قارجىعا كەنەلەمىز دەگەن ۋكراينالىقتار قازاقستانعا اعىلۋدا
وسىلايشا، قالا قورجىنى سوڭعى 3 ايدا 6 ميلليارد تەڭگەگە قامپيىپتى. ۋكرايناداعى قاقتىعىس كاسىبي قىزمەتكەرلەردىڭ دە سانىن قىسقارتتى. ەندى كۇرمەۋى قيىن سالانىڭ ماماندارى قازاق ەلىنە كەلىپ ەڭبەك ەتۋگە كىرىسكەن.
اسىرەسە، ماركەتينگ پەن تەحنيكالىق ءارى قىزمەت كورسەتۋ سالاسى جولعا ءتۇسىپ كەلەدى. بۇل ءتاسىل ءبىزدىڭ ماماندار ءۇشىن تاپتىرماس تاجىريبە. ايتا كەتەيىك، جالاقىعا كەلگەندە ءبولىپ-جارۋ جوق. شەتەل جۇمىسشىلارى وتاندىق قىزمەتكەرلەرمەن بىردەي الادى.
«بۇگىندە ۋكراينادان قازاقستانعا كەلىپ جۇمىس ىستەۋگە ەكى فاكتور اسەر ەتۋدە. بىرىنشىدەن، اتالعان مەملەكەتتەگى داعدارىس جاعدايى سەبەپ بولسا، ەكىنشىدەن ۋكراينا مەن قازاقستاننىڭ ىشكى نارىعى ءبىر-بىرىنە ۇقساس كەلەدى. ياعني، ەل ازاماتتارى بىزگە كەلىپ جۇمىس ىستەۋگە تەز ۇيرەنىپ كەتەدى. تاجىريبەسى مول ماماندار كەلگەندە، قازاقستاندىق كاسىپكەرلەر دەرەۋ جۇمىسقا الىپ جاتىر. ال، وتاندىق جانە شەت ەلدىك ماماندار ءۇشىن جالاقى كولەمى بىردەي تولەنەدى»، - دەدى رەكرۋتينگتىك اگەنتتىكتىڭ مەنەدجەرى اسەل شاكەنوۆا.
جارناما جاساۋدا الدارىنا جان سالمايتىن ۋكراينالىق كومپانيا 1- ايدان بەرى قازاقستاندا قىزمەت ەتۋدە. 10 جىلدان بەرى عالامتور ارقىلى امەريكا، افريكا، ازيا ەلدەرىندە جۇمىس ىستەپ كەلە جاتقان ماركەتينگتىك اگەنتتىك ءبىزدىڭ ەلگە كەلمەس بۇرىن ەكونوميكالىق ءحال-احۋالىمىزدى بۇگە-شۇگەسىنە دەيىن زەرتتەپتى.
ايتۋلارىنشا، سوڭعى ۋاقىتتا ۋكراينا حالقىنىڭ تاۋار ساتىپ الۋداعى بەلسەندىلىگى باسەڭدەگەن. ەسەسىنە، اتالعان كاسىپ ءتۇرى قازاق ەلىندە كۇن قۇرعاتپاي دامىپ كەلەدى.
ەسكەرە كەتەرلىگى، ۋكرايناداعى ەلەكتروندى نارىق تا 2 ەسەگە قىسقارىپ، قۇلدىراي باستاعان. سوندىقتان قازاقستان ەڭ ءتيىمدى ورتا بولىپ وتىر.
قازاقستان نارىعىنا كەلىپ جۇمىس ىستەۋىمىزدىڭ بىردەن-ءبىر سەبەبى ەل ەكونوميكاسى دامىپ، حالىقتىڭ ءال-اۋقاتى كۇننەن كۇنگە جاقسارىپ كەلە جاتىر. وعان قوسا، بۇقارانىڭ عالامتور بيزنەسىنە دەگەن قىزىعۋشىلىعى جوعارى. سونداي-اق، قازاقستانداعى ءىرى كومپانيالار ينتەرنەت ارقىلى جارناما جاساۋ ءۇشىن كوپ قاراجات قۇيۋدان قورىقپاي، تاۋەكەلگە بارا بىلەدى»، - دەدى ماركەتينگتىك اگەنتتىكتىڭ ديرەكتورى يليا مەشەنكو.
ايتا كەتەيىك، الماتىعا اعىلاتىن وزگە ەلدىڭ ازاماتتارى كاسىپكەرلىكپەن اينالىسسا، تابىستان تۇسكەن قاراجاتتىڭ 15 پەن 20 پايىزىن سالىق رەتىندە تولەۋگە مىندەتتى. وسىلايشا وڭتۇستىك استانانىڭ بيۋجەتىنە بەيرەزيدەنتتەردەن 3 ايدىڭ ىشىندە 6 ميلليارد تەڭگەدەن استام قاراجات قۇيىلعان. بۇل بىلتىرعى ءدال وسى ۋاقىتمەن سالىستىرعاندا، 1 جارىم ميلليارد تەڭگەگە ارتىق.
ايتا كەتەيىك، بىلتىردان بەرى ەڭبەك يمميگرانتتارىنىڭ ەلىمىزگە كەلىپ جۇمىس ىستەۋى ناقتى ءبىر جۇيەگە كەلتىرىلگەن بولاتىن. ماسەلەن، سىرتتان كەلەتىن ازامات ءار اي سايىن ەكى ايلىق ەسەپتىك كورسەتكىش كولەمىندە سالىق تولەيدى.
بىلتىر 7 جارىم مىڭنان استام كەلىمسەك كەلىپ، الماتىنىڭ قازىناسىن 94 ميلليون تەڭگەگە قامپايتىپتى. ال، بيىل جىل باسىنان بەرى 94 كىرمە تىركەلىپ، 1 جارىم ميلليون تەڭگە كولەمىندە سالىق تولەگەن.
«الماتى تەلەارناسى»
