بايتاق ەل تورتكىل دۇنيەمەن تەرەزەسىن تەڭ ەتكەن ءوز پرەزيدەنتىن قولدايدى - ايتىسكەر اقىن ب. شويبەكوۆ
«ءبىز بۇگىن ەلىمىز ءۇشىن اسا ماڭىزدى ساياسي وقيعانىڭ قارساڭىندا تۇرمىز. وسى سارايدا وتىرعانداردىڭ بارشاسىنىڭ سىزگە دەگەن ىقىلاسى، ەلباسىنا دەگەن سەنىمى ايتقىزباي- اق ەلدىڭ ەمەۋرىنەن اڭعارىلىپ تۇر. ءوز باسىم بۇعان دەيىندە تالاي اسۋلار مەن بەلەستەردى ىنتىماقپەن باعىندىرعان ەلىمىز بۇل جولى دا جۇرىسىنەن تانباي، ءوز ەلباسىنىڭ، ءوز كوشباسشىسىنىڭ جانىنان توپتاساتىندىعىنا بەك سەنىمدىمىن. مەنىڭ الدىمدا سويلەگەن ەل اعالارى، جاستار، ەلدىڭ ىشكى- سىرتقى ساياساتىنداعى، ەكونوميكاداعى ايتۋلى جەتىستىكتەردى بايانداپ ءوتتى. مەنىڭ بۇعان قوسارىم، ءوزىڭىز جەتەكشىلىك ەتىپ وتىرعان « نۇر وتان» پارتياسى - بۇل كۇندە ۇلت مۇراتىن تۋ ەتكەن پارتيا، قازاقى بولمىستىڭ جوقشىسى، ۇلت رۋحانياتىنىڭ جاناشىرى»، - دەدى ول.
سونىمەن قاتار ب. شويبەكوۆ 2013 - جىلى قابىلدانعان پارتيا دوكتريناسى ۇلتتىق قۇندىلىقتاردى ۇلىقتاعان قۇجات بولعانىن اتاپ ءوتتى. اتالعان قۇجاتتىڭ نەگىزىندە ءتول مۇرالارىمىزدى جۇيەلى تۇردە دامىتۋ جۇمىستارى ىسكە اسىرىلدى. بۇقارا قاۋىمدى، ونىڭ ىشىندە جاستاردى ۇلت مادەنيەتىنە، سپورتقا، ونەرگە باۋليتىن، بويىنا اتا ءداستۇردى سىڭىرەتىن ايتىس، كوكپار، قۇسبەگىلىك، بايگە، قازاق بارىسى سياقتى ايتۋلى شارالار ىسكە اسىرىلدى.
« ەگەر ءبىز ءسىز مەجەلەگەن 2050 - جىلى دامىعان 30 ەلدىڭ قاتارىنا ەنەمىز دەسەك، وندا ءبىز دەنى عانا ەمەس رۋحى دا اسقاق ەل بولىپ قالا بەرۋىمىز كەرەك. وسى شارالاردىڭ بارلىعى ۇلتتىق رۋحانياتى، ۇلتتىق سانانى شىڭدايتىن شارالار. مۇنىڭ تاعى ءبىر جارقىن مىسالى رەتىندە ايتارىم، بىلتىرعى جىلدىڭ وزىندە پارتيانىڭ باستاماسىمەن 7 بىردەي وبلىستا رەسپۋبليكالىق اقىندار ايتىسى ءوتتى. ايتىستىڭ تاقىرىبى ۇلتارالى بىرلىك، ەلدىڭ تاتۋلىعى، حالىقتىڭ مۇڭ- مۇقتاجى بولدى. ايتىس ءدال وسى « نۇر وتان» سەكىلدى حالىق پەن بيلىكتىڭ اراسىنداعى التىن كوپىر. ەلدىڭ ءسوزىن بيلىككە جەتكىزۋشى، قۇر سىناۋشى عانا ەمەس، جاقسىلىقتاردى دا جارقىراتىپ ايتاتىن، ەلدى ىزگىلىككە ۇندەيتىن ونەر. جامبىل بابامىز ايتقانداي، كەشە دە، بۇگىن دە اقىنداردىڭ جىرلايتىندىعى - بىرلىك، اڭسايتىنى - شىندىق، كوكسەيتىنى - مەملەكەت ساياساتى. ياعني، ءباتۋالى تىرلىك. سوندىقتان دا بايتاق ەل تورتكىل دۇنيەمەن تەرەزەسىن تەڭ ەتكەن ءوز پرەزيدەنتىن قولدايدى»، - دەدى ب. شويبەكوۆ.
ايتىسكەر اقىن ءسوزىن ولەڭ شۋماقتارىمەن اياقتاي كەلە:
« اقتارسام كوكىرەكتەن شىنشىل جىردى،
قازاعىم تاتۋلىقپەن ءتىل سىندىردى.
داعدارىستىڭ داۋىلى ءبىز تۇگىلى،
تالاي الىپ ەلدەردى كۇرسىندىردى.
ەلباسى كوشتى باستاپ كەلە جاتىر،
كۇن بۇرىن باعدارلاپ تىلسىم كۇندى.
التى الاشقا كەرەگى ەل بىرلىگى،
بەيبىت كۇن كوگىمىزدە كۇلسىن نۇرلى.
سوندىقتان وزىڭىزگە تاپسىرماقشى،
قالىڭ ەل ەكى تىزگىن ءبىر شىلبىردى.
مىنا جول بابالاردان جالعاسقان ءىز
جاتپايدى قىن تۇبىندە الماس ناعىز.
قاشاندا جانىڭىزعا تىرەك بولعان،
قولداڭىز ۇلتىڭىزدى، قورعاشتاڭىز.
قانشاما اسۋلاردان اداستىرماي،
امان- ساۋ الىپ وتكەن مارقاسقامىز.
تاعدىرىن جۇرتىڭ سىزگە تاپسىرىپ تۇر،
تاۋەكەل تاعى دا ءبىر جول باستاڭىز»، - دەدى.
اۆتور: مارلان جيەمباي
