ش. ايمانوۆتىڭ «تاقيالى پەرىشتە» فيلمىندەگى ارۋ نەمەسە پوليگلوت اكتريسا
ول «تاقيالى پەرىشتە» ءفيلمى ارقىلى كۇللى قازاقستانعا، ءتىپتى ت م د ەلدەرىنە تانىمال بولدى دەسەك، قاتەلەسپەگەن بولارمىز.
قازاق جۇرتى ونى تايلاقتىڭ عاشىعى دەپ بىلەدى.
ايشاعا «تاقيالى پەرىشتە» ءفيلمى ارقىلى بۇكىل كورەرمەن تايلاقپەن بىرگە عاشىق بولىپ ەدى. ءالى كۇنگە عاشىق. قازاق كورەرمەنىن استە جالىقتىرمايتىن ءفيلمنىڭ جارىققا شىققانىنا بيىل - 47 جىل.
شولپان اپاي - فيلولوگيا عىلىمدارىنىڭ كانديداتى. كانديداتتىعىن سوناۋ سانكت-پەتەربوردا قورعاعان. الماتى شەت تىلدەر ينستيتۋتىنىڭ ستۋدەنتتەرىنە جيىرما ءۇش جىل بويى فرانسۋز تىلىنەن ساباق بەرگەن. «تاقيالى پەرىشتەگە» دەيىن «ءان قاناتىندا»، «اتامەكەن» فيلمدەرىنە ءتۇستى. «ءان قاناتىندا» ءفيلمى - شولپان التايبايەۆانىڭ تۇساۋىن كەستى. ءلايلا رولىندە شولپان اپاي ويناسا، كينوداعى ونىڭ ارىپتەسى قازاقتىڭ تالانتتى اكتەرى، مارقۇم ءانۋار مولدابەكوۆ بولعان ەدى.
ايشا - ونىڭ فيلمدەگى اتى، ال ومىردەگى ەسىمى - شولپان. شولپان ءجۇسىپ قىزى التايبايەۆا! بەلگىلى جۋرناليست، جازۋشى، سىقاقشى ءجۇسىپ التايبايەۆتىڭ قىزى. ءجۇسىپ التايبايەۆتىڭ «ناق، ناق»، «سىپىرعى، «ۇيات- اي»، «تۇلەك»، «جايناق» جانە «ارزان دومبىرا» سياقتى كوپتەگەن كىتاپتارى بار. ءبىر كەزدەرى سىقاقشى «ارانىڭ» دا تىزگىنىن ۇستاعان بولاتىن. ساتيرالىق شىعارمالارىمەن كوپشىلىككە تانىمال سىقاقشى ءوز قىزىن «تاقيالى پەرىشتە» فيلمىنە قالاي قوستى؟ شەت تىلدەرى ينستيتۋتىنىڭ ستۋدەنتى «قازاقفيلم» كينوستۋدياسىنا قالاي تاپ كەلدى؟ ءبىزدى قىزىقتىرعانى دا وسى.
- شولپان اپاي، اۋەلى اكتريسالىقتى ەمەس، شەت تىلدەر ينستيتۋتىن تاڭداعان ەكەنسىز. فرانسۋز ءتىلى مامانى بولۋىڭىزدىڭ سىرى نەدە؟ الدە، اكتريسا بولعىڭىز كەلمەدى مە؟
- مەكتەپتە وقىپ جۇرگەنىمدە اكتريسا بولۋدى قاتتى ارماندايتىنمىن. وتباسىندا ءتورتىنشى قىز بولدىم. تەلەديدار جوق. ۇيگە گازەت- جۋرنالدار كوپ كەلەتىن. 1953 - جىلى سەمەيدەن اكەمىزدى قازتاگ- تى باسقارۋعا شاقىردى. اكەمىز قازتاگ- تىڭ ديرەكتورى بولىپ ۇزاق جىل قىزمەت اتقاردى. ودان كەيىن «ارا» جۋرنالىنىڭ رەداكتورى بولدى.
بۇل قىزمەتتە ون جىل وتىردى. مەكتەپتە وقىپ جۇرگەن كەزدىڭ وزىندە فرانسۋز تىلىنە جەتىك بولدىم. فرانسۋز ءتىلىنىڭ مامانى بولۋ ماعان قيىندىق تۋدىرعان جوق. قازىر ويلاپ قاراسام، ءوز ماماندىعىمدى دۇرىس تاڭداماعان سەكىلدىمىن. ماعان و باستا سەناري جازۋ ەرەكشە ۇنايتىن. قازىر دە كەيدە قولىم قالت ەتكەندە سەناري جازامىن. وكىنىشتىسى سول، سەناريىمنىڭ كوبى ورىس تىلىندە. ماسكەۋدەگى كينو ينستيتۋتىندا (ۆ گ ي ك- تە) سەناري ءبولىمى بولعانىن بىلگەن جوقپىز. كينوعا مەنى تارتقان قۇدىرەت تە وسى بولسا كەرەك. اكتريسا رەتىندە ەمەس، رەجيسسەر- سەناريست رەتىندە كوبىرەك قىزىقتىم- اۋ دەپ ويلايمىن.
- «ءان قاناتىندا» فيلمىنە قالاي تاپ بولدىڭىز؟
- بالا كەزدە نەنى ارمانداساڭ، وسكەندە سوعان قول جەتكىزۋگە بولادى ەكەن. مەنىڭ دە ارمانىم - كينو، سەناري جازۋ بولدى دەپ ايتتىم عوي. سول ارمانىما مەكتەپ بىتىرەتىن جىلى قول جەتكىزدىم. 9 -سىنىپتا وقىپ جۇرگەنىمىزدە مەكتەپكە كينو تۇسىرۋشىلەر ىزدەپ كەلدى. وقۋشىلاردىڭ اراسىنان تاڭداپ، ءبىزدى «قىرعىزفيلمگە» كاستينگكە شاقىردى. ءبىراق بۇل جولى كينوعا تۇسۋگە مۇمكىندىك بولمادى. 10 -سىنىپتا وقىپ جۇرگەنىمدە، «ءان قاناتىندا» اتتى ءفيلمنىڭ باستى رولىنە، ياعني ءلايلانىڭ رولىنە بەكىتتى. ءفيلمنىڭ رەجيسسەرى - ءازىربايجان مامبەتوۆ. ول كەزدە ك س ر و- نىڭ حالىق ءارتيسى بولاتىن. «ءان قاناتىندا» ءفيلمى شىمكەنتتە ءتۇسىرىلدى. ءۇش ادامنىڭ اراسىنداعى ماحابباتتى بەينەلەيتىن فيلم بولاتىن. ءپروتوتيپى - يسا بايزاقوۆ ەدى. يسانىڭ رولىندە ءانۋار مولدابەكوۆ وينادى.
اتاقتى مايرانى فيلمدە ءسابيرا دەپ الدى. ءسابيرانىڭ رولىنە تورعىن تاسىبەكوۆا ءتۇستى. مۋزىكالىق فيلم بولاتىن. كومپوزيتورى - عازيزا جۇبانوۆا. فيلمدەگى اندەردى ەرمەك سەركەبايەۆ پەن بيبىگۇل تولەگەنوۆا ورىندادى.
مەنىڭ ءرولىم - جارمەڭكەدە الما ساتاتىن ءجاسوسپىرىم قىزدىڭ بەينەسى. «الما الىڭىز» دەپ جارمەڭكەدە تۇرعان قىزدى مۇسا كورىپ، عاشىق بولىپ قالادى. مۇساعا ءلايلا دا عاشىق. مۇسانىڭ سوڭىنان ءبىر ەلى قالعىم كەلمەيدى. ال ونىڭ عاشىعى بار. مۇسا ەكى وتتىڭ ورتاسىندا ءجۇر. «ءان قاناتىندا» فيلمىندە قاجىمۇقاننىڭ ءرولىن ءالىمعازى رايىمبەكوۆ وينادى. سول ءفيلمنىڭ تۇسىرىلىمىندە ءالىمعازى ەكەۋمىزدى شاكەن اعا كورىپ قالادى.
«تاقيالى پەرىشتە» فيلمىندە ەكەۋمىزدى قاتار ءتۇسىرۋ يدەياسى وسىلايشا، دۇنيەگە كەلەدى. ءالىمعازى كەڭ كەۋدەلى، الىپ تۇلعالى ازامات قوي. مەن ونىڭ قاسىندا كىپ- كىشكەنتاي بولىپ تۇرامىن. فيلمدە مۇسانىڭ باي- شونجارلاردىڭ الدىندا داۋ تۋعىزاتىن ەپيزودى بار. سول ەپيزودتا جىلاپ وتىرامىن. سوندا مەنىڭ قاسىما ءالىمعازى كەلىپ، جۇباتادى. ءدال وسى سيۋجەتتى شاكەن اعا ءتۇسىردى. شىمكەنتكە ارنايى كەلىپ، ءازىربايجان اعاعا قولقابىس بەرەدى. فيلم اياقتالدى. شاكەن اعا مەنىڭ اكە- شەشەمدى جاقسى بىلەتىن. ءجۇسىپ التايبايەۆتىڭ قىزى ەكەنىمدى ەستىگەندە، ەرەكشە قامقورلىق تانىتىپ، ۇنەمى جىلى سوزدەرىن ايامايتىن ەدى.
- ءلايلانىڭ رولىنە بەكىتىلگەنىڭىزدى ەستىگەندە اكەڭىز قارسى بولمادى ما؟
- اكە- شەشەم مەنىڭ كينوعا تۇسۋىمە قارسىلىق بىلدىرگەن جوق. مۇنىڭ ءبارىن اۋەلى اتا- اناما ايتپاي ىستەدىم. كينوسىناقتارعا دا ەشكىمگە ايتپاي بارىپ ءجۇردىم. ءلايلانىڭ رولىنە بەكىتىلگەندە شەت تىلدەر ينستيتۋتىنا جاڭادان وقۋعا تۇسكەن كەزىم بولاتىن. ەمتيحاننىڭ ءبارىن بەسكە تاپسىرىپ، وقۋعا دا وڭاي قابىلداندىم. باسىندا نەگىزگى ويىم - ماسكەۋ مەملەكەتتىك ۋنيۆەرسيتەتىنە وقۋعا ءتۇسۋ ەدى. يتاليان ءتىلىن وقىعىم كەلگەن. ويتكەنى فرانسۋز تىلىنە مەكتەپتە وقىپ جۇرگەنىمدە-اق جەتىك بولاتىنمىن.
ءبىراق اكەم ماسكەۋگە بارعانىما قارسى بولدى. رۇقسات بەرمەگەن سوڭ، وكپەلەپ، بىرنەشە كۇن بالكوندا ۇيىقتادىم. اپكەم اعىلشىن تىلىنەن ساباق بەرەتىن. سول كىسى «ءبىر جىلىڭدى بەكەرگە جوعالتپاقپىسىڭ. ەرتەڭ ەمتيحان تاپسىراتىن سوڭعى كۇن. وسى جولى بارماساڭ، كەشىگىپ قالاسىڭ» دەدى. امالسىزدان قۇجاتتارىمدى شەت تىلدەر ينستيتۋتىنا تاپسىرۋىما تۋرا كەلدى. ماسكەۋگە جىبەرمەگەندىكتەن، ۇزاق ۋاقىت كۇيزەلىستە ءجۇردىم. بۇل كۇيزەلىستەن مەنى شىعارعان كينو ەدى. ينستيتۋتتاعى مۇعالىمدەرىم دە فيلمگە تۇسۋىمە قارسى بولمادى. ساباقتان بوساتىپ، كينوعا تۇسۋىمە جاعداي جاسادى.
