الماتىدا «تاڭجارىق وقۋلارى» ۇيىمداستىرىلادى

تاڭجارىق - قازاق جازبا پوەزياسىنىڭ كوركەمدىك دەڭگەيىن كوتەرىپ قانا قويماي، ايتىس ونەرىنىڭ دە تاريحي بەتتەرىن اشقان ادۋىندى ايتىسكەر. ابايدان باستاپ زامانداسى بولعان الاش ارىستارىنىڭ شىعارماشىلىعىن جەتە تانىپ مەڭگەرگەن. الاش يدەياسىن قىتايداعى قازاقتارعا ءتۇرلى جولدارمەن ناسيحاتتاعان. قۇلجادا العاش رەت قازاق تەاترىن اشىپ بەيىمبەتتىڭ «شۇعا» پەساسىن ساحنالاپ، باستى ءرولدى سومداعان. 1935-جىلى قىتاي قازاقتارىنىڭ تۇڭعىش باسپا ءسوزى - «ىلە وزەنىن» شىعارۋدى ۇيىمداستىرعان ءارى باس رەداكتورى بولعان. كوپتەگەن مەكتەپتەردىڭ اشىلۋىنا ىقپال ەتكەن. كوپ ولەڭى اباقتىدا جازىلعان. تۇرمە ادەبيەتىن قالىپتاستىرىپ، سول كەزدەگى قوعامدىق شىندىقتى ولەڭ، تولعاۋ، اندەرى ارقىلى بۇكپەسىز پاش ەتكەن.

اقىننىڭ كوپتەگەن ولەڭ، ارناۋ، تولعاۋلارى، قيسا-داستاندارى مەن ايگىلى ايتىستارى بار. شىعارمالارىندا XX عاسىردىڭ العاشقى جارتىسىنداعى قىتايداعى قازاقتاردىڭ تاريحي تاعدىرى، الماعايىپ ساياسي احۋال، كۇردەلى الەۋمەتتىك ماسەلەلەر اينا-قاتەسىز اشىپ كورسەتىلەدى.

اقىننىڭ 112 جىلدىعىنا وراي 17-18-ناۋرىزدا الماتىدا قالالىق «تاڭجارىق وقۋلارى» وتەدى. وعان قالاداعى 8 وقۋ ورنىنان 40 تان استام ستۋدەنت، ماگيسترانت قاتىسپاق. يگى شارانى قازاق مەملەكەتتىك قىزدار ۋنيۆەرسيتەتى ۇيىمداستىرىپ وتىر.

باستى ماقساتى: الاش ۇراندى ادەبيەتتىڭ بەلدى وكىلى، ۇلت قايراتكەرى، اقىن-اعارتۋشى تاڭجارىق جولدى ۇلىنىڭ ولەڭدەرىن، ونەگەلى ءومىرىن دارىپتەۋ، جاس ۇرپاقتى قازاق ادەبيەتى مەن تاريحىنىڭ اقتاڭداقتارىن اشۋعا، زەردەلەۋگە شابىتتاندىرۋ. قاتىسۋشىلار تاڭجارىق ولەڭدەرىن جاتقا وقىپ، اقىن ءومىرى مەن شىعارماشىلىعى تۋرالى سۇراقتارعا جاۋاپ بەرىپ، تەاترلاندىرىلعان قويىلىمدار جاسايدى. وعان تاڭجارىق تانۋشى عالىمدار، زەرتتەۋشىلەر، بەلگىلى ايتىسكەر اقىندار، تانىمال انشىلەر قاتىسپاق. ءىس-شارا اياسىندا تاڭجارىق جولدى ۇلىنىڭ ايتىستارىنان ءۇزىندى ورىندالىپ، اندەرى شىرقالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى