پاۆلودارلىق دارىگەرلەر قۇلاق كەمىستىگىن ەمدەۋدىڭ تىڭ تەحنولوگياسىن مەڭگەردى
سونىڭ ناتيجەسىندە ۇزاق جىلدار بويى قۇلاق كەمىستىگىنەن زارداپ شەگىپ كەلگەن ناۋقاستاردىڭ ەستۋ قابىلەتتەرى جاقساردى. وبلىستىق اۋرۋحانانىڭ لور بولىمشەسىنىڭ مەڭگەرۋشىسى نۇرجان مەيىرحانوۆ جاڭا ءتاسىلدى العاشقىلاردىڭ ءبىرى بولىپ مەڭگەردى. نەمىس پروفەسسورى حەنني حويمان جەتەكشىلىك ەتكەن شەبەرلىك ساعاتىندا قوس دارىگەر ۇزىن سانى 30 ادامعا وپەراتسيا جاساعان. سولاردىڭ ءبىرى - جاستايىنان قۇلاق كەمىستىگىنە شالدىققان گۇلنۇر قالىقوۆا. وپەراتسيا ءساتتى وتكەندىكتەن، ايەلدىڭ قۋانىشىندا شەك جوق.
گۇلنۇر قالىقوۆا، ەمدەلۋشى: - ريزامىن، ءبارى جاقسى ءوتتى. سول قۇلاعىم ەستىمەيتىن. قازىر قالپىنا كەلدى. حيرۋرگيا سالاسىنداعى كوپ جىلعى ەڭبەك ەستۋ قابىلەتىن %80 عا دەيىن قالپىنا كەلتىرۋگە مۇمكىندىك بەرەدى. حەنني حويمان جەتىلدىرگەن وزىق ءتاسىلدىڭ تيىمدىلىگى سول - ناۋقاستار ساناۋلى كۇندە جاعدايلارىنىڭ جاقسارعانىن سەزىنەدى.
تاعى ءبىر جەتىستىك، وپەراتسيا اياسىندا جاسالاتىن ارنايى ەم-شارالار قۇلاقتى قابىنۋدان ساقتايدى. وسىنداي تاسىلمەن زاقىم كەلگەن قۇلاق جارعاعىن دا قالپىنا كەلتىرۋگە بولادى ەكەن. حەنني حويمان، پروفەسسور: - ءبىرىنشى كەزەكتە، دابىل جارعاعىنىڭ قۋىسىن جابامىز. ودان كەيىن قۇلاق قابىنۋىنىڭ الدىن الۋ شارالارىن جاسايمىز. سودان كەيىن عانا ەستۋ قابىلەتىن جاقسارتۋعا كىرىسەمىز. پاۆلودار وبلىسىندا ەستۋ قابىلەتى تومەن 2 مىڭداي ناۋقاس تۇرىپ جاتىر. ولاردىڭ جارتىسىنا جۋىعى حيرۋرگيالىق جولمەن ەمدەۋدى قاجەت ەتەدى. كوپشىلىگىنىڭ جاعدايى تەك وپەراتسيادان كەيىن جاقسارادى ەكەن.
ەندى جەرگىلىكتى وتولورينگولوگتار دا ورتاڭعى قۇلاققا كۇردەلى وپەراتسيا جاسايتىن بولادى. نۇرجان مەيىرحانوۆ، ع. سۇلتانوۆ اتىنداعى وبلىستىق اۋرۋحانانىڭ بولىمشە مەڭگەرۋشىسى:
- ءبىزدىڭ اۋرۋحانا قاجەتتى قۇرىلعىلارمەن تولىق جابدىقتالعان. بىلتىر تيتان پروتەز ساتىپ الدىق. قازىر ناتيجەسى جامان ەمەس. كۇردەلى وپەراتسياعا ارنايى مەديتسينالىق جابدىقتار قاجەت. نەمىس پروفەسسورىنىڭ پىكىرىنشە، وبلىستىق اۋرۋحانادا قاجەتتىنىڭ ءبارى بار. ازىرگە وپەراتسيا تەك ەرەسەك ادامدامدارعا عانا جاسالادى. ال بالالار الماتىداعى ورتالىققا جىبەرىلەدى.