- «ءان قاناتىندا» ءلايلانىڭ ءرولىن وينادىڭىز. «تاقيالى پەرىشتە» ءسىزدىڭ ومىرىڭىزدەگى ەكىنشى فيلم بە؟
- ءبىرىنشى كۋرستا وقىپ جۇرگەنىمدە «ءان قاناتىندا» فيلمىنە ءتۇستىم دەدىم عوي. ال «تاقيالى پەرىشتە» باستالعاندا، ءۇشىنشى كۋرستا وقىپ جۇرگەن كەزىم ەدى. وعان دەيىن بىرنەشە ەپيزودتارعا تۇسكەنىم بار. ۇلكەن رولدەر بولعان جوق. شاكەن اعا كوپتەگەن كينوفەستيۆالدەرگە اپاردى. گرۋزياعا، ارمەنياعا باردىق. ستۋدەنت بولعانىما قاراماستان، كينوگەرلەردىڭ قاتارىندا تىزىمگە قوسىپ وتىردى. فرانسۋز ءتىلىن ەركىن سويلەيتىنىم شاكەن اعاعا ۇناعان بولۋى كەرەك. شاكەن اعانىڭ جانى تازا، مەيىرىمدى كىسى ەدى. ونەردى ەرەكشە قادىرلەدى. ادالدىق تانىتتى. قازىرگى جاستاردىڭ بويىندا شاكەن اعانىڭ وسى قاسيەتى بايقالمايدى. شىنايى تالانتتاردى، ناعىز دارىنداردى كورە بەرمەيدى. تامىر- تانىستىققا، جولداستىققا كوبىرەك ءمان بەرەدى. ونەردە تامىر- تانىستىق بولماۋى ءتيىس.
- شەت تىلدەر ينستيتۋتىنىڭ ستۋدەنتى بولا تۇرا فيلمگە ءتۇستىڭىز. «تاقيالى پەرىشتە» ءفيلمى ءسىزدىڭ ءومىرىڭىزدى باسقا ارناعا بۇرىپ جىبەرگەن جوق پا؟
- وقۋدى تاستاپ، اكتريسالىققا مۇلدەم بەت بۇرۋ ءبىزدىڭ وتباسىمىز ءۇشىن جات قىلىق ەدى. ولاي جاساعان بولسام، اكەمنىڭ ءۇمىتىن اقتاماعان بولار ەدىم. ويتكەنى اكەم قارقارالى پەداگوگيكالىق كوللەدجىن ءبىتىردى. ودان كەيىن قاز م ۋ- عا وقۋعا ءتۇستى. اكەمىز جۋرناليستيكا فاكۋلتەتىندە وقي المادى. ول حيميا فاكۋلتەتىندە وقىسا دا، جۋرناليستيكادان قول ءۇزىپ كەتكەن جوق. ماسكەۋدەگى جوعارى پارتيا مەكتەبىن ءبىتىردى. بەس بالاسىمەن ماسكەۋگە وقۋعا اتتاندى. ورىسشادان قازاقشاعا وتە ساۋاتتى اۋدارما جاسادى. وسىنداي ولەرمەندىكپەن جوعارى بيىكتەرگە قول جەتكىزگەن اكەمنىڭ تالابىنا قارسى شىعۋ قولىمنان كەلمەس ەدى. قانشا اكتريسالىقتى ءسۇيىپ تۇرسام دا، ءبىرجولا بەت بۇرىپ كەتە المادىم. ويتكەنى فرانسۋز ءتىلىن شەمىشكەشە شاعاتىن ەدىم. سوندىقتان تىلدە وقۋدىڭ دا قاجەتى جوق ەدى. ءبىرىمىز - ستۋدەنت، ءبىرىمىز - شوفەرمىز. سوعان قاراماستان، شاكەن اعا ەكەۋمىزدى ايشا مەن تايلاقتىڭ رولىنە بەكىتتى. شاكەن ايمانوۆ وتە كورەگەن ادام عوي. ءبىزدىڭ بويىمىزداعى ەرەكشە تالانتتى بايقاعان بولار. «تاقيالى پەرىشتە» فيلمىنەن