نيۋ-يوركتەگى قازاقستاندىق-امەريكالىق ءسان كورسەتىلىمى اسا تارتىمدى ءوتتى

قازاقستاندىق ديزاينەرلەر ءوز توپتامالارىن نيۋ- يوركتىڭ بەلگىلى بيكەشتەرى مەن ءساندى كيىم ۇلگىلەرىنىڭ ساراپشىلارىنا ۇسىنىپ، ىقىلاسقا بولەندى. قازاقتىڭ داستۇرىنە ساي بىرەگەي ۇلگى مەن امەريكالىق ديزاينەرلەردىڭ تۋىندىلارى Fashion show-دا ەرەكشە ۇيلەسىم تاپتى. ءدۇيىم جۇرتتىڭ كوڭىلىنەن شىققان شارا نيۋ-يوركتىڭ بۇۇ عيماراتتارىنىڭ بىرىندە ءوتتى، دەپ حابارلايدى 24.kz.

«سىمبات» ءسان اكادەمياسى الەمدى 1972 - جىلدان باستاپ تاڭداي قاقتىرىپ جۇرسە، امەريكالىق ارىپتەستەر بۇل باستامانى ەندى عانا قولعا العان. قازاقستاندىق ءسان ءۇيىنىڭ ارت- ديرەكتورى بالنۇر اسانوۆا كوپشىلىك نازارىنا ءتۇرلى توقىمادان تىگىلگەن كەستە مەن وزىندىك ەرەكشەلىگى بار جىبەك جەيدەلەردى ۇسىندى.

«مەنى قازاقستاننىڭ «سىمبات» ءسان اكادەمياسى ديزاينەرلەرىنىڭ جۇمىسى تاڭ قالدىردى. كەيبىرى مۇلدە كوزدىڭ جاۋىن الادى. مۇندا ءار نارسەگە ەرەكشە كوڭىل بولىنگەندىگى انىق بايقالادى. قازاقستاننىڭ ءسان ۇلگىسى بىزگە ەرەكشە لەپ بەردى»، - دەيدى، Fashion for Development كومپانياسىنىڭ پرەزيدەنتى يۆي ەۆانگەلوۋ.

نيۋ- يورك ديزاينەرى ۆالەنتينا كوۆا اتالعان كورسەتىلىمنىڭ كورىگىن ودان سايىن قىزدىرا ءتۇستى. ونىڭ قولىنان شىققان كيىمدەردى حيللاري كلينتون، اتاقتى اكتريسا دجۋلليانا مۋر، «وسكار» جەڭىمپازدارى سىندى ايتۋلى تۇلعالار تۇتىنادى.

سونداي- اق اۆتور وسى جولى زەرگەرلىك بۇيىمدارىن دا الا كەلگەن. ونىڭ اشەكەيلەرىن ەكرانعا ەندى عانا شىعاتىن «بەتمەن سۋپەرمەنگە قارسى» جاڭا كوركەم ءفيلمىنىڭ كەيىپكەرلەرىنەن كورە الاسىزدار. باعدارلاما اياسىندا جاس ءانشى التىناي ساپارعاليەۆا قازاقستاندى ءار قىرىنان تانىتۋعا وزىندىك ۇلەسىن قوستى.

«ءسان ۇلگىسى وتە كەرەمەت ءوتتى. قازاقستان تۋرالى كوركەم فيلم مەنى ەرەكشە باۋراپ الدى. انشىلەرىڭىز التىناي دا قاتتى ۇنادى. ءبىز قازاقستان تۋرالى ءبىراز نارسەنى بىلدىك، ەلدەرىڭىزگە قازىر ۇشىپ بارۋعا دايىنمىن»، - دەيدى ىسكەر ايەل شەرون بۋش.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى