استانادا «ارمىسىڭ، ءاز ناۋرىز!» مەرەكەلىك شاراسى وتەدى

مەرەكە قوناقتارىنا ۇلتتىق تاعامدار ۇسىنىلادى، ۇلتتىق سپورت جارىستارى، قازاقستاندىق ەسترادا جۇلدىزدارىنىڭ قاتىسۋىمەن كونسەرت وتكىزىلەدى، دەپ حابارلايدى ەلوردا اكىمدىگىنىڭ باسپا ءسوز قىزمەتىنەن.

شارانى ۇيىمداستىرۋشى - استانا قالاسىنىڭ تىلدەردى دامىتۋ باسقارماسى.

2015 - جىلعى 16 - ناۋرىز كۇنى ساعات 14.00 دە ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى عيماراتىنىڭ الدىندا « ۇلىستىڭ «ارمىسىڭ، ءاز ناۋرىز!» شاراسى وتەدى. كيىز ءۇي، التىباقان قۇرىلىپ، مەرەكە قوناقتارىنا ناۋرىز كوجە، ۇلتتىق تاعامدار ۇسىنىلادى، كوپشىلىككە ارنالعان ۇلتتىق سپورت تۇرلەرىنەن سايىستار وتكىزىلەدى جانە بەلگىلى ءانشى تەلمان نۇرتاي، «ءداۋىر»، «اي- ارۋ» تريولارى ت. ب. ونەرپازدار ونەر كورسەتەدى.

ءىس- شارانىڭ ەكىنشى بولىمىندە ق. قۋانىشبايەۆ اتىنداعى قازاق مۋزىكالىق دراما تەاترىنىڭ ساحناسىندا تانىمال ءداستۇرلى انشىلەر جانە ەسترادا جۇلدىزدارى ەرلان رىسقالي، دوسىمجان تاڭاتاروۆ، ارداق بالاجانوۆا، قانات- سۆەتا ايتبايەۆتار، كلارا تولەنبايەۆا ءان شىرقايدى، «سەرپەر» رەسپۋبليكالىق دومبىراشىلار توبى، «گۇلدەر- اي» ءبي ءانسامبلى ونەر كورسەتەدى، بەلگىلى ايتىس اقىندارى يرانعايىپ كۇزەمبايەۆ پەن ماقسات اقانوۆ كوكتەم ايتىسىن جانە ق. قۋانىشبايەۆ اتىنداعى تەاتردىڭ ارتىستەرى كورىنىس ۇسىنادى.

مەرەكەلىك دۋمانعا قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى، زيالى قاۋىم وكىلدەرى، ەتنومادەني بىرلەستىكتەردىڭ، ورتالىق جانە جەرگىلىكتى اتقارۋشى ورگانداردىڭ، ۇكىمەتتىك ەمەس ۇيىم جانە جاستار قوزعالىستارىنىڭ، وقۋ ورىندارىنىڭ وكىلدەرى شاقىرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى