فرانسيانىڭ ق ر- داعى ەلشىلىگىنىڭ ۇيىمداستىرۋىمەن ءداستۇرلى «فرانسيا كۇنى» باستالدى
فرانسيانىڭ الماتىداعى باس كونسۋلى پاتريك رەنار بۇگىنگى شارانىڭ اشىلۋ راسىمىندە قازاقستان مەن فرانسيا اراسىنداعى ىنتىماقتاستىقتىڭ اۋقىمى كەڭەيىپ كەلە جاتقاندىعىن ايتتى. «قازاقستاندا ءار ءتۇرلى سالادا قىزمەت اتقارىپ جۇرگەن فرانسيا ازاماتتارى سانىنىڭ ارتۋى - مۇنىڭ ايقىن كورىنىسى» - دەدى ول.
ونىڭ ايتۋىنشا، بۇگىندە الماتى قالاسىنىڭ وزىندە 400 جۋىق فرانسيا ازاماتى ءومىر سۇرەدى.
«بۇگىنگى شارا وسىمەن ەكىنشى رەت وتكىزىلىپ وتىر. وتكەن جىلى تەك «شىمبۇلاقتا» عانا اتاپ وتكەن بولاتىنبىز. ال بيىل «فرانسيا كۇنىنىڭ» اۋقىمىن كەڭەيتتىك. بۇگىن «شىمبۇلاقتا» باستالعان مەرەكەلىك شارا كەشكە قاراي «مەدەۋ» مۇز ايدىنىندا جالعاسادى. ال «فرانسيا كۇنى» مەرەكەسىنىڭ باستى ماقساتى - قازاقستان مەن فرانسيا اراسىنداعى ىنتىماقتاستىقتىڭ ودان ءارى نىعايا تۇسۋىنە ۇلەس قوسۋ. ونىڭ ۇستىنە ءبىز جىل سايىن 20 - ناۋرىزدا اتاپ وتىلەتىن حالىقارالىق فرانكوفونيا كۇنى مەن 8 - ناۋرىز - حالىقارالىق ايەلدەر كۇنى مەرەكەسىن بىرىكتىرگىمىز كەلدى» - دەدى قازاقپارات تىلشىسىنە بەرگەن سۇحباتىندا فرانسيانىڭ الماتىداعى باس كونسۋلى پاتريك رەنار.
ال «شىمبۇلاق» تاۋ- شاڭعى شيپاجايىندا سىعان دجازى ستيلىندە ونەر كورسەتەتىن فرانسيالىق بەلگىلى دۋەت ديۋسەن الفونس پەن اندوني اگيرردىڭ كونسەرتى بولدى.
سونىمەن قاتار، بەلگىلى فرانسيالىق اسپاز فرەدەريك جونە جەمىس- جيدەكتەن ءار ءتۇرلى مۇسىندەر جاساۋ بويىنشا شەبەرلىك سىنىبىن وتكىزدى. ودان وزگە، پاريج قالاسىنا بارۋعا ارنالعان ەكى ادامدىق جولداما بويىنشا ۇتىس ويىنى ۇيىمداستىرىلدى.
كەشتە «مەدەۋ» مۇز ايدىنىندا مانەرلەپ سىرعاناۋدان ەسىمدەرى الەمگە تانىمال - سوچي وليمپياداسىنىڭ جۇلدەگەرى دەنيس تەن، 2007 - جىلعى الەم چەمپيونى فرانسيالىق برايان جۋبەر، سونداي- اق الەكساندر ليۋبچەنكو، جەن- دەني سانچيس جانە اننا وۆچاروۆا سىندى مانەرلەپ سىرعاناۋشىلار ءوز ونەرلەرىن كورسەتتى.
ايتا كەتەلىك، حالىقارالىق فرانكوفونيا كۇنى - فرانسۋز تىلىندە سويلەيتىن الەم ەلدەرىنىڭ ىنتىماقتاستىعى حالىقارالىق ۇيىمىنىڭ قۇرىلعان كۇنى مەرەكەسى. وسى ۇيىمعا مۇشە ەلدەر بۇل كۇندى جىل سايىن 20 - ناۋرىزدا اتاپ وتەدى.
اۆتور: جاپپاربەرگەن ايبوتا