كەيىن ماعان رولگە ءتۇسۋ باقىتى بۇيىرمادى. وقۋدى بىتىرگەننەن كەيىن سەنارلىق كۋرسقا تاپسىرامىن دەگەن وي بولعان. ءومىر ءوز دەگەنىن جاسايدى عوي. «تاقيالى پەرىشتە» فيلمىنەن كەيىن تۇرمىسقا شىقتىم. تۇرمىسقا شىعاتىنىمدى شاكەن اعاعا ايتقانىمدا: «پروپالا اكتريسا. بالا تۋۋ، جايالىق جۋۋ باستالادى. بىلەمىن عوي» دەدى. «جووق، مەن مىندەتتى تۇردە قايتىپ كەلەمىن» دەدىم. «ول كىم؟» دەپ سۇرادى. «كينوستۋديادا ىستەيتىن كينو وپەراتورى» دەدىم. تۇرمىسقا شىقتىم. بالالى بولدىم. شاكەن اعانىڭ ايتقانى ايداي كەلدى. جايالىق جۋۋ باستالدى. ءبىر- ەكى جىلدان كەيىن فرانسۋز تىلىنەن اۋدارماشى بولىپ جۇمىسقا شىقتىم. جۇمىسقا شىققانىما جارتى جىل تولعاندا، ءبىر كۇنى كينوستۋديادان قوڭىراۋ شالادى. بۇعان دەيىن «كينو ءبىتتى. ەڭ باستىسى، بالام بار. جۇمىسىما كوڭىلىم تولادى» دەپ ءوزىمدى جۇباتاتىنمىن. تەلەفوندى كوتەرسەم، شاكەن اعا ەكەن. «شولپان، نە ىستەپ ءجۇرسىڭ؟» دەپ سۇرادى. جۇمىسقا تۇرعانىمدى، جارتى جىل بولعانىن ايتىپ جاتىرمىن. «ودان باسقا دۇرىس جۇمىس تابا المادىڭ با؟» دەپ كۇلەدى.
«گرۋزيادا كينو اپتالىعى وتكەلى وتىر. سوعان باراسىڭ با؟» دەپ سۇرادى. تۇرمىسقا شىققالى كورگەن ەمەسپىن. كينوستۋديا باسشىلىعى وزدەرى جۇمىسىمنان سۇراپ الدى. شاكەن اعامەن تبيليسيدە كەزدەستىك. امەن قايداروۆ، اسانالى ءاشىموۆ، كامال سمايىلوۆ بولدى. ءساندى كيىنىپ العام. ۇلكەن اپكەمنىڭ ماسكەۋدە وقيتىن قۇربىسى بولاتىن. سول قۇربىسى شەتەلدىك ءبىر ستۋدەنتتەن كوستيۋم ساتىپ الىپتى. الگى كيىم مەنىڭ ۇستىمە قونا كەتكەنى. باسىمدا ەرەكشە شلياپا. شاكەن اعا مەنى كورگەندە، «شولپان، قۇلپىرىپ كەتىپسىڭ. دايىندال. گرۋزيادان ورالعان سوڭ، «اباي» ءفيلمىن ءتۇسىرۋدى قولعا الامىز. سول فيلمدە باستى رولدە وينايسىڭ» دەدى. قۋانعانىم سونشا، ومىرىمدە جاڭا ءداۋىر باستالادى دەپ سەندىم. وكىنىشكە قاراي، بۇل ارمانىم ورىندالمادى. شاكەن اعا سول ساپاردان ەلگە ورالمادى. تبيليسيدەن بىردەن ماسكەۋگە اتتانعان ەدى. ماسكەۋدە شاكەن اعانىڭ قازا تاپقانىن بىلەسىڭدەر. وسىلايشا، اكتريسالىق مانسابىما نۇكتە قويىلدى. شاكەن اعادان كەيىن ەشقانداي رەجيسسەر مەنى ىزدەگەن جوق. جالعىز شاكەن اعا عانا مەنىڭ بويىمنان اكتريسالىق قابىلەتتى بايقاعان بولۋى كەرەك.
