قازاقستان مەن موناكو قىلمىستىق ىستەر بويىنشا ءوزارا قۇقىقتىق كومەك تۋرالى ۋاعدالاستى
كەزدەسۋ بارىسىندا قىلمىسقا، قىلمىستىق جولمەن تابىلعان قاراجاتتى جىلىستاتۋعا قارسى تۇرۋ سالاسىندا، زاڭدىلىق پەن قۇقىقتىق ءتارتىپتى، حالىقارالىق قاۋىپسىزدىكتى قامتاماسىز ەتۋ بويىنشا ەكىجاقتى ىنتىماقتاستىقتىڭ وزەكتى ماسەلەلەرى تالقىلاندى.
كەزدەسۋدىڭ ناتيجەسىندە قازاقستان رەسپۋبليكاسى مەن موناكو كنيازدىگى اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى مەملەكەتارالىق شارتقا قول قويىلدى.
شارت قازاقستان پرەزيدەنتىنىڭ موناكو كنيازى II البەرمەن 2012-جىلعى كەزدەسۋى بارىسىندا قابىلدانعان بىرلەسكەن مالىمدەمەنى جۇزەگە اسىرۋ ماقساتىندا جاسالدى، ونىڭ اياسىندا حالىقارالىق قاۋىپسىزدىكتى نىعايتۋ بويىنشا بىرلەسكەن جۇمىس تۋرالى ۋاعدالاستىققا قول جەتكىزىلگەن بولاتىن.
تاراپتار قول جەتكىزىلگەن كەلىسىمدەردىڭ ەكى مەملەكەتتىڭ قۇقىق قورعاۋ ورگاندارى اراسىنداعى ىنتىماقتاستىقتى نىعايتۋعا جانە قازاقستان مەن موناكو ازاماتتارىنىڭ كونستيتۋتسيالىق قۇقىقتارىن، زاڭدى مۇددەلەرىن قورعاۋعا زور ۇلەس قوسۋعا باعىتتالعانىن قاناعاتتانۋشىلىقپەن اتاپ ءوتتى.
قازاقستاننىڭ باستى قاداعالاۋشى ورگانىنىڭ جەتەكشىسى اتاپ وتكەندەي، ءبىزدىڭ ەل ءۇشىن بۇل ەۋروپالىق قاۋىمداستىققا جاقىنداسۋ جولىنداعى كەزەكتى جانە ماڭىزدى قادام بولىپ تابىلادى. موناكو كنيازدىگى قىلمىسقا قارسى كۇرەس سالاسىندا قازاقستانمەن حالىقارالىق شارت جاساسقان تاعى ءبىر ەۋروپالىق ەل بولدى. وسى وقيعا قازاقستاننىڭ قۇقىقتىق جۇيەسىنە دەگەن سەنىمنىڭ ارتۋى جانە ادام قۇقىقتارى مەن بوستاندىقتارىن قورعاۋ كەپىلدىگىن قامتاماسىز ەتۋ بويىنشا جالپىلاي تانىلعان حالىقارالىق ستاندارتتارعا ساي قۇقىقتىق تەتىكتەردىڭ ءبىزدىڭ ەلىمىزدە قالىپتاسۋىنىڭ ايقىن بەلگىسى بولىپ تابىلادى.
تاراپتار شارتتى جۇزەگە اسىرۋداعى كەلەسى قادامداردى تالقىلاپ، ترانس ۇلتتىق ۇيىمداسقان قىلمىستى ەسكەرتۋ جانە ونىڭ جولىن كەسۋ بويىنشا ۇيلەسىمدى ءىس-قيمىلدىڭ ماڭىزدىلىعىن اتاپ كورسەتتى.
