قىزىلوردا وبلىسىندا بۇرىمدىلار بايقاۋى ءوتتى
بۇل سىنعا 13 پەن 18 جاس ارالىعىنداعى شاشى ەڭ ۇزىن وقۋشى قىزدار قاتىستى. بايقاۋعا قاتىسۋشىلاردىڭ ەڭ كىشىسى - 13 جاستاعى ارايلىم. بۇرىمدى سۇلۋدىڭ قولاڭ شاشىنا قايشى تيگىزبەي كۇتىپ-باپتاۋىنا ونىڭ اناسى سەبەپكەر بولعان. وتباسى ونەگەسى وسكەلەڭ جاستىڭ ناعىز قازاق ارۋلارىنا ءتان ادەپ پەن يبانى بويىنا جيىپ وسكەنى كورىنىپ تۇر.
ارايلىم امىربەك قىزى، بايقاۋ قاتىسۋشىسى: - بۇرىنعى قازاقتىڭ قىزدارى شاشتارىن ايرانمەن، ياعني تابيعي مايلارى بار شاشتىڭ ءوسۋىن جيىلەتسىن، قالىڭداتسىن دەگەن نيەتپەن شاشتارىن جۋعان دەيدى. سول سەبەپتى كەي كەزدەرى ايرانمەن، ايراننىڭ سارى سۋىمەن جۋعاندى جاقسى كورەمىن.
سۇلۋدىڭ سۇلۋى - بۇرىمدى قىز. بۇل - 17 نەمەرە سۇيگەن مەيرامگۇل ەرجانوۆانىڭ ومىرلىك ۇستانىمى. اق جاۋلىقتى اجە نەمەرەلەرىنىڭ شاشىن كۇتىپ-باپتاۋىن ءوزى ەرەكشە قاداعالايدى ەكەن. «شولپى تاعىپ، شاشپاۋ ىلگەن ارۋلار ۇلتىمىزدىڭ سىر-سىيپاتى دەپ ماقتان تۇتا بىلگەن ءجون»، - دەيدى كەيۋانا.
بۇل بايقاۋعا 13 پەن 18 جاس ارالىعىنداعى بۇرىمدىلار قاتىستى. سول سۇلۋلاردىڭ ىشىندە ەڭ ادەمى قولاڭ شاشىمەن كوزگە تۇسكەن ارايلىم امىربەك قىزى بولدى. ونىڭ شاشىنىڭ ۇزىندىعى 107, قالىڭدىعى 13 سانتيمەتر.
باقىت كانتايەۆا، قازىلار القاسىنىڭ مۇشەسى: - تال-شىبىقتاي ورىلگەن بۇرىمنىڭ ۇلتىمىزدىڭ ەڭ تاماشا ءساندى بايلىعى دەپ ەسەپتەيمىز. سوندىقتان بۇگىنگى بايقاۋعا قىزدارىمىزدىڭ جاقسى ۇلگى-ونەگەلەرى، ولاردى كۇتۋ جايىندا جاساعان ءىس-ارەكەتتەرى بىزگە ۇنادى. شاشپاۋى سىلدىر قاققان كەرىمدەر بايقاۋى قازاق ارۋلارىنىڭ تابيعاتىن اشىپ بەردى. ال ۇلكەندەر ۇزىن بۇرىم سۇلۋلاردىڭ كوركى عانا ەمەس، ادەپتىلىك پەن يناباتتىلىق سياقتى اسىل قاسيەتتەردىڭ ايناسى دەپ وسيەت ايتتى. راسىندا، قىزدارعا تەك اسەمدىك جاراسادى.
اۆتورلارى: نۇرلان جاقىپبەكوۆ، ءالحايدار تۇرلىحانوۆ
www.24.kz
