مۇحتار ءابليازوۆ پەن لوندونداعى ءزاۋلىم ءۇي
كەزىندە «الاياقتىق» بابى بويىنشا ايىپتالعان مۇحتار ءابليازوۆ سوت پروتسەسى قارساڭىندا ۇلى بريتانيادان قاشىپ كەتكەن بولاتىن. ونىڭ لوندوننىڭ ورتالىعىنداعى قۇنى 14 ميلليون فۋنت ستەرلينگ تۇراتىن ءۇيى باتىستىڭ كەيبىر اقپارات قۇرالدارىنىڭ نازارىنا تاعى ىلىكتى.
جەراستى باسسەينى بار ءۇي
ناۋرىزدىڭ 4- كۇنى ۇلى بريتانيانىڭ Independent گازەتى « ۇلى بريتانيا تاريحىندا الاياقتىق بابى بويىنشا قوزعالعان ءىرى ءىستى قاراۋدان مۇحتار ءابليازوۆ فرانسياعا قاشىپ، قۇتىلىپ كەتتى» دەپ جازادى. دەتەكتيۆتەر ونى ءبىر جىلدان كەيىن فرانسيانىڭ وڭتۇستىگىندەگى كاننى قالاسى تۇبىندەگى ۆيللادان تاپقان. گازەت لوندوننىڭ ورتالىعىنداعى ءزاۋلىم سارايدىڭ فوتوسۋرەتىن جاريالاعان، سۋرەتتىڭ استىندا «مۇحتار ءابليازوۆتىڭ ءۇيى» دەگەن جازۋ بار.
ناۋرىزدىڭ 2 سىندە حالىقارالىق Bloomberg اگەنتتىگى «ميللياردەرلەر اقشالارىن لوندوننىڭ ءزاۋلىم ءارى قۇپيا ۇيلەرى ارقىلى قالاي جاسىرادى» دەگەن ماقالا جاريالادى. اگەنتتىكتىڭ جازۋىنشا، ۇلى بريتانيانىڭ جوعارعى سوتى ءمارمار ۆاننالارمەن، حرۋستال شىراعداندارمەن جابدىقتالعان، بال زالى، جەراستى باسسەينى، 10 ادامعا ارنالعان تۇرىك مونشاسى مەن جەتى جاتىن بولمەسى بار ءزاۋلىم ءۇيدىڭ قوجايىنى مۇحتار ءابليازوۆ ەكەنىن انىقتاعان.
ەندى 14 ميلليون فۋنت ستەرلينگكە (21 ميلليون 500 مىڭ دوللار) باعالانعان ءۇي ساتىلىپ، تۇسكەن اقشا قازاقستانداعى ب ت ا بانكتىڭ قارىزدارىن جابۋعا جۇمسالماق. ال ەرتەرەكتە مۇحتار ءابليازوۆ «جالعا الدىم» دەگەن ۋاجبەن الگى ءۇيدىڭ قوجايىنى ەكەنىن تەرىستەگەن بولاتىن. ءبىراق Bloomberg اگەنتتىگىنىڭ جازۋىنشا، ۇلى بريتانيا سوتى جىلجىمايتىن مۇلىكتىڭ وففشور كومپانيالار جەلىسى ارقىلى ساتىپ الىنعانىن ءارى ولار مۇحتار ابليازوۆكە قاتىسى بارىن جاسىرعانىن انىقتاعان.
«زاڭسىز اقشا لوندونعا اعىلىپ جاتىر»
ناۋرىزدىڭ 6- كۇنى ۇلى بريتانيانىڭ Independent گازەتى «لوندونداعى جىلجىمايتىن مۇلىك دۇربەلەڭى زاڭسىز اقشاعا قۇرىلعان» دەگەن تاعى ءبىر ماقالا جاريالادى. گازەتتىڭ مالىمدەۋىنشە، كوررۋپسيالىق جولمەن الىنعان ميللياردتاعان فۋنت ستەرلينگ اقشانى قىلمىسكەرلەر مەن شەتەلدىك شەنەۋنىكتەر جاسىرىن وففشور كومپانيالاردىڭ كومەگىمەن لوندوندا جىلجىمايتىن مۇلىك ساتىپ الۋ ارقىلى زاڭداستىرىپ جاتىر.
گازەتتىڭ حابارلاۋىنشا، لوندوندا قۇپيا كومپانيالار ارقىلى ساتىپ الىنعان 36 مىڭعا جۋىق ءۇيدىڭ كوبى ۇرلانعان اقشانىڭ ءىزىن جاسىرۋ ءۇشىن ساتىپ الىنعان. حالىقارالىق Transparency International كوررۋپتسيامەن كۇرەس ۇيىمىنىڭ حابارلاۋىنشا، سوڭعى كەزدە لوندون كوررۋپتسيالىق جولمەن الىنعان زاڭسىز اقشا اعىلىپ جاتقان قالاعا اينالعان. ويتكەنى لوندوندا جىلجىمايتىن مۇلىك قىمبات تۇرادى ءارى ۇلى بريتانيا بيلىگى مۇلىك يەلەرى تۋرالى اقپاراتتى جاريالاعىسى كەلمەيدى.
Independent گازەتىنىڭ جازۋىنشا، وتكەن جۇمادا ماسكەۋ قالاسىندا قاستاندىقپەن ولتىرىلگەن رەسەيلىك وپپوزيتسيونەر بوريس نەمسوۆ «كوررۋپتسيا جايلاعان ەلدەردەن ۇرلانعان اقشا اعىنىن توقتاتۋ ءۇشىن ۇلى بريتانيا جەتكىلىكتى شارا قولدانباي وتىر» دەپ تالاي مالىمدەگەن.
گازەتتىڭ جازۋىنشا، ۇلى بريتانيا بيلىگى قىلمىستىق جولمەن تابىلعان اقشانى زاڭداستىرۋ ارەكەتتەرىن كوبىنەسە جازالامايدى. ال Transparency International ۇيىمى «كوبىرەك اقشا تابۋدى عانا كوزدەيتىن جىلجىمايتىن مۇلىك ساتاتىن اگەنتتەر كۇدىكتى مامىلەلەر جايلى بيلىككە حابارلامايدى» دەپ مالىمدەيدى.
قازاقستان ۇكىمەتى مۇحتار ءابليازوۆتى «ب ت ا بانك ەسەپ- شوتىنان التى ميلليارد دوللاردى جىمقىردى» دەپ ايىپتايدى. قازاقستاننان كەتىپ قالعان 2009 - جىلعا دەيىن بانك اكسيالارىنىڭ باسىم بولىگى مۇحتار ءابليازوۆتىڭ يەلىگىندە بولعان. كەيىن بانك مەملەكەت مەنشىگىنە وتكەن. قىرۋار شىعىنعا ۇشىراعان كرەديتورلاردىڭ اراسىندا ۇلى بريتانيانىڭ RBS، Barclays, Standard Chartered جانە HSBC بانكتەرى دە بار. مۇحتار ءابليازوۆ «ساياسي استارى بار» دەگەن ۋاجبەن تاعىلعان ايىپتاردى مويىندامايدى.
«ازاتتىق» سايتى
