الماتى مەن استانا اۋەجايلارى بيلەت باعاسىنا قاتىستى مالىمدەمە جاسادى
«سوڭعى كەزدەرى اقپارات قۇرالدارىندا اۋەجايلاردان قىمبات وتىندى ساتىپ الۋعا بايلانىستى اۋە كومپانيالارى بيلەتتەرىنىڭ باعاسىن تۇسىرە الماي وتىر دەگەن اقپارات پايدا بولا باستادى. مۇنداي اقپارات شىندىققا جاناسپايدى جانە قازاقستان اۋەجايلارىنىڭ بەدەلىنە كەرى اسەر ەتەتىندىكتەن «الماتى حالىقارالىق اۋەجايى» ا ق مەن «استانا حالىقارالىق اۋەجايى» ا ق بۇل ماسەلەگە قاتىستى جايتتاردى ناقىتالۋى ءتيىس دەپ شەشتى.
بۇگىنگى تاڭدا قازاقستاننىڭ ءوز ىشىندەگى تۇراقتى اۋەتاسىمالدارىنىڭ 95 پايىزىن «ەير استانا»، SCAT، Bek Air اۋە كومپانيالارى ورىندايدى. بۇل كومپانيالار قازاقستاننىڭ بارلىق اۋەجايىندا ءوز وتىندارىن ساقتاپ، ۇشۋعا پايدالانادى»، - دەلىنگەن الماتى مەن استانا اۋەجايلارىنىڭ حابارلاماسىندا.
سونىمەن قاتار، اۋە ايلاعىنداعىلار اۋەجايلاردىڭ اۋە كومپانيالارىنىڭ ءوز قالاۋلارى بويىنشا وزدەرىنىڭ تىكەلەي جەتكىزۋشىلەرىنەن ساتىپ العان وتىندارىن ساقتاۋعا ءتيىستى كولەم عانا ءبولىپ بەرەتىنىن مالىمدەدى. «مۇنداي جاعدايدا اۋەجايلاردىڭ اۋە وتىنى رەسۋرسىن قولدانۋشىلار مەن اۋە كومپانيالارى اراسىندا دەلدال بولا المايتىنى كورىنىپ تۇر، ءتىپتى اۋە كومپانيالارى ءۇشىن اۋە وتىنىنىڭ سوڭعى باعاسىن قالىپتاستىرۋعا ىقپال ەتە المايمىز. سوندىقتان، قازاقستاننىڭ نەگىزگى اۋەجايلارى وتىننىڭ باعاسىن كوتەرىپ، اۆيا بيلەتتەردىڭ قىمباتتاۋىنا اكەپ سوقتىردى دەپ مالىمدەۋ قارابايىر جالعان اقپارات بولىپ ەسەپتەلەدى»، - دەلىنگەن حابارلامادا.
سونىمەن قاتار، اۋەجايداعىلار قازاقستاندىق جولاۋشىلاردىڭ اۋە كەروسينىنىڭ كۇرت ارزانداۋىنا بايلانىستى اۆيابيلەت باعاسىن تومەندەتۋدى تالاپ ەتۋگە قۇقىعى بار ەكەنىن مالىمدەدى، الايدا بۇل جونىندە تىكەلەي اۋە كومپانيالارعا نەمەسە قۇزىرلى ورگاندارعا بارۋ قاجەت. «ايتا كەتەيىك، جانار-جاعارماي ماتەريالدارىن تاسىمالداۋشىلاردى تاڭداۋدا، اۆيابيلەتتەردىڭ باعاسىن بەكىتۋ مەن شامالاۋدا اۋە كومپانيالاردىڭ قۇزىرەتى اۋەجايلاردىڭ قاتىسۋىنسىز ىسكە اسىرىلادى»، - دەلىنگەن حابارلامادا.
