استانادا «ارمىسىڭ، ءاز ناۋرىز» مەرەكەلىك كونسەرتى ءوتتى
دۋماندى مەرەكە ق. قۋانىشبايەۆ اتىنداعى قازاق مۋزىكالىق دراما تەاترىنىڭ الدىندا بولدى. «ارمىسىڭ، ءاز ناۋرىز!» كونسەرتى - بيىلعى ناۋرىز مەيرامىن تويلاۋدىڭ باستاۋى. شارانى ۇيىمداستىرۋشى - استانا قالاسىنىڭ تىلدەردى دامىتۋ باسقارماسى.
كونسەرتتىڭ ءبىرىنشى ءبولىمى تەاتر الدىنداعى الاڭدا ءوتتى، كيىز ۇيلەر تىگىلىپ، قوناقتار داستارحاننان ءدام تاتتى. كيىز ءۇي ماڭىندا بوزبالالار مەن بويجەتكەندەر التىباقان تەۋىپ، ويىن-ساۋىق قۇردى. قوناقتار ۇلتتىق سپورت تۇرلەرىندە كۇش سىناستى. حالىق اسپاپتارىندا ورىنداۋشىلاردىڭ مۋزىكالىق ۇجىمدارى قوناقتاردىڭ كوڭىلىن كوتەرىپ، ماڭايدى ءان مەن كۇيگە بولەدى.
مەرەكەلىك شارانىڭ ەكىنشى بولىمىندە ق. قۋانىشبايەۆ اتىنداعى قازاق مۋزىكالىق دراما تەاترىنىڭ ساحناسىندا ءداستۇرلى حالىق مۋزىكاسىن ورىنداۋشىلار، قازاقستاندىق ەسترادا جۇلدىزدارى مەن تەاتر ارتىستەرى ونەر كورسەتتى.
ۇيىمداستىرۋشىلاردىڭ ايتۋىنشا، شارانىڭ نەگىزگى ماقساتى - انا ءتىلىن دارىپتەۋ، حالقىمىزدىڭ ەرەكشە مادەنيەتىن، سالت-ءداستۇرى مەن ادەت-عۇرپىن تانىستىرۋ.
