ءجۇرسىن ەرمان: شىن مانىندە ۇلتتىق بىرلىك - باستى بايلىق
بۇل تۋرالى بۇگىن «نۇر وتان» پارتياسىنىڭ قولداۋىمەن كوكشەتاۋدا ءوتىپ جاتقان قازاقستان حالقى اسسامبلەياسىنىڭ 20 جىلدىعىن مەرەكەلەۋگە ارنالعان «بىرلىك پەن بەرەكەنىڭ جەرۇيىعى» اتتى حالىقارالىق اقىندار ايتىسىنىڭ اشىلۋ سالتاناتىندا سويلەگەن سوزىندە اقىن، قازاقستان رەسپۋبليكاسىنىڭ ەڭبەك سىڭىرگەن قايراتكەرى ءجۇرسىن ەرمان ايتتى، دەپ حابارلادى «نۇر وتان» پارتياسىنىڭ اقمولا وبلىستىق فيليالىنىڭ باسپا ءسوز قىزمەتى.
«ۇلكەن حالىقارالىق ايتىس، مىنە ارقانىڭ كەربەز سۇلۋ كوكشەتاۋىندا ءوتىپ وتىر. شىن مانىندە ۇلتتىق بىرلىك - باستى بايلىق. بۇگىنگى شارا ەتنوستار باسىن بىرىكتىرگەن اسسامبلەيانىڭ قۇرمەتىنە وتكىزىلىپ وتىر»، - دەپ اتاپ ءوتتى اقىن ءجۇرسىن ەرمان.
«بۇگىن، ەلىمىزدىڭ تۇكپىر- تۇكپىرىنەن اقىندار كەلىپ وتىر. قالىڭ ەل بولعان سوڭ دارىندار تۋماي قويمايدى. بۇل دا قۋانىشقا قۋانىش قوستى»، دەدى ول ءبىر سوزىندە.
سونداي-اق، ول قازىرگىدەي ەكونوميكالىق سىن- تەگەۋرىندەرگە قاراماستان مادەني قۇندىلىقتى كەيىنگە قالدىرماي كوڭىل ءبولۋدىڭ ماڭىزدىلىعىنا توقتالدى.
«قازىرگىدەي قارجىلىق داعدارىس باستالعان كەزدە ايتىستىڭ وتكىزىلۋى - ۇلكەن ءىس. ايتىسقا قولداۋ ءبىلدىرىپ جاتقان «نۇر وتان» پارتياسىنا راحمەت ايتۋىمىز كەرەك. ەلدىڭ رۋحاني ازىعىن ارتتىرۋ ءۇشىن جاساپ جاتىر»، - دەپ ءسوزىن قورىتتى ول.
اۆتور: اسلان وسپانوۆ
