قازاقستاننىڭ موڭعولياداعى ەلشىسى جەرگىلىكتى ب ا ق وكىلدەرىن الداعى پرەزيدەنتتىك سايلاۋ تۋرالى جان-جاقتى حاباردار ەتتى
2015-جىلعى 25- اقپانداعى ق ر پرەزيدەنتى نۇرسۇلتان نازاربايەۆتىڭ جارلىعىنا سايكەس، قازاقستاندا اعىمداعى جىلى 26- ساۋىردە كەزەكتەن تىس پرەزيدەنتتىك سايلاۋ وتەدى. قاتىسۋشىلار الدىندا سويلەگەن سوزىندە ق. قوبلاندين كەزەكتەن تىس پرەزيدەنتتىك سايلاۋدىڭ وتكىزىلۋ سەبەپتەرىنە توقتالىپ، اتالعان شەشىمنىڭ الەمدىك قارجى- ەكونوميكالىق داعدارىستىڭ الدىن الۋ جانە حالىقارالىق قاۋىپسىزدىك سالاسىنداعى جاعدايدى ەسكەرە وتىرىپ، العا قويىلعان ماقسات-مىندەتتەردىڭ جۇزەگە اسىرىلۋىن قامتاماسىز ەتۋ بولىپ تابىلاتىندىعىن اتاپ ءوتتى، دەپ حابارلايدى ق ر- نىڭ موڭعولياداعى ەلشىلىگىنىڭ باسپا ءسوز قىزمەتىنەن.
ناقتىراق ايتقاندا، «قازاقستان-2050» ستراتەگياسى، «نۇرلى جول» جاڭا ەكونوميكالىق باعدارلاماسى جانە الەمنىڭ 30 دامىعان ەلدەرى قاتارىنا كىرۋ سىندى بەلسەندى جۇمىستار اتقارۋدى قاجەت ەتەتىن باسىمدىقتار تۋرالى ايتىلدى. وعان قوسا، 2016-جىلى قاتارىنان ەكى سايلاۋدىڭ ءدوپ كەلۋىنە بايلانىستى جانە كونستيتۋتسيا نورمالارىن بۇلجىتپاي ورىنداۋ ماقساتىندا اتالعان سايلاۋ ناۋقاندارىن ەكى بولەك ۋاقىتتا وتكىزۋ قولايلى دەپ تابىلعانى ايتىلدى.
ساياسي شارانىڭ ۇيىمداستىرىلۋ اسپەكتىلەرىنە توقتالا وتىرىپ، ديپلوماتيالىق وكىلدىك باسشىسى سايلاۋ ءۇردىسىن جوعارى دەموكراتيالىق ستاندارتتارعا ساي وتكىزۋ ءۇشىن قازاقستاندىق تاراپتىڭ بارلىق جاعدايلاردى جاسايتىندىعىن ءمالىم ەتتى.
ەلشى سايلاۋ وتكىزىلەتىن كۇنى موڭعوليا ەلىنە ۋاقىتشا كەلگەن قازاقستاندىق ازاماتتاردىڭ داۋىس بەرۋ مۇمكىندىگى بولۋى ءۇشىن موڭعولياداعى قازاقستان ەلشىلىگىنىڭ عيماراتىندا سايلاۋ ۋچاسكەسى جۇمىس اتقاراتىندىعىن جەتكىزدى.
ءسوزىن تۇيىندەي كەلە، قالىبەك قوبلاندين قازاقستان مەن موڭعوليا اراسىنداعى جان-جاقتى بايلانىستار بولاشاقتا جالعاسا بەرەتىندىگىنە سەنىم ءبىلدىردى.
