سىرباز ءانشى ساكەن مايعازيەۆتىڭ سەگىز قىرى
ساكەن ساحنادا قانداي سىپايى بولسا، قاراپايىم ومىردە دە سونداي مادەنيەتتى جىگىت ەكەنىن ونىڭ اينالاسىندا جۇرگەن جاقىن دوستارى ۇنەمى ايتىپ جۇرەدى. بۇگىن «الاش ايناسى» ساكەن مايعازيەۆتىڭ «سىرلاسۋ» باعدارلاماسىنا بەرگەن سۇقباتىنا سۇيەنە وتىرىپ، ونەر يەسىنىڭ جاس جىگىتتەرگە ۇلگى بولاردىق سەگىز قىرىن تىزبەكتەپ كوردى.
ساكەن مايعازيەۆ كەز كەلگەن ورتادا تازا قازاقشا سويلەيدى. ءوزىنىڭ ايتۋىنشا، ديالەكت قولدانباۋعا تىرىسادى.
قوعامدا بولىپ جاتقان جاعدايلارعا كوزقاراسىن اشىق بىلدىرۋدەن قاشپايدى. جاستارعا ءاردايىم دەمەۋ بەرىپ، جاقسى ىستەرىنە قولداۋ ءبىلدىرىپ جۇرەدى.
ساكەن ءوزىنىڭ تۋعان باۋىرىنداي بولعان ارىپتەسى، دوسى مەيرامبەكتى ەرەكشە قۇرمەتتەيدى. ول مەيرامبەكتى قازاقتىڭ باعىنا تۋعان ءانشى دەپ اسپەتتەۋدەن تانبايدى. مەيرامبەكتىڭ الدىندا كىشىرەيۋگە تىرىساتىنىن، كىشىرەيەتىنىن، كىشىرەيە بەرەتىنىن دە جاسىرمايدى. «مەيرامبەكتەي كۇمىس كومەي انشىمەن بىرگە ءان سالىپ جۇرگەندىگىمە ءوزىمدى باقىتتى سەزىنەمىن!» دەيدى ءانشى.
مەن كۇشى ايەلىنە عانا جەتەتىن ازاماتتاردى تۇسىنبەيمىن دەگەندى ايتادى ءانشى. "قازىر كەلىنىڭىزدى وياتامىن، داستارحان جايادى.. ." دەپ جەتى تۇندە ۇيىنە سۇيرەلەيتىن ادامدار بار. مەن ولاي ەتپەيمىن. مەنىڭ دە كەلىنشەگىم اتىپ تۇرا الادى، وعان كەپىلدىك بەرە الامىن. ءبىراق ول ادامدىققا جاتپايدى. شاقىرعان جەرگە بارامىن. قىرىپ- جويىپ جاتقان ەشتەڭەمىز جوق، ۋاقىت تابۋعا تىرىسامىن" دەيدى ول.
جەرگە، ەلگە، رۋعا بولىنەتىندەردى قۇپتامايدى. ءانشىنىڭ ايتۋىنشا، رۋدىڭ ءبارى وزىنشە مىقتى. «ارينە، جەتى اتانى ءبىلۋ كەرەك، ءبىراق بولىنگەندى ءبورى جەيدى. مەن ءوزىنىڭ اۋىلىنان اسىپ شىعا المايتىن، رۋدىڭ دەڭگەيىنەن شىعا المايتىن ادامداردى وتە تاياز دەپ ەسەپتەيمىن» دەيدى ءانشى.
ساكەن نازىكجاندىلاردى ەرەكشە سىيلايتىن ازاماتتاردىڭ ءبىرى. ول ءوزىنىڭ اناسى، جارى، قىزى جايلى قانشا جىلىلىقپەن ايتادى. ءانشىنىڭ رەپەرتۋارىنداعى «اسىل انا» ءانىنىڭ ورنى بولەك.
ساكەن مايعازيەۆتىڭ اقىندىق شەبەرلىگى دە بار. ويتكەنى ساكەننىڭ اكەسى، اتاسى بەلگىلى اقىن، جىراۋ ادامدار بولعان ەكەن. ساكەن ءوزىنىڭ اقىندىعى جايلى كوپشىلىككە جاريالاي بەرمەيدى، دەگەنمەن الەۋمەتتىك جەلىلەردە اقىن دوستارىنىڭ ولەڭدەرىنە ولەڭمەن جاۋاپ بەرىپ وتىراتىنىن بىلەمىز.
ساكەن بايلىققا، دۇنيەگە، اقشاعا قىزىقپايتىن ءانشى. «كىمگە كەرەك جال مەن جايا جەگەنىڭ. باۋىرلارىڭ قىلتاماق بوپ جاتقاندا» دەگەن تاماشا ءبىر ولەڭ جولدارى بار عوي. مەن قىمبات ءزاۋلىم ۇيدە، قوس- قوستان كولىك مىنگەنشە اعايىن- تۋىسقا كومەكتەسكەندى ءجون كورەمىن» دەيدى ءانشى.
اينۇر نۇرابەت
«الاش ايناسى»
