ەمشى دەپ جۇرگەنىمىز الاياق بولىپ شىقتى
ساۋدىڭ جولىن اشادى، جاتقاندى تۇرعىزادى، جۇرمەيتىندى جۇرگىزەدى دەيتىن جارناماسى شىعىستىڭ ءار اۋىلىنا تاراپ جاتتى.
ءبىزدىڭ اۋىلداعى دەنساۋلىعىنىڭ اقاۋى بار، ەم قونباي جۇرگەندەردىڭ ءبىرلى- جارىمى وعان بارىپ قايتۋعا تاۋەكەل ەتتى.
ول كەزدە مەكتەپتە وقيمىن. ناعاشىم بەلىنىڭ شويرىلماسى ۇستاپ، كوبىنە توسەكتەن تۇرا الماي، تاياقپەن ءجۇرۋشى ەدى. ەم قونسا دەگەن نيەتپەن ول دا جارمادان سەمەيگە اتتاندى. ەمشىگە دەپ ءبىر قويدى كولىكتىڭ جۇكسالعىشىنا جايعاستىردى.
سول جولى ەمشىگە بارعانىمەن قابىلداۋىنا كەلگەن ادام كوپ بولىپتى. سودان ناعاشىم كەزەگى كەلگەنشە كۇتەدى. ەمشىنىڭ ارنايى قوناقتار ءۇشىن بولمەسى بار ەكەن. سوندا جاتىپ، اپارعان قويىن ەمشىگە الدىن الا بەرىپ تاستايدى.
وكىنىشتىسى سول كەزەگى كەلگەندە ەمشى دەرەۋ قاراپ، ۇشىقتاپ كەيىن قايتارىپتى. كەلەسى سەانس پالەن ۋاقىتتا دەگەن سوڭ، بەرگەن ءدارى ءشوبىن ساتىپ الىپ، اۋىلعا كەلگەن سوڭ قايناتىپ ءىشىپ ءجۇردى. الايدا ودان وڭالىپ كەتكەن ناعاشىم بولمادى.
ەكىنشى بارعانىندا ەمشى سيىر سۇراعان ەكەن. دەنىمنىڭ ساۋلىعى ءۇشىن بارىم ساداعام دەپ ناعاشى جۇرت سالماعى كىر سىندىراتىن وگىزشەنى الىپ باردى. وگىزگە ساي ەم جاسايدى دەگەن ەمشىمىز الگى تۋىسىمىزدىڭ ارقاسىنا قازدىڭ مايىن جاعىن ۇشىقتاعان بولىپ، بەلىن ۋقالاپتى. سودان كەيىن الداراسپانمەن الاستاپ، ون كۇندە تىك ءجۇرىپ كەتەسىڭ دەپ تاعى دا ءدارى ءشوپتى ۇستاتىپ كەرى قايتارىپتى.
اعام ەم قونادى دەپ ءماز بولىپ ورالعانى ەسىمدە. ءبىراق الگى ەمشىگە بارعان جۇرتتىڭ ىشىنەن ساۋىعىپ كەتكەندەرىن كورمەدىك. ناعاشى اعايىم ءشوپتى قايناتىپ ءىشىپ، ارقاسىنا قازدىڭ مايىن سىلاپ جاققانىمەن ەڭكەيگەن كۇيى تاياعىن تاستاعان جوق. ەم ءۇشىن بەرىلگەن قوي مەن وگىزدىڭ داۋاسى قوناتىن كۇن الىس ەمەس دەپ ءوزىن جۇباتىپ ءجۇردى. دوربا تولى ءشوپتى قانشا ىشكەنىمەن قاپشىقتىڭ ءتۇبى كورىنەتىن ەمەس.
ماسەلەنىڭ ءمانىسى كەيىن بەلگىلى بولدى. سەمەيدە مەديتسينالىق ۋنيۆەرسيتەتتە وقيتىن بولەم جازعى كانيكۋلدا اۋىلعا ورالعان. كورشى- قولاڭ، جاقىن- جۇراعاتتان اۋىرعاندارى بىرەۋ بولسا بولە اپكەم ايسۇلۋعا كەلىپ، كەڭەس سۇرايدى. ەكپە سالدىراتىندارى بار.
ايسۇلۋ اۋىلعا كەلىسىمەن كوپ ۇزاماي مىندەتىنە كىرىسىپ كەتتى. ناعاشىمنىڭ اۋىرعانىنان حاباردار بولعانىمەن، نە ىستەپ جۇرگەنىن بىلمەيتىن. ءىشىپ جۇرگەن ءدارىسىن كورىپ، كۇلكىدەن ولەرمەن بولعانى جادىمدا ساقتالىپ ساقتالىپ قالىپتى.
سويتسەك، ناعاشىما ءدارى دەپ بەرگەن ءشوبى ءوزىمىزدىڭ اۋىلدا وسەتىن قاراپايىم زيانسىز شوپتەر ەكەن. ونى قايناتىپ ءىشىپ جۇرگەن اعامنىڭ سونداعى قيالدانعانىن كورسەڭىز... بۇيتكەنىن بىلگەنىمدە سول جەردە ولتىرەتىن ەدىم دەپ كىجىنىپ قويادى.
ەمشىنىڭ قۇپياسى كەيىن بەلگىلى بولدى. اڭقاۋ ەلگە ارامزا مولدا دەمەكشى، ەل اراسىندا وسىلاي ەمدەگەن بولىپ، قالتاسىن قاعىپ، بارىن الىپ جۇرگەن الاياق ەكەن. سول كەزدە سەمەيدىڭ ماڭىنداعى ءبىراق كىسى الگى ەمشىسىماققا الدانىپ، سان سوعىپ قالعان ەكەن.
ونىسىن ەمشى اتتانعان سوڭ بىلگەن. ارادا ءبىراز ۋاقىت وتكەندە تەلەارنادان حالىقتى الداپ، الاياقتىق جولمەن اقشا تاۋىپ جۇرگەن ادام جايلى كورسەتكەن ەدى. سونى كورىپ وتىرعان الگى تۋىسىمىز ونى بىردەن تانىپ، ءوزىن ەمدەگەن ەمشى ەكەنىن ايتتى. سويتسەك، ول تەك سەمەي جاعىندا ەمەس، الماتى وبلىسى اۋماعىندا دا ءبىراز ادامنىڭ اۋزىن اڭقيتىپ كەتىپتى.
بەلى شويرىلعان ناعاشىم كەيىن دارىگەردىڭ كومەگىمەن جازىلىپ كەتتى. كوپكە دەيىن ەمشىگە الدانىپ، اۋزى كۇيگەنىن جاقىندارىمىز اراسىندا ەسكە الىپ، ازىلدەپ ءجۇردى.
مارعابىل اكىمبەك ۇلى،
سەمەي قالاسى
Alashainasy.kz
