فۋتبولداعى ەندى قايتالانبايتىن بەس رەكورد - كەسكىن
ءبىز ءسوز ەتكەلى وتىرعان رەكوردتاردىڭ بارلىعى فۋتبولعا تيەسىلى. راسىمەن الداعى ۋاقىتتا بۇل ۇزدىك كورسەتكىشتەردىڭ وزگەرۋى ەكىتالاي.
ءالي داەي. 1993-2006-جىلدار ارالىعىنداعى يران ۇلتتىق قۇراماسىنىڭ فۋتبولشىسى. وسى ۋاقىت ىشىندە ءالي ۇلتتىق قۇراماسى ءۇشىن 149 ويىن وتكىزىپ، قارسىلاستارىنىڭ قاقپاسىنا 109 گول سوققان. ازىرگە بۇل مەجەنى وزگەرتۋى مۇمكىن فۋتبولشى يرلانديا قۇراماسىنىڭ ويىنشىسى روببي كين. بيىل 35 كە تولاتىن روببي ءوز ەلىنىڭ باس كومانداسىندا 1998-جىلدان بەرى ويناپ كەلەدى. سودان بەرى يرلانديا ءۇشىن 135 ويىن وتكىزىپ، 65 گول سوققان. وسى كورسەتكىشكە قاراپ-اق ءاليدىڭ بيىگى ازىرگە ەشكىمگە باعىنبايدى دەسەك، ارتىق ەمەس.
ەڭ كوپ گول سوققان قاقپاشىنى بىلەسىز بە؟ ەگەر پاراگۆايدىڭ باعىنا تۋعان اتاقتى چيلاۆەرتتى اتاساڭىز قاتەلەسەسىز. ول - 2002-جىلعى الەم چەمپيونى، 1997-2006-جىلدار ارالىعىنداعى برازيليا قۇراماسىنىڭ قاقپاشىسى روجەريو سەني. روجەريو 22 جىل فۋتبول ويناپ، سول ارالىقتا 123 گول سوققان. ال ەكىنشى ورىندا تۇرعان چيلاۆەرتتىڭ ەنشىسىندە 64 گول عانا. ەندەشە برازيليالىق قاقپاشىنىڭ رەكوردىن جۋىق ارادا ەشكىم بۇزا المايدى دەۋگە تولىق نەگىز بار.
جيۋست فونتەن. بۇل فۋتبولشىنىڭ ەسىمى جانكۇيەرلەرگە جاقسى تانىس. فونتەننىڭ اتى ءبىر الەم چەمپيوناتىندا 13 گول سوعۋىمەن ەستە قالدى. 1958-جىلى شۆەتسيادا وتكەن مۋنديالدا ول 6 ويىن وتكىزىپ، 13 مارتە مەرگەندىگىمەن كوزگە تۇسكەن. ال جالپى الەم چەمپيوناتتارىندا ەڭ كوپ گول سوققان گەرمانيالىق ميروسلاۆ كلوزەنىڭ ەنشىسىندە 16 دوپ بار. ول بۇل كورسەتكىشكە 4 الەم چەمپيوناتىنا قاتىسىپ، 24 ويىن وتكىزىپ قول جەتكىزدى. دەمەك، جيۋست فونتەننىڭ ناتيجەسىن الداعى ۋاقىتتا بىرەۋ قايتالايدى دەگەنگە سەنۋ قيىن.
بۇگىندە ۋ ە ف ا چەمپيوندار ليگاسىن جەڭىپ الۋ ەۋروپاداعى كەز كەلگەن كوماندانىڭ ارمانى. ال وسى سايىستا ەكى رەت قاتارىنان توپ جارۋ سوڭعى 23 جىلدىڭ ىشىندە ەشبىر كوماندانىڭ قولىنان كەلەر ەمەس. ەندەشە ەكى رەت جەڭە الماي جۇرگەندە قاتارىنان بەس مارتە كۋبوكتى يەمدەنۋ تۋرالى ويلاۋدىڭ دا قاجەتى جوق. دەگەنمەن، وسى مەجەنى باعىندىرعان كوماندا بار. ول - يسپانيانىڭ اتاقتى «رەال مادريد» فۋتبول كلۋبى. 1956-1960-جىلدارى قاتارىنان بەس رەت سول كەزدەگى چەمپيوندار كۋبوگى (قازىرگى چەمپيوندار ليگاسى) جارىسىندا جەڭىمپاز اتاندى. سودان بەرى تەك ميۋنحەننىڭ «باۆارياسى» مەن امستەردامنىڭ «اياكسى» قاتارىنان ءۇش رەت جەڭىسكە جەتىپ، مادريدتىكتەردىڭ رەكوردىنا ءسال دە بولسا جاقىنداپ كوردى. ال تۋرنيردىڭ اتاۋى چەمپيوندار ليگاسى دەپ وزگەرتىلگەن 1991-جىلدان بەرى ەشقانداي كوماندا ەڭ بولماسا قاتارىنان ەكى رەت جەڭىسكە جەتىپ كورگەن جوق. ەندەشە بىردەن بەس رەت جەڭىسكە جەتۋ ورىندالمايتىن ارمان عانا.
قازىر ءبىر قالانىڭ فۋتبول كومانداسىندا بىرنەشە ەلدىڭ ويىنشىسى وينايدى. ءناسىلى، ءدىنى، ءتىلى، ۇلتى بولەك فۋتبولشىلار ورتاق مۇددە ءۇشىن «جان بەرىپ، جان الىسادى». ماسەلەن، اعىلشىنداردىڭ اتاقتى «ليۆەرپۋلىندە» اق تا، قارا دا وينايدى. كومانداداعى ويىنشىلاردىڭ بارلىعى سول ليۆەرپۋل قالاسىنىڭ نامىسى ءۇشىن دوپ تەبەدى. ول ءۇشىن مىندەتتى تۇردە ليۆەرپۋلدىك بولۋ شارت ەمەس. بۇگىنگى فۋتبولدىڭ زاڭدىلىعى وسىنداي. ال تەك ءبىر قالادا تۋعان فۋتبولشىلارمەن چەمپيوندار كۋبوگىن جەڭىپ العان كوماندا بار دەسە، سەنەر مە ەدىڭىز؟
ءيا، ونداي كوماندا بار. ول - شوتلانديانىڭ «سەلتيگى». بۇل كوماندا 1966-1967-جىلعى ماۋسىمدا تاريحىندا العاشقى جانە ازىرگە سوڭعى رەت چەمپيوندار كۋبوگىن يەمدەندى. سول كەزدە كوماندا قۇرامىنداعى فۋتبولشىلاردىڭ بارلىعى شوتلانديا استاناسى گلازگونىڭ تۋماسى ەدى. قازىر مۇنداي جەڭىستىڭ ەش مۇمكىن ەمەسىن كەز كەلگەن جانكۇيەر جاقسى بىلەدى. ءتىپتى چەمپيوندار ليگاسىن تەك ءبىر ەلدە تۋعان فۋتبولشىلارمەن دە جەڭىپ الۋدى ويلاۋ ارتىق دۇنيە. سەبەبى، بۇل اقشا الدىڭعى ورىنعا شىققان بۇگىنگى فۋتبولدىڭ جازىلماعان زاڭدىلىعىنا قايشى ۇعىم. ەندەشە گلازگولىقتاردىڭ رەكوردى تۋرالى ءالى تالاي عاسىر ايتىلارى انىق.
