بەلارۋس اتىنان سىنعا تۇسكەن قازاق قىزى الەم چەمپيونى اتاندى

مينسكىدەن 20 شاقىرىمداي جەردە ورنالاسقان راۋبيچي قالاشىعىندا وتكەن جاسوسپىرىمدەر اراسىنداعى الەم چەمپيوناتىندا بەلارۋس قىزدار قۇراماسى 3х6 كيلومەترلىك ەستافەتادا التىن الدى.

الەم چەمپيونى اتانعان بەلارۋس قۇراماسىنىڭ ساپىندا بۇرىنعى قازاقستاندىق دينارا الىمبەكوۆا دا بولدى. جارىستان كەيىن بەلارۋس جاستار قۇراماسىنىڭ جاتتىقتىرۋشىسى ۆاسيلي بولشاكوۆ «بۇل - تاريحي جەڭىس» دەپ باعالادى. بەلارۋس بۇعان دەيىن 2009-جىلعى الەم چەمپيوناتىنىڭ ەستافەتاسىندا - قولا، 2010-جىلى الەم بىرىنشىلىگىندە كۇمىس العان ەدى.

بياتلوننان بەلارۋستىڭ نەگىزگى وليمپيادالىق قۇراماسىن بەس جىلدان استام ۋاقىت جاتتىقتىرىپ كەلە جاتقان باپكەر اندريان تسيبۋلسكي دينارا الىمبەكوۆانى «بولاشاعى بار ءارى ۇلتتىق قۇراماداعى بياتلونشىلاردىڭ ءىزباسارى» دەپ باعالادى.

19 جاستاعى دينارا الىمبەكوۆا قازاقستاننىڭ اباي قالاسىندا تۋعان. ءۇش جاسىندا وتباسىمەن بەلارۋسكە كوشىپ كەتكەن. ول قازاقستانعا جەتى جاسىندا اتاسىمەن ءبىر رەت كەلگەن. ودان كەيىن بۇل ەلگە جولى تۇسپەپتى.

«اكەم - قازاق، انام - ورىس. ءۇش-ءتورت جاسىمدا اتا-انام بەلارۋستەن جۇمىس تاۋىپ، سول جاققا كوشكەن. قازىر چاۋسى قالاسىندا وقيمىن ءارى جاتتىعامىن. انام ءبىر مەكەمەدە ەسەپشى بولىپ جۇمىس ىستەيدى. اكەممەن بىرگە تۇرمايمىز» دەدى ول.

دينارا سپورتقا كەلمەس بۇرىن مۋزىكا مەكتەبىندە پيانينو كلاسىندا وقىعان. 2007-جىلى 11 جاسقا تولعاندا دەنە شىنىقتىرۋ مۇعالىمىنىڭ ۇسىنىسىمەن شاڭعى سپورتىمەن اينالىسا باستاپتى. 2008-جىلى چاۋسىداعى سپورت مەكتەپتەرىنىڭ بىرىنە ءتۇسىپ، شاڭعى تەبۋمەن قاتار ۆينتوۆكادان اتۋعا ماشىقتانادى.

«مۋزىكادان بىردەن سپورتقا اۋىسا المادىم. ەكەۋىن قاتار ۇستاۋعا تىرىسىپ، جارىسقا نوتالارىمدى الا كەتەتىنمىن. قازىر دە پيانينو وينايمىن، نوتا ۇمىتقان جوقپىن» دەيدى ول.

2011-جىلى دينارا بەلارۋس جاسوپىرىمدەر قۇراماسىنا شاقىرتۋ الادى. كەيىن بىرنەشە ەۋروپالىق جانە حالىقارالىق جارىستارعا قاتىسقان. بيىل جاستار اراسىنداعى بەلارۋس چەمپيوناتىندا جەكەلەي جارىستا - كۇمىس، ءىز قۋىپ جارىسۋ مەن سپرينتتە قولا العان.

ال راۋبيچيدەگى جاستار اراسىنداعى الەم چەمپيوناتىندا العاش رەت حالىقارالىق دەڭگەيدەگى التىن مەدالىن يەلەندى.

«راۋبيچيدە اتۋ كەزىندە ءبىراز قاتەلىك جىبەردىم. ءبىراق شاڭعىمەن جۇگىرۋدە جىلدام بولدىم. كوماندالاسىما ەستافەتانى ءۇشىنشى بولىپ تاپسىردىم. ءبىراق ءبىرىنشى جانە ەكىنشى ورىنداعى قارسىلاستارىمنان تەك ەكى-ءۇش سەكۋندقا قالدىم» دەيدى سپورتشى ازاتتىق تىلشىسىنە.

دينارا الىمبەكوۆا بەلارۋس جاستار قۇراماسىنىڭ تولىق مۇشەسى رەتىندە مەملەكەتتەن قارجىلاي كومەك تە الاتىنىن ايتادى.

ول تاريحي وتانىنا ورالۋى جاعىن ءالى ويلانباعانىن، بولاشاقتا بەلارۋس قۇراماسىنىڭ ساپىندا جارىستارعا قاتىسۋدى جوسپارلايتىنىن جەتكىزدى.

«ەش مەملەكەتتەن ۇسىنىس تۇسكەن جوق. قازاقستان دا شاقىرمادى. شاقىرماعان سوڭ بۇل تۋرالى ويلاماپپىن. بەلارۋستە بياتلونمەن اينالىسۋعا مۇمكىندىك مول. سپورتشى رەتىندە پرەزيدەنتتىك ستيپەنديا دا الامىن. بەلارۋستە بارلىق جاعداي بار، سوندىقتان باسقا ەلگە كەتۋ جايىن ويلاماپپىن» دەدى بياتلونشى.

بەلارۋس جانكۇيەرلەرى الەۋمەتتىك جەلىلەردە دينارا الىمبەكوۆانى بولاشاقتا سوچي وليمپياداسىنىڭ ءۇش دۇركىن چەمپيونى، الەم چەمپيوناتىندا ەكى التىن، الەم كۋبوگىندا 27 التىن العان «بەلارۋس قاھارمانى» داريا دومراچيەۆانىڭ ءىزىن باسادى دەگەنگە ۇقساس ماقتاۋ بىلدىرە باستادى.

«ازاتتىق»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى