كوممۋنيست ت. سىزدىقوۆ پرەزيدەنتتىككە كانديدات بولۋعا لايىقتى ەكەنىن «ءبىزدىڭ كۇشىمىز بىرلىكتە» تاقىرىبى ارقىلى دالەلدەمەك
ول العاشقى كەزەڭدە «ءبىزدىڭ بىرلىگىمىز بىرلىكتە» تاقىرىبىندا ەكى بەتتىك شىعارما جازۋدا.
«لينگۆيستكالىق كوميسسياعا قازاق تىلىننەن سىناق تاپسىرۋعا تۇرعىن ىسقاق ۇلى سىزدىقوۆ مىرزا كەلىپ وتىر. بۇل كىسى 1947-جىلى دۇنيەگە كەلگەن. ءبىلىمى - جوعارى. عالىم- اگرونوم. تۇرعىلىقتى جەرى - كوكشەتاۋ قالاسى. وسى ۋاقىتقا دەيىن بىزگە ءوزىن-ءوزى ۇسىنعان ازاماتتار كەلگەن بولاتىن. بۇگىن ءبىرىنشى رەت قازاقستاننىڭ كوممۋنيستىك حالىق پارتياسى قوعامدىق بىرلەستىگى بۇل كىسىنى پرەزيدەنتتىككە كانديداتتىققا ۇسىنىپ وتىر. بانك قىزمەتكەرى ەكەن»، - دەدى كانديداتتى تانىستىرعان ق ر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ.
سونىمەن قاتار كوميسسيا ءتوراعاسى ت. سىزدىقوۆقا مەملەكەتتىك ءتىلدى ەركىن مەڭگەرگەندىگى ءۇشىن ءۇش كەزەڭنەن تۇراتىن سىناق تاپسىراتىندىعىن اتاپ ءوتىپ، ونىڭ شارتتارىمەن جان-جاقتى تانىستىردى.
ايتا كەتەيىك، ت. سىزدىقوۆ 1947-جىلى كوكشەتاۋ وبلىسىندا دۇنيەگە كەلگەن. 1974-جىلى ماسكەۋدەگى بۇكىل وداقتىق جاستار وداعى جانىنداعى جوعارى پارتيا مەكتەبىن بىتىرگەن. 1984-جىلى سەلينوگراد اۋىل شارۋاشىلىعى ينستيتۋتىن ءتامامداعان. ول اقمولاداعى سەلينگيدروماش مەكەمەسىندە جۇمىس ىستەگەن. اسكەري بورىشىن وتەپ ەلگە ورالعاننان كەيىن كاسىپتىك-تەحنيكالىق ۋچيليشەنىڭ كومسومول كوميتەتىن باسقارعان. جوعارى پارتيا مەكتەبىن بىتىرگەننەن سوڭ كومسومول اۋداندىق پارتيا كوميتەتىنىڭ حاتشىسى، ودان كەيىن ءبىرقاتار كەڭشاردىڭ پارتيا كوميتەتىنىڭ حاتشىسى بولىپ ىستەدى. چيستوپول اۋداندىق پارتيا كوميتەتىنىڭ ەكىنشى حاتشىسى قىزمەتىن اتقارعان.
اۆتور: مارلان جيەمباي
