ وكىلدەرى تانك ەكيپاجدارىن دايارلاۋ ماسەلەسىندە ءبىرجاقتى شەشىمگە كەلدى. اتاپ ايتقاندا، وسى جاتتىعۋلار شەڭبەرىندە قىتاي حالىق رەسپۋبليكاسىنىڭ قارۋلى كۇشتەرىنە دايىندىق ادىسىمەن تانىسۋعا مۇمكىندىك تۋىپ وتىر.
قازاقستان جانە قىتاي ەكيپاجدارىنىڭ قاتىسۋىمەن وتەتىن وسىعان ۇقساس جاتتىعۋلار ءۇندىستاندا دا وتەدى. بۇل ورايدا مامىر ايىندا قازاقستانعا ءۇندىستاننىڭ اسكەري وكىلدەرى كەلەدى دەپ جوسپارلانۋدا.
العاش رەت تانك بياتلونى بويىنشا حالىقارالىق جارىس 2013-جىلى ماسكەۋ ماڭىنداعى الابينو پوليگونىندا وتكەنىن اتاپ وتكەن ءجون. جارىسقا رەسەي، ارمەنيا، بەلارۋس جانە قازاقستاننىڭ تانك ەكيپاجدارى قاتىستى. قازاقتاننىڭ اسكەري قىزمەتشىلەرىنەن قۇرالعان كوماندا وسى سايىستا ەكىنشى ورىنعا يە بولدى، 2014-جىلى دا ءبىزدىڭ ەكيپاج ەكىنشى ورىن الدى. قازاقستان جاۋىنگەرلەرىنىڭ تانك بياتلونى سالاسىندا جەتكەن جوعارعى جەتىستىكتەرى مەن جۇلدەلەرى ق ح ر مەن ءۇندىستاننىڭ اسكەري قىزمەتشىلەرىن ق ر قارۋلى كۇشتەرىنەن تاجىريبە الۋداعى ىنتاسىن ارتتىرىپ وتىر.
