يزرايل حالقى قارىزعا ءومىر ءسۇرىپ ءجۇر

ارينە، نەسيە الىپ، دەمالىسقا شىعۋدىڭ نەمەسە ساۋدا جاساۋدىڭ ەش ايىبى جوق. تەك شەكتەن شىقپاعان ءجون. الايدا بۇل قاراپايىم قاعيدانى بۇگىندە يزرايلدىكتەردىڭ كوبى ەلەمەيتىن سەكىلدى. سەبەبى ەسەپشوتىنداعى اقشاسى تاۋسىلعان ولار ەش ويلانباي، وۆەردرافتقا، ياعني قارىزعا كىرىپ كەتەدى ەكەن.

يزرايلدىكتەردىڭ مولشەردەن تىس قارجى جۇمساۋى ۇيرەنشىكتى جاعدايعا اينالعان. ولار دۇكەندى كورسە بولدى، ويىنحاناعا بارعىسى كەلەتىن ويىنشىلارداي بارىن بەرگىسى كەلەدى. وسىدان ەسەپسىز قارىزدار دا شىعادى. قازىر يزرايلدىكتەردىڭ بانك الدىنداعى قارىزى 33 ميلليارد دوللارعا جەتتى. مۇنىمەن ولاردىڭ توقتايتىن ءتۇرى جوق. سوندىقتان قازىر يزرايلدىكتەردىڭ 70 پايىزى شىعىندا وتىر.

كەيبىرەۋى وسىنداي جاعدايعا تاپ بولۋىنا بانك قىزمەتكەرلەرىن ايىپتايدى. «وۆەردرافتتىڭ پايدا بولۋىنان تۇتىنۋشىلار ءوز- وزدەرىن ۇستاي الماي، قارىزعا كىرەدى. ال بۇل بانك ءۇشىن ءتيىمدى»، - دەيدى ولار.

بليتس:

- مەن شىعىننىڭ جاقسى ەمەس ەكەنىن بىلەمىن. ءبىراق بارلىعىمىز دا جاقسى ءومىر سۇرگىمىز كەلەدى. تانىستارىمنىڭ بارلىعى وسىلايشا قارىزعا باتىپ وتىر. باسقاشا يزرايلدە تۇرۋ مۇمكىن ەمەس.  پاتەر دە، كولىك تە بارلىعى قىمبات. سەن قانشا جۇمىس ىستەسەڭ دە قارىزعا كىرىپ كەتە بەرەسىڭ. ويتكەنى تاماق ءىشىپ، كيىنگىڭ دە كەلەدى.

شىعىندا جۇرگەندەردىڭ دەنى -  تۇرمىسى ورتاشا ازاماتتار. ولار كارتوچكا ارقىلى قارىزعا كىرۋدىڭ سەبەبىن قىمباتشىلىقتان دەپ وتىر. ال الەۋمەتتىك زەرتتەۋلەر شىعىنعا ۇشىراۋدىڭ باستى سەبەبىن حالىقتىڭ قارجىلاي ساۋاتسىزدىعىنان كورەدى.

يۋري لەگكوۆ، ەكونوميست:

- بىرىنشىدەن، يزرايلدە ءبارى قىمبات. حالىقتىڭ ءومىر سۇرۋىنە جەتپەي جاتىر. ەكىنشىدەن، يزرايلدىكتەردىڭ قارجى ساۋاتتىلىعى تومەن. ولار شىعىندا ءومىر ءسۇرىپ ۇيرەنگەن. بانكتەر ءۇشىن دە بۇل ءتيىمدى. ويتكەنى كارتوچكادا اقشا تاۋسىلعان سوڭ جۇرتتار قايتا قارىزعا كىرە بەرەدى. ال ونىڭ پايىزدىق تولەمى نەسيەدەن قاراعاندا الدەقايدا جوعارى. ەشبىر ەۆروپا ەلىنىڭ ازاماتى ونداي قادامعا بارماس ەدى. ال يزرايلدىكتەر ءۇشىن ول قالىپتى جاعداي.

پسيحولوگتار شاماسىنا قاراماي ساۋدا جاساعىسى كەلەتىندەرگە «نەسيەگە تاۋەلدىلىك» دەگەن دياگنوز قويعان. ونى انىقتاۋ قيىن ەمەس. وندايلار قالاعان تاۋارىن نەسيە كارتاسىندا اقشاسى جەتپەسە دە قارىزعا كىرىپ تۇرىپ، الادى. ال ول قارىزدى جابۋ ءۇشىن باسقا نەسيە الادى. وسىلايشا قارىزداردى ازايتامىن دەپ ودان سايىن كوبەيتىپ، ءبىر شەڭبەردە اينالىپ جۇرە بەرەدى. قازىر ءدال وسىنداي جۇيەمەن يزرايلدىكتەردىڭ 40 پايىزى ءومىر ءسۇرىپ ءجۇر.

www.khabar.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى