ەسكىرمەيتىن ديسنەيلىك ەرتەگى كورەرمەنگە قازاق تىلىندە جول تارتتى

بۇگىن استانادا كارتينانىڭ الدىن الا تانىستىرىلىمى بولدى. ال تولىق كورسەتىلىمى 6- ناۋرىزدان باستالادى. الەمدىك كلاسسيكانىڭ قاتارىنا ەنگەن «ديسنەيلىك» شىعارمانىڭ كوپتەگەن ەكراندالعان نۇسقالارى بار، سونىمەن قاتار بۇل وقيعا قانشاما مۋلتفيلمدەرگە دە ارقاۋ بولدى. 2015-جىلدىڭ «كۇلشە قىزىنا» جاساۋشىلار شامامەن 250 ميلليون دوللار جۇمساعان. لەنتانى تۇسىرۋگە تاجىريبەلى رەجيسسەر كەننەت براندت شاقىرىلعان.

فيلمدە نەگىزگى وقيعا جەلىسى كوپ وزگەرىسكە تۇسپەگەن، دەگەنمەن كينو ەرتەگىنىڭ كەيبىر تۇستارى زامانعا ساي بەيىمدەلگەن. اكەسى ولگەن سوڭ باستى رولدەگى ەللا ەسىمدى قىز (ليلي دجەيمس، «بەتى قايتقاندار») ءوزىنىڭ وگەي شەشەسى (كەيت بلانشەتت، «بەندجامين باتتوننىڭ جۇمباق ءومىرى») مەن ونىڭ ەكى اقىماق قىزىنىڭ كۇڭىنە اينالادى. ءبىراق كۇلشە قىز تاعدىردىڭ تەزىنە مويىمايدى، وعان قيىن ساتتەردە اناسىنىڭ «بەرىك بول جانە جاقسىلىققا سەن!» دەگەن اماناتى كۇش بەرەدى. ءدال وسى امانات وعان جولىنداعى بارلىق اۋىرلىقتى جەڭىپ شىعىپ، حانزادانىڭ (ريچارد مەددەن، «تاقتار ويىنى») جۇرەگىن جاۋلاۋعا كومەكتەسەدى.

ايتا كەتەيىك، «كۇلشە قىز» - كاسىبي تۇردە قازاقشاعا دۋبلياجدالعان ونىنشى مەرەيتويلىق گولليۆۋدتىق بلوكباستەر. الەمدىك كاسسالىق كارتينالاردى قازاقشا دۋبلياجداۋ يدەياسىن بىرنەشە جىل بويى «بولاشاق» قاۋىمداستىعى دەمەۋشىلەرمەن بىرگە ىسكە اسىرىپ كەلەدى. بۇعان دەيىن اندجەلينا دجولي تۇسكەن «مالەفيسەنتا»، دجونني دەپپ باستى ءرولدى سومداعان «جالعىز رەيندجەر»، ۋيلل سميتتىڭ قاتىسۋىمەن تۇسىرىلگەن «قارا كيىمدىلەر-3» جانە باسقا دا تۋىندىلار كوگىلدىر ەكرانعا شىققان. بۇل جولى دا «كۇلشە قىزدىڭ» قازاقشا «سويلەۋىنە» «نۇر وتان» پارتياسى، «بايتەرەك» حولدينگى جانە «مەلومان» كومپانياسى دەمەۋشىلىك ەتتى.

فيلمدەگى باستى كەيىپكەردىڭ داۋىسىن سومداعان شەحنازا قىزىحانوۆانىڭ ايتۋىنشا، بۇل جۇمىس وعان وتە قىزىقتى ءارى بولاشاعىنا ۇلكەن تاجىريبە بولدى. ول ت. جۇرگەنوۆ اتىنداعى ونەر اكادەمياسىنىڭ ءۇشىنشى كۋرس ستۋدەنتى جانە ول بۇل رولگە كاستينگ ارقىلى ءوتىپ، جوباعا تۇڭعىش رەت قاتىستى. كورسەتىلىمگە مەكتەپ وقۋشىلارى، بالالار ۇيلەرىنىڭ تاربيەلەنۋشىلەرى، قوعام قايراتكەرلەرى قاتىستى. سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك، «بايتەرەك» حولدينگى باسقارما ءتوراعاسى قۋاندىق بيشيمبايەۆ، بوكستان وليمپيادا چەمپيونى سەرىك ساپيەۆ جانە باسقا دا تانىمال تۇلعالار تاماشالادى.

اۆتور: ءابۋ-اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى