سينگاپۋردە كوك ءتۇتىن سالدارىنان كوز جۇماتىن تۇرعىندار قاتارى كۇرت وسكەن
ويتكەنى سوڭعى كەزدە كوك ءتۇتىننىڭ كەسىرىنەن ەلدە ءتۇرلى دەرت پەن ەرتە ءولىم بەلەڭ العان.
ءارى بۇل جات قىلىققا اۋەس بولعان جاستاردىڭ سانى كوبەيگەن.
ەندى ەلدىڭ دەنساۋلىق ساقتاۋ سالاسىنىڭ بەلدى ماماندارى دابىل قاعىپ، تەمەكى ونىمدەرىنە قارسى كۇرەستىڭ ءتۇرلى جولدارىن قاراستىرىپ جاتىر.
دەنساۋلىق ساقتاۋ سالاسى ماماندارىنىڭ ايتۋىنشا، سوڭعى كەزدە كوك ءتۇتىندى بۋداقتاتۋعا اۋەستەنەتىندەردىڭ قاتارىندا جاستار جاعى كوبەيگەن. ولاردىڭ باسىم كوپشىلىگى 15-17 جاس ارالىعىن قامتيدى.
ستاتيستيكالىق مالىمەتتەرگە سۇيەنسەك، بىلتىر تەمەكى شەگەتىندەردىڭ 6 مىڭ 200 ى 18 جاستان تومەن بولسا، 2013 - جىلمەن سالىستىرعاندا بۇل كورسەتكىش %17 عا وسكەن.
مۇنى جەرگىلىكتى تۇرعىندار ادام بويىنا جاعىمسىز ادەتتىڭ ءسىڭىپ قالۋى دەسە، ال ءبىرى جارنامانىڭ ىقپالى زور ەكەندىگىن العا تارتادى.
پارلامەنت وتىرىسىندا دا بۇل تۇيتكىلدى ماسەلەگە جارنامانىڭ اسەرى مول دەگەن توقتام جاسالدى. ياعني تەمەكى ساتاتىن دۇكەندەردىڭ جارناماسى. ويتكەنى دۇكەننىڭ كاسسا جانىندا مەنمۇندالاپ تۇراتىن تەمەكى سۇرانىستىڭ ارتۋىنا الىپ كەلەدى.
ەندى مۇنداي كاسسا ماڭىنداعى تەمەكى سالعىش ديسپلەيلەرگە تىيىم سالىنىپ، تەمەكى قورابىنداعى ءتۇرلى جارنامالىق بەلگىلەر جويىلماق. كەرىسىنشە، ءونىمنىڭ زياندىلىعىن ناسيحاتتايتىن مەديتسيتسينالىق ەسكەرتۋلەرگە ەرەكشە ءمان بەرىلەدى.
ەل ۇكىمەتى مۇنداي جاڭا تالاپتى قولعا الماس بۇرىن، دۇكەندەگى ساتۋشىلارعا 12 اي كولەمىندەگى جەڭىلدىق قاراستىرۋدى ءجون كورۋدە. ويتكەنى بولشەك ساۋدامەن اينالىساتىن ساتۋشى وسى ۋاقىت ىشىندە جاڭا ءتارتىپتى ورىنداۋعا دارمەندى بولادى.
ناتيجەسىندە تۇتىنۋشى تاراپىنان تۇسەتىن سۇرانىس الدەقايدا ازايىپ، تەمەكىنىڭ سالدارىنان تۋاتىن قاتەرلى ىسىك، جۇرەك، ينسۋلت باسقا دا اۋرۋلارعا توسقاۋىل قويىلادى دەگەندى تىلگە تيەك ەتەدى ماماندار.
www.24.kz
