تانىمال ايتىسكەر اقىن بەكارىس شويبەكوۆ ەلباسىنا ودا ارنادى
«ءبىز بۇگىن ەلىمىز ءۇشىن اسا ماڭىزدى ساياسي وقيعانىڭ قارساڭىندا تۇرمىز. وسى سارايدا وتىرعانداردىڭ بارشاسىنىڭ سىزگە دەگەن ىقىلاسى، ەلباسىنا دەگەن سەنىمى ايتقىزباي-اق، ەلدىڭ ەمەۋرىنىنەن ءبىلىنىپ تۇر. ءوز باسىم بۇعان دەيىن دە تالاي اسۋلار مەن بەلەستەردى ىنتىماقپەن باعىندىرعان ەلىمىز بۇل جولى دا جۇرىسىنەن تانباي، ءوز ەلباسىنىڭ جانىنان تابىلاتىنىنا بەك سەنىمدىمىن»، - دەدى ايتىسكەر اقىن.
ول نازاربايەۆ جەتەكشىلىك ەتەتىن «نۇر وتان» پارتياسى ۇلت مۇراتىن تۋ ەتكەن پارتيا ەكەنىن باسا ايتتى.
«تەك بىلتىرعى جىلدىڭ وزىندە پارتيانىڭ باستاماسىمەن جەتى بىردەي وبلىستا رەسپۋبليكالىق اقىندار ايتىسى ءوتتى. ايتىس - ءدال وسى «نۇر وتان» سەكىلدى حالىق پەن بيلىكتىڭ اراسىنداعى التىن كوپىر. قۇر سىناۋشى عانا ەمەس، جاقسىلىقتاردى دا جارقىراتىپ ايتا الاتىن ونەر. جامبىل بابامىز ايتقانداي، «كەشە دە، بۇگىن دە اقىنداردىڭ جىرلايتىنى بىرلىك، اڭسايتىنى - شىندىق، كوكسەيتىنى - مەملەكەت ساياساتى». ياعني، ءپاتۋالى تىرلىك. سوندىقتان دا، بايتاق ەل ءتورت كۇل دۇنيەمەن تەرەزەسىن تەڭ ەتكەن ءوز پرەزيدەنتىن قولدايدى»، - دەگەن بەكارىس شويبەكوۆ «اقىنعا قارا سوزدەن ولەڭ ارتىق» ەكەنىن دالەلدەپ، ءارى قاراي جىر شۋماقتارىن جولدادى.
«اقتارسام كوكىرەكتەن شىنشىل جىردى،
قازاعىم تاتۋلىقپەن ءتىل سىندىردى.
داعدارىستىڭ داۋىلى ءبىز تۇگىلى،
تالاي الىپ ەلدەردى كۇرسىندىردى.
ەلباسى كوشتى باستاپ كەلە جاتىر،
كۇن بۇرىن باعدارلاپ تىلسىم كۇندى.
التى الاشقا كەرەگى ەل بىرلىگى،
بەيبىت كۇن كوگىمىزدە كۇلسىن نۇرلى.
سوندىقتان وزىڭىزگە تاپسىرماقشى،
قالىڭ ەل ەكى تىزگىن ءبىر شىلبىردى.
مىنا جول بابالاردان جالعاسقان ءىز
جاتپايدى قىن تۇبىندە الماس ناعىز.
قاشاندا جانىڭىزعا تىرەك بولعان،
قولداڭىز ۇلتىڭىزدى، قورعاشتاڭىز.
قانشاما اسۋلاردان اداستىرماي،
امان-ساۋ الىپ وتكەن مارقاسقامىز.
تاعدىرىن جۇرتىڭ سىزگە تاپسىرىپ تۇر،
تاۋەكەل، تاعى دا ءبىر جول باستاڭىز».
BNews.kz.
