ق ر پرەزيدەنتتىگىنە كانديدات ل. قويشيەۆا مەملەكەتتىك ءتىلدى ەركىن مەڭگەرگەن

و س ك باسپا ءسوز قىزمەتىنىڭ حابارلاۋىنشا، بولعان ەمتيحاننىڭ ناتيجەلەرى بويىنشا لينگۆيستيكالىق كوميسسيا اشىق داۋىس بەرۋ ارقىلى كوپشىلىك داۋىسپەن قازاقستان رەسپۋبليكاسىنىڭ پرەزيدەنتتىگىنە كانديدات ليمانا قويشيەۆانىڭ مەملەكەتتىك ءتىلدى ەركىن مەڭگەرگەنى تۋرالى شەشىم قابىلدادى.

قورىتىندى شەشىمدى جاريالاي وتىرىپ، قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ: «بۇگىن پرەزيدەنتتىككە كانديدات ليمانا قويشييەۆا مەملەكەتتىك ءتىلدى ەركىن مەڭگەرگەندىگىن انىقتاۋ راسىمىنەن ءوتتى.

ونىڭ تاپسىرمالارى مىناداي: «قازاق حالقىنىڭ رۋحاني قۇندىلىقتارى» دەگەن تاقىرىپتا شىعارما جازۋ، سودان كەيىن ابايدىڭ «قارا سوزدەرى» ادەبي ەڭبەگىنەن كوركەم ءماتىندى وقۋ جانە سوڭعى تاپسىرما - «الەم جانە بەيبىتشىلىك» دەگەن تاقىرىپتا ەركىن اڭگىمەلەسۋ بولدى. تاپسىرمالاردى كانديدات جاقسى دەڭگەيدە ورىندادى. ءبىز ليمانا قويشيەۆا مەملەكەتتىك ءتىلدى ەركىن مەڭگەرگەن دەگەن قورىتىندىعا كەلدىك» ، - دەپ اتاپ كورسەتتى.

شەشىم لينگۆيستيكالىق كوميسسيانىڭ 2015 - جىلعى 6 - ناۋرىزداعى № 4 حاتتاماسىمەن رەسىمدەلدى.

وتىرىسقا قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى ءلاززات سۇلەيمەن قاتىستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى