جاۋىنگەرلىك تۋ شىمكەنتكە جەتتى

قالاداعى 6506 اسكەري ءبولىمىنىڭ وفيتسەرلەرى مەن جاۋىنگەرلەرى سالتاناتتى ساپ تۇزەپ، ارداگەرلەرگە قۇرمەت كورسەتتى. وتان ءۇشىن كۇرەسكەن جانداردىڭ رۋحىنا تاعزىم جاساپ، ماڭگىلىك الاۋ جانىنا گۇل شوقتارىن قويدى. قازاق جەرىندە جاساقتالعان ديۆيزيا ۇرىستى ستالينگراد تۇبىنەن باستاپ، جەڭىستى پراگادا قارسى العان. قانشاما ەلدى مەكەندى جاۋ قولىنان ازات ەتتى. ديۆيزيانىڭ 31 جاۋىنگەرى كەڭەس وداعىنىڭ باتىرى اتاندى. اتى اڭىزعا اينالعان ديۆيزيانىڭ جاۋىنگەرلىك تۋىنىڭ كوشىرمەسىن قابىلداپ العان 6506 اسكەري ءبولىمىنىڭ ساربازدارى ارداگەرلەرمەن بىرگە قالاداعى ءبىرقاتار وقۋ ورىندارىن ارالىپ، سول كەزدەگى قازاقستاندىق جاۋىنگەرلەردىڭ ەرلىكتەرىن دارىپتەمەك.

«ءبىز كەشەگى سوعىس كەزىندە گۆارديا تۋىن جەلبىرەتىپ العا قاراي ۇمتىلعانىمىزدا، جاۋدىڭ ءوزى قارسى تۇرا المايتىن. تۋ تىگۋلى تۇرعاندا شەپتى بۇزا المايتىن. سوندىقتان بۇگىنگى ۇرپاقتىڭ وتانىنا ادال قىزمەت ەتىپ، تۋدى قاشاندا بيىك ۇستاعاندارىن تىلەيمىن»، - دەدى سوعىس ارداگەرى دەميان ساۋيلين.

ونىڭ ءسوزىن جالعاعان 6506 اسكەري ءبولىمىنىڭ وفيتسەرى قاجىمۇقان قاليەۆ «ءبىزدىڭ اعالارىمىز، اتالارىمىز وسى جاۋىنگەرلىك تۋ استىندا جەڭىسكە جەتكەن. بۇل جاۋىنگەرلىك تۋدى الۋ ءبىزدىڭ بولىمگە ۇلكەن مارتەبە بولىپ تابىلادى»، - دەپ ريزاشىلىعىن ءبىلدىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى