اقىن ادالبەك احماديدىڭ «قۇس ۇيقى» كىتابىنىڭ تۇساۋكەسەرى ءوتتى
فاكۋلتەتتىڭ دەكانى، فيلولوگيا عىلىمدارىنىڭ كانديداتى، دوتسەنت ساعاتبەك مەدەۋبەك ۇلى اقىنعا جىلى لەبىزىن ءبىلدىرىپ، كىتاپتىڭ تۇساۋىن كەستى.
«قۇس ۇيقى» - ادالبەكتىڭ جارىققا شىعىپ وتىرعان ءۇشىنشى كىتابى. جاڭا كىتاپ اقىننىڭ جەكە قاراجاتى ەسەبىنەن، مىڭ تارالىممەن جارىق كوردى. اتالمىش كىتاپتان شايىردىڭ ىشكى سىرى، جان تولقىنىسى، وتانعا، ومىرگە، جارعا دەگەن ماحابباتى، عۇمىردىڭ اشىسى مەن تۇشىسىنا دەگەن كوزقاراسى انىق اڭعارىلادى.
بىرەۋ بىلسە بىرەۋ بىلمەس، ادالبەكتىڭ اتاجۇرتقا ورالۋىنىڭ ءوزى ءبىر اڭىز. اقىننىڭ 1988 -جىلى ستۋدەنت كەزىندە جازعان «بابامنىڭ باسى» جىرى سول كەزدە-اق جۇرت نازارىنا ىلىكتى...
1996 - جىلى قازاقستانعا كەلگەن.
ول كەزىندە اقىننىڭ قۇرداسى، اقىن مارقۇم ءامىرحان بالقىبەك: «ادالبەكتىڭ تۇرعانى دا، جۇرگەنى دە ولەڭ. ولەڭگە جان دۇنيەسىمەن بەرىلگەن اڭىزى بار اقىن» دەگەن بولاتىن. ادەبيەتتە اركىمنىڭ ءوز سوقپاعى بولادى، ول جاعىنان ادالبەك ءوزىنىڭ جولىن، سارىنىن تاپقانى داۋسىز.
تۇساۋكەسەر كەشىندە ادالبەكتىڭ اڭىز اقىن ەكەنىنە باسا نازار اۋدارىلدى. اقىننىڭ ءوزى ءسوز العاندا: «جۋرناليستيكا فاكۋلتەتىنىڭ ۇستازدارى مەن ستۋدەنتتەرىنە وسىنداي يگى شارانى ۇيىمداستىرعانى ءۇشىن العىس ايتامىن. اقىنىن ارداقتاعان ەل باقىتتى. بۇگىن مەنىڭ دا باقىتتان باسىم اينالىپ وتىر. مەنى كىتاپ وقيتىن، جىرسۇيەر قاۋىمنىڭ بار ەكەنى قۋانتادى. بۇگىنگى تۇساۋى كەسىلگەن جاڭا كىتابىما سوڭعى كەزدەرى جازىلعان جىرلارىم توپتاستىرىلدى. سىزدەردىڭ كوڭىلدەرىڭىزدەن شىعىپ، قولدان قولعا ءوتىپ، جاقسى وقىلادى دەگەن سەنىمدەمىن» دەپ ريزاشىلىعىن ءبىلدىردى.
كەزدەسۋ بارىسىندا ادالبەك احمادي بولاشاق جۋرناليستەرگە ءوزى تۋرالى، ولەڭ تۋرالى جاقسى ەستەلىكتەر ايتىپ، ستۋدەنتتەردىڭ سۇراقتارىنا جاۋاپ بەردى. كەش سوڭىندا ەڭ جاقسى سۇراق قويعان شاكىرتتەرگە اقىننىڭ جاڭا كىتابى سىيعا تارتىلدى.
تۇساۋكەسەرگە اقىننىڭ ۇزەڭگىلەس دوستارى، قازاق قاۋىمىنا بەلگىلى قالامگەرلەر مۇرات شايماران، قويشىبەك مۇباراك، مۇراتحان شوقان قاتىسىپ، اقىن تۋرالى جىلى ەستەلىكتەرمەن ءبولىستى. تۇساۋكەسەردىڭ سوڭى اقىنداردىڭ جىر كەشىنە اينالىپ، ستۋدەنتتەر مارە- سارە بولىپ تارقاستى.
