دۇنيەجۇزىلىك دەنساۋلىق ساقتاۋ ۇيىمى قىزىلشاعا قارسى جاپپاي ەكپە سالۋعا ۇندەۋدە
قىزىلشا ميقۇرت پەن ەنتسەفاليت تۇرىندە اسقىنىپ، تىنىس الۋ مۇشەلەرى مەن ورتالىق جۇيكە جۇيەسىنىڭ بۇزىلۋىنا اكەلىپ سوعادى.
وسى قاتەرلى ىندەتكە شالدىعىپ، اجال قۇشىپ جاتقاندار دا بار. ۇيىمنىڭ مالىمەتى بويىنشا، قىزىلشامەن اۋىرعانداردىڭ كوبى قىرعىز ەلىندە ەكەن. مۇندا 7,5 مىڭ ادام وسى دەرتكە دۋشار بولسا، بوسنيا جانە گەرتسەگوۆينادا 5 مىڭنان اسادى.
قىزىلشا قازىر اۆستريا تۇرعىندارىنا دا قاۋىپ ءتوندىرىپ تۇر. دۇنيەجۇزىلىك دەنساۋلىق ۇيىمىنىڭ دابىل قاعۋى دا بەكەر ەمەس. بىلتىر الەم بويىنشا 22 مىڭ ادام قىزىلشاعا شالدىققان. ال اۆستريادا وسىنداي دياگنوزبەن 50 گە جۋىق تۇرعىن اۋرۋحاناعا تۇسكەن.
قاتەرلى ىندەتتىڭ تارالۋىنا بايلانىستى دۇنيەجۇزىلىك دەنساۋلىق ۇيىمىنىڭ جاپپاي ەكپە جاساۋ جوسپارىنا ءقاۋىپ ءتونىپ تۇر. الدىن الۋ شاراسىنىڭ ارقاسىندا بيىل قىزىلشامەن اۋىرۋ دەڭگەيى 2000 - جىلمەن سالىستىرعاندا 20 ەسە تومەندەدى. ەندى ماماندار 2020 - جىلى ونى تۇبىرىمەن جويۋعا بەلسەنە كىرىسپەك.
حەرۆيگ كولاريتش، دارىگەر- ەپيدەميولوگ، ۆەنا مەديتسينالىق ۋنيۆەرسيتەتىنىڭ پروفەسسورى: - اۆستريادا قىزىلشاعا قارسى ەكپەنى جاساتۋ مىندەتى جوق، تەك ۇسىنىس قانا بار. 12 ايعا دەيىن ەكتىرىپ، 2 ايدان سوڭ قايتالاۋ قاجەت. بۇل - قىزىلشا، قىزامىق پەن پاروتيتكە قارسى بىرىكتىرىلگەن ەكپە. ءبىز ونى كوپ جىلدان بەرى قولدانىپ كەلەمىز. ءومىر بويى سەنىمدى قورعانىس بولادى. ەش زيانى جوق. بالالار ونى جەڭىل قابىلدايدى.
اۆستريادا 2013 - جىلى 74 ادام قىزىلشاعا شالدىقسا، بىلتىر سىرقاتتار سانى 114 كە جەتتى. ستاتيستيكا بويىنشا، ءاربىر بەسىنشى ناۋقاستىڭ دەرتى اسقىنىپ كەتەدى. وندايلاردىڭ كوبى - بالالار.
حەرۆيگ كولاريتش، دارىگەر- ەپيدەميولوگ، ۆەنا مەديتسينالىق ۋنيۆەرسيتەتىنىڭ پروفەسسورى: - قىزىلشا - قاۋىپتى اۋرۋ. اۋىرعان 1000 بالانىڭ بىرەۋى ميقۇرتقا شالدىعىپ، 2 مىڭنىڭ بىرەۋى قايتىس بولادى. 2007 - جىلى بىزدە وسىنداي 400 دەن استام دەرەك تىركەلدى. ول كەزدە تۇتاس ءبىر مەكتەپتىڭ وقۋشىلارى اۋىرعان ەدى. سەبەبى بالالار قىزىلشاعا قارسى ەگىلمەگەن، اتا- انالارى ەكپە جاساۋدان باس تارتقان ەكەن.
اۋا جانە تامشىلار ارقىلى بەرىلەتىن ءقاۋىپتى ينفەكتسيانى اۋىزدىقتاۋعا يتاليا، گەرمانيا، بوسنيا جانە گەرتسەگوۆينا، رەسەي، گرۋزيا، قىرعىزستان مەن ءبىزدىڭ ەل دە تىرىسىپ باعۋدا. دارىگەرلەر ەڭ ءتيىمدى ءتاسىل ەكپە جاساتۋ ەكەنىن ايتادى.
www.24.kz
