يليا يلين ۇلكەن سپورتپەن ءۇش جىلدان سوڭ قوشتاساتىندىعىن جەتكىزدى
قازىر ول انگليادا اعىلشىن ءتىلىن مەڭگەرىپ ءجۇر. كەزدەسۋ بارىسىندا قازاقستاننىڭ اتىن الەمگە پاش ەتكەن سپورتشى جەتكەن جەتىستىكتەرىنىڭ قىر-سىرىمەن جانە الداعى جوسپارلارىمەن ءبولىستى. ءتورت دۇركىن الەم چەمپيونى يليا يلين ەڭبەكقورلىعى، قاراپايىمدىلىعى ءارى ازىلقويلىعىمەن لوندونداعى UCL ۋنيۆەرسيتەتىنىڭ ستۋدەنتتەرىن تامساندىردى. جاستاردىڭ قىزىعۋشىلىعىن ارتتىراتىن مۇنداي قىزىق كەزدەسۋدىڭ ءبىلىم وشاعىندا ۇيىمداستىرىلماعانىنا ءبىراز بولعان ەكەن.
«مەن انگليادا ءبىلىم الىپ جاتقان قازاقستاندىق ستۋدەنتتەرمەن كەزدەسۋگە مۇمكىندىك تۋعانىنا قۋانىشتىمىن. وتانداستارىمنىڭ ساۋالدارىنا جاۋاپ بەرۋمەن قاتار، ولاردىڭ ءومىر تىنىسىمەن تانىستىم. ءبىزدىڭ ءبىر-بىرىمىزدەن ۇيرەنەرىمىز كوپ دەپ ويلايمىن»، - دەيدى ەكى دۇركىن وليمپيادا چەمپيونى يليا يلين.
Warwick ۋنيۆەرسيتەتىنىڭ ستۋدەنتى بولات ناسىعاسىنىڭ ايتۋىنشا، يليامەن كەزدەسۋ تەك ورىس تىلىندە وتكەن. سوعان قاراماستان، وعان بريتاندىقتار دا قاتىستى. ستۋدەنتتىك اۋىر اتلەتيكا كلۋبىنىڭ مۇشەلەرى الەم چەمپيونىمەن تىكەلەي جۇزدەسىپ، قولتاڭبا العاندارىنا ريزا.
«يليا يلين ءبىز ءۇشىن اتى اڭىزعا اينالعان سپورتشى. الەم چەمپيونىنىڭ قولىن الىپ، كوكەيىمىزدەگى ساۋالدارىمىزدى قويۋعا مۇمكىندىك العانىمىزعا قۋانىشتىمىز. ول بىزگە شەبەرلىك سىنىبىن وتكىزۋگە ۋادە بەردى. بۇل ءبىز ءۇشىن ۇلكەن مارتەبە»، - دەيدى قۋانىشىن جاسىرا الماعان اۋىر اتلەتيكا كلۋبىنىڭ مۇشەسى بەنەديكت ۋيليامس.
كەزدەسۋ بارىسىندا يليا يلين ۇلكەن سپورتپەن ءۇش جىلدان سوڭ قوشتاساتىندىعىن جەتكىزدى. سونداي-اق الداعى ۋاقىتتا جاتتىقتىرۋشى بولاتىندىعىن جانە قايىرىمدىلىق جوبالارىمەن اينالاساتىندىعىن اتاپ ءوتتى.
يليا تۇماندى البيوندا ءبىلىمىن جەتىلدىرگەن جالعىز قازاقستاندىق سپورتشى ەمەس. وعان دەيىن وليمپيادا چەمپيونى سەرىك ساپيەۆ اعىلشىن ءتىلى كۋرسىن وقىعان ەدى. ال بىرەر كۇندە تاپ وسى ماقساتپەن بىلعارى قولعاپ شەبەرى باحتيار ارتايەۆ انگلياعا بارماق. مۇنداعى قازاقستاندىق ستۋدەنتتەر باحتياردىڭ قۇرمەتىنە فۋتبولدان جارىس ۇيىمداستىرۋدى ويلاستىرۋدا، دەپ حابارلايدى 24.kz.
