شاڭحايدا ەل نامىسىن قورعايتىن جالعىز قازاقستاندىق سپورتشى

سپورت تاريحىنا كوز جۇگىرتسەك، مانەرلەپ سىرعاناۋشىلار اراسىنداعى الەم چەمپيوناتى 1896-جىلدان بەرى قاراي ۇيىمداستارىلىپ كەلەدى. وسى ۋاقىتقا دەيىن بۇل تۋرنير ەۋروپا مەن سولتۇستىك امەريكا قۇرلىعىندا كوپ ءوتتى. ال، ازيا ايماعىنان تەك جاپونيا عانا قابىلداعان بولاتىن. ەندى بۇل باسەكەنى وتكىزۋ مارتەبەسى قىتايعا بۇيىرىپ وتىر.

23-29- ناۋرىز اراسىندا قىتايدىڭ شاڭحاي قالاسىنداعى «شىعىس» سپورت كەشەنى مانەرلەپ سىرعاناۋدان الەم چەمپيوناتىن قابىلدايدى.

الەم چەمپيوناتىندا ەرلەر مەن ايەلدەردىڭ سايىسى، جۇپتىق باسەكە جانە سپورتتىق بيدەن جۇلدەلەر ساراپقا سالىنادى.

اۋەلدە بۇل بىرىنشىلىكتە قازاقستاننىڭ نامىسىن قوس ورەنىمىز -  دەنيس تەن مەن ابزال راقىمعاليەۆ قورعايدى دەگەن مالىمەت شىققان بولاتىن. ءبىراق، بۇگىن مانەرلەپ سىرعاناۋدان قازاقستان قۇراماسىنىڭ باس باپكەرى قۇرالاي ۇزۇروۆا شاڭحايدا ەل نامىسىن تەك دەنيس تەن قورعايتىنىن مالىمدەدى.

- مانەرلەپ سىرعاناۋدان الەم چەمپيوناتىندا قازاقستاننىڭ نامىسىن تەك دەنيس تەن عانا قورعايدى. سونىمەن قاتار شاڭحايعا دەنيستىڭ باس باپكەرى فرەنك كەررولل مەن حالىقارالىق دارەجەدەگى تورەشى يۋري گۋسكوۆ بارادى. وتكەن جىلى جاپونيانىڭ سايتاما قالاسىندا وتكەن الەم بىرىنشىلىگىنە دەنيس قاتىسپاي، قازاقستان ءبىرشاما رەيتينگتىك ۇپايدان ايىرىلدى. سوندىقتان دا بۇل بىرىنشىلىككە ءبىز تەك ءبىر عانا سپورتشى قاتىستىرۋعا قۇقىلىمىز. وسى ماسەلەگە بايلانىستى ابزال راقىمعاليەۆ قىتايدا ونەر كورسەتە المايدى، - دەيدى قۇرالاي ۇزۇروۆا وتاندىق پورتالداردىڭ بىرىنە بەرگەن سۇحباتىندا.

حوش، ەندى ءبىز الەم بىرىنشىلىگىندە وتانداستارىمىزدان تەك تەننىڭ عانا ونەرىن تاماشالايتىن بولامىز. دەنيس وسال سپورتشى ەمەس. تەننىڭ ءبىر ءوزى قازاقستان قۇراماسىنىڭ قورجىنىنا جۇلدە سالۋى ابدەن ىقتيمال. ونىڭ ۇستىنە وتانداسىمىز الەم بىرىنشىلىگىنە تالاي مارتە قاتىسىپ، 2013-جىلى كانادانىڭ لوندون قالاسىندا وتكەن الەم بىرىنشىلىگىندە كۇمىس جۇلدە ەنشىلەگەن ەدى.

ەكى جىل بۇرىن جەرلەسىمىز تەك كانادالىق پاتريك چانعا ەسە جىبەرىپ قويعان بولاتىن. ءبىراق، بۇل جولى پاتريك الەم بىرىنشىلىگىنە قاتىسپايدى ەكەن. ەسەسىنە، شاڭحايدا سوچيدە وتكەن وليمپيادا ويىندارىنىڭ جەڭىمپازى يۋدزۋرۋ حانيۋ قاتىسۋعا نيەت ءبىلدىرىپتى. ودان بولەك، يسپاندىق حاۆەر ەرناندەس پەن تاعى ءبىر جاپون جىگىتى داۋسۋكە تاكاحاسي، رەسەيدىڭ ەكى بىردەي ورەنى ماكسيم كوۆتۋن مەن سەرگەي ۆورونوۆ بار. ءبىراق، نەگىزگى تارتىس دەنيس تەن مەن يۋدزۋرۋ حانيۋ اراسىندا جۇرەتىن شىعار. دەسەك تە، ءالىپتىڭ ارتىن باعايىق.

اۆتور: ۋاليحان قوسانباي

«الاش ايناسى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى