قايرات نۇرتاس پەن ارمان داۋلەتياروۆ انالارعا ارناپ ءان شىرقاماق
مەرەكەلىك جوباعا ارنايى اندەر جازىلىپ، بۇرىن ساحناعا شىقپاعان وزگە سالا تۇلعالارى ءان سالادى.
باعدارلاماعا «قازاقستان بارىسى» اتانعان پالۋاندار مەن ولاردىڭ انالارى قاتىسادى، وسىلايشا، ۇلان رىسقۇل، بەيبىت ىستىبايەۆ پەن ايبەك نۇعىماروۆ ابزال جاندارعا ارناپ اننەن شاشۋ تارتادى. سپورتتاعى «جۇلدىزدى» قىزدار نازىم قىزايباي مەن جاينا شەكەربەكوۆا، بەلگىلى بوكسشى ادىلبەك نيازىمبەتوۆ تا انالارىمەن ستۋديا قوناعى بولادى.
سونىمەن قاتار «قارا شاڭىراق» تەلەحيكاياسىنداعى باستى اۋلەتتىڭ مۇشەلەرى، بەلگىلى قوعام قايراتكەرلەرى سۆەتلانا جالماعانبەتوۆا، ءبىرعانىم ءايتىموۆا، رەسەيدەگى «مۋز ت ۆ» ارناسىنىڭ ديرەكتورى، ماسكەۋدى مويىنداتقان قازاق ارمان داۋلەتياروۆ پەن اناسى ايمان اپا مەرەكەلىك دۋماننىڭ قادىرمەندى قوناقتارى اتانباق.
تاعى ءبىر جاڭالىق، بۇل كەشتە اق جاۋلىقتى انالارعا ارناپ ارمان داۋلەتياروۆ پەن قايرات نۇرتاستىڭ ورىنداۋىندا «اناشىم» انىنە جاڭا لەپ بەرىلىپ، ەرەكشە كوڭىل-كۇيمەن شىرقالادى. اسىل انالاردى مەرەكەلەرىمەن قازاقستاندىق تانىمال ءانشى باۋىرجان يسايەۆ تا قۇتتىقتايدى.
باعدارلاما 8- ناۋرىز كۇنى ساعات 18.05-تە «قازاقستان» تەلەارناسىندا كورەرمەنگە ۇسىنىلادى، «جۇلدىزداردىڭ» توعىسقان ءساتىن جىبەرىپ الماڭىز، دەپ حابارلايدى تەلەارنانىڭ باسپا ءسوز قىزمەتىنەن.
