استانادا سۋمو بالۋاندارى ونەر كورسەتەدى
ق ر مادەنيەت جانە سپورت مينيسترلىگىنىڭ، استانا قالاسى اكىمدىگىنىڭ جانە «قازاقستان بارىسى» فەدەراتسياسىنىڭ قولداۋىمەن جاپونيانىڭ قازاقستان رەسپۋبليكاسىنداعى ەلشىلىگى ۇيىمداستىراتىن شارانىڭ نەگىزگى ماقساتى - جاپونيانىڭ ەڭ تانىمال ءداستۇرلى سپورت ءتۇرىن قازاقستاندا ناسيحاتتاۋ بولىپ تابىلادى.
اتالمىش شارا قالا تۇرعىندارى مەن قوناقتارىنا سۋمو بالۋاندارىنىڭ شىنايى جەكپە-جەگىن ءوز كوزدەرىمەن كورىپ، جاۋىنگەرلىك رۋحتى سەزىنىپ، بۇل سپورت تۇرىمەن جاقىنىراق تانىسۋلارىنا مۇمكىندىك بەرەدى.
كورسەتىلىمدىك بەلدەسۋلەرگە كۇنشىعىس مەملەكەتىندە سۋمومەن 10 جىل بويى كاسىبي اينالىسقان ايگىلى قازاقستاندىق سۋموشى سۇيەنىش (جاپونيادا كازافۋزان دەگەن ەسىممەن بەلگىلى) قاتىسادى.
كورسەتىلىمدىك بەلدەسۋلەر 17- ناۋرىز كۇنى ساعات 19.00-دە ەلورداداعى «حان شاتىر» ويىن-ساۋىق ورتالىعىندا وتەدى.
ال ونىڭ الدىندا، ياعني 16- ناۋرىز كۇنى «داۋلەت» تەننيس ورتالىعىنىڭ باسپا ءسوز ورتالىعىندا جاپونيانىڭ قازاقستانداعى توتەنشە جانە وكىلەتتى ەلشىسى كاموحارا ماساەسي، ق ر م س م سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ، قازاقستان سۋمو فەدەراتسياسىنىڭ ءتوراعاسى باعلان ىدىرىسوۆ پەن سۋمودان جاسوسپىرىمدەر اراسىنداعى جاپونيا چەمپيوناتتارىنىڭ جەڭىمپازى ميەدا كاتارو باسپا ءسوز ءماسليحاتىن وتكىزەدى، دەپ حابارلايدى ق ر مادەنيەت جانە سپورت مينيسترلىگىنىڭ باسپا ءسوز قىزمەتىنەن.