- «تاقيالى پەرىشتە» - 2 -ءفيلمى تۇسىرىلمەك ەكەن. سول فيلمگە ءسىزدىڭ دە تۇسەتىنىڭىزدى اقپاراتتاردان ەستىگەن ەدىك. جالپى، كورەرمەنگە تانىمال بولعان ءفيلمنىڭ جالعاسىن ءتۇسىرۋ قاجەت دەپ ويلايسىز با؟
- وسى فيلمگە قاتىستى ءبىر جىگىت قوڭىراۋ شالدى. ءبىر قىزىعى، قازىرگى جاستاردى تۇسىنە بەرمەيمىن. ماعان قوڭىراۋ شالعان ۋاقىتتا، انام قايتىس بولىپ، جەرلەۋ راسىمىندە جۇرگەن ەدىك. ول جىگىت تەلەفونمەن حابارلاستى دا، ءفيلمنىڭ تۇسىرىلەيىن دەپ جاتقانىن عانا ايتتى. ءفيلمنىڭ قايدا تۇسىرىلەتىنىنەن دە حابارسىزبىن. تولىق مەكەنجايىن دا ناقتى ايتپادى. ودان كەيىن قايتا حابارلاسپادى. ولار مۇمكىن مەنىڭ حابارلاسۋىمدى كۇتىپ جۇرگەن بولار. ءوزىم ىزدەنىپ، فيلمگە تۇسكىم كەلمەيدى. اكتريسا قاجەت بولسا، وزدەرى حابارلاسار.
- فيلمدەگى اناڭىز بولعان ءامينا ومىرزاقوۆامەن ومىردە ارالاس- قۇرالاس بولدىڭىزدار ما؟
- ءامينا اپامەن كوپ ارالاسقان جوقپىز.
- فيلمدەگى تايلاعىڭىز، ياعني ءالىمعازى رايىمبەكوۆپەن شە؟
- الىمعازىمەن ارالاسىپ تۇرامىن. ول تالدىقورعاندا تۇرادى. ەكى- ءۇش رەت استاناعا شاقىرعاندا، بىرگە بارىپ قايتتىق. الماتى وبلىسى باسشىلىعىنا راقمەت! ءالىمعازىعا جاقسى جاعداي جاساپ وتىر. اقساقالىن ەرەكشە قادىرلەيدى.
P.S.
«تاقيالى پەرىشتەدەگى» ايشانىڭ فيلمنەن كەيىنگى عۇمىر- تاريحى وسىلاي وربىگەن. بۇگىندە شولپان اپاي قۇرمانعازى اتىنداعى ۇلتتىق كونسەرۆاتوريانىڭ ۇستازى. يتاليان تىلىنەن ءدارىس وقيدى. «تاقيالى پەرىشتە» ءفيلمى دەسە، ءامينا ءومىرزاقوۆا ويناعان تانا اپانىڭ وبرازى، تايلاق پەن ايشا ەسكە تۇسەرى انىق. ءبىراق جالپى، كورەرمەن قاۋىم قازاق كينو تاريحىندا وشپەستەي وبراز سومداعان ايشا- شولپاننىڭ بۇگىنگى حالىنەن حاباردار ما؟ ءاي، قايدام؟! حاباردار بولسا، ايشا بەينەسى ارقىلى اڭىزعا اينالعان ونەر تارلانىنىڭ بۇگىنگى حال- احۋالىن بىلەر ەدى- اۋ! شولپان اپايدىڭ كەڭەستەر وداعى كەزىندە جولداسىنا بەرىلگەن كىشكەنتاي پاتەردە عۇمىر كەشىپ جاتقانىن ەشكىم بىلمەيدى.
تاكاپپارلىعى بولار، ءالى كۇنگە پاتەر سۇراپ ءبىر اكىمنىڭ ەسىگىن قاققان ەمەس. وشپەيتىن- ولمەيتىن عۇمىرلىق وبراز سومداسا دا، ءالى كۇنگە دەيىن بىردە- ءبىر اتاعى جوق. ەكىنىڭ بىرىنە بۇيىرعان «قازاقستاننىڭ ەڭبەك سىڭىرگەن قايراتكەرى» اتاعى بۇل كىسىگە نەگە بەرىلمەدى ەكەن؟! راس، شاكەن ايمانوۆ كلاسسيكالىق فيلم ءتۇسىردى. سول كلاسسيكالىق فيلمدە بۇل كىسى باستى ءرولدى سومدادى. قازاق كينوسىنىڭ التىن داۋىرىنە اينالعان فيلم ەستە قالعانىمەن، رولدەردى ويناعان باستى كەيىپكەرلەردىڭ كوپ جاعدايدا ۇمىتىلىپ قالا بەرەتىنى، وكىنىشتى! «فيلمگە ءتۇستىم، ايشانىڭ ءرولىن وينادىم» دەپ ەشكىمنىڭ الدىنا بارعان ەمەس، كەۋدەسىن قاققان دا ەمەس.
P. S. S. شولپان اپايدىڭ پوليگلوت ەكەنىن بىلگەنىمىزدە، تاڭعالدىق. ول كىسى فرانسۋز ءتىلىنىڭ عانا مامانى ەمەس، يتاليان ءتىلىن دە ءوز ەركىمەن مەڭگەرگەن. ورىس تىلىندە ءتىل سىندىرعان شولپان اپاي انا تىلىندە ەركىن مەڭگەرىپ الىپتى. «قازاق ءتىلىن ۇيرەنۋىمە گەرولد بەلگەردىڭ ەڭبەكتەرى اسەر ەتتى» دەيدى.
«گەر- اعاڭ سەكىلدى قازاقتى سۇيگەن ادام جوق. گەر- اعاڭنىڭ ءاربىر ءىسى بىزگە ۇلگى- ونەگە» دەيدى شولپان اپاي. فرانسۋز- يتاليان تىلدەرىن شەبەر مەڭگەرگەن ۇستازدىڭ، ءبىر عانا رولىمەن قازاق كينوسىنىڭ تاريحىنا ەنگەن اكتريسانىڭ وجەتتىگىنە، ولەرمەندىگىنە، قايسارلىعىنا ءتانتى بولدىق. «ۇستازدىق ەتۋدەن جالىقپايتىندىعىنىڭ» دا سىرى وسىندا بولسا كەرەك. شولپان التايبايەۆانىڭ ءدارىسىن ءسۇيىپ تىڭداعان مىڭداعان شاكىرت ەلىمىزدىڭ تۇكپىر- تۇكپىرىندە ەڭبەك ەتىپ ءجۇر. شولپان جۇلدىزى سەكىلدى جارقىراعان اكتريسانىڭ ايشاسىنىڭ بويىنداعى نازىكتىك قانداي، سۇلۋلىق قانداي، قازاق قىزىنا ءتان اقىلدىلىق پەن جىبەك مىنەز قانداي ەدى، شىركىن! كورگەن جاندى تاڭداي قاقتىراتىن سول بەينە ءالى دە جارقىراي بەرسىن دەگىمىز كەلەدى.
گۇلزينا بەكتاس
«ايقىن»
