ايەلدەر وتباسىنىڭ عانا ۇيىتقىسى ەمەس، قوعامدىق ومىرگە دە بەلسەنە قاتىسۋشىلار - قاراعاندى وبلىسىنىڭ اكىمى - فوتو
كەزدەسۋگە ايەلدەر ىستەرى جانە وتباسىلىق- دەموگرافيالىق جونىندەگى وبلىستىق جانە وڭىرلىك كوميسسيالاردىڭ مۇشەلەرى، سوعىس جانە ەڭبەك ارداگەرلەرى، ونەركاسىپ جانە اۋىل شارۋاشىلىعى سەكتورلارىنىڭ وكىلدەرى، ۇكىمەتتىك ەمەس ۇيىمداردىڭ مۇشەلەرى، پەداگوگتار، دارىگەرلەر مەن كاسىپكەرلەر شاقىرىلدى، دەپ حابارلايدى وبلىس اكىمىنىڭ باسپا ءسوز قىزمەتى.
- ايەلدەردىڭ بۇگىنگى ۇرپاعى وتباسىنىڭ عانا ۇيىتقىسى ەمەس، قوعامدىق ومىرگە دە بەلسەنە قاتىسۋشىلار بولىپ تابىلادى. بۇل ەلىمىزدىڭ پرەزيدەنتى نۇرسۇلتان ءابىش ۇلى نازاربايەۆ اتاپ كورسەتكەندەي، مەملەكەتىمىزدىڭ دامۋىنا ايەلدەردىڭ قوسىپ جۇرگەن ۇلەسى ارتىپ كەلە جاتقانىنىڭ ايعاعى، - دەدى كەزدەسۋدى اشقان وبلىس اكىمى.
ءوڭىر باسشىسى كوپ بالالى انالارعا مەملەكەتتىك ناگرادالار - «التىن القا» جانە «كۇمىس القا» تاپسىردى. ءۇي شارۋاسىنداعى ايەل گۇلنار جۇماشيەۆا (جاڭاارقا اۋدانى)، دەنساۋلىق ساقتاۋ سالاسىنىڭ قىزمەتكەرى قارلىعاش سمايىلوۆا (قاراجال قالاسى)، ءبىلىم بەرۋ سالاسىنىڭ قىزمەتكەرى نۇرگۇل يمانبەكوۆا (اقتوعاي اۋدانى)، كاسىپكەر رۋزاليا احمەتوۆا (قاراعاندى قالاسى) جانە ءۇي شارۋاسىنداعى ايەل ليۋدميلا كوۆالەنكو (قاراعاندى قالاسى) وسىنداي ماراپاتتارعا يە بولدى.
سودان كەيىن ءوزارا اشىق پىكىر الماسۋ ءوتتى، ونىڭ بارىسىندا مەملەكەت باسشىسىنىڭ «نۇرلى جول - بولاشاققا جول» قازاقستان حالقىنا جولداۋىندا قويىلعان مىندەتتەردى ىسكە اسىرۋعا ايەلدەردىڭ قاتىسۋى تۋرالى ءسوز قوزعالدى.
13 بالانى تاربيەلەپ وسىرگەن، مەملەكەتتىك ناگرادا «التىن القا» يەگەرى، ەڭبەك ارداگەرى قايىنجامال ءامىرحانوۆا وتباسىلىق قۇندىلىقتار مەن داستۇرلەردى نىعايتۋداعى ايەلدەردىڭ ورنىنا توقتالدى.
«ەلپيدا» گرەك ەتنومادەني بىرلەستىگىنىڭ باسشىسى ولگا پوپاندوپۋلو ۇلتارالىق كەلىسىم، تاتۋلىق پەن تۇراقتىلىق بارلىق قازاقستاندىقتاردىڭ قىمبات قازىناسى بولىپ تابىلاتىنىن اتاپ كورسەتتى. شاحتينسك قالاسىنىڭ «تەنتەك» شاحتاسىنىڭ ماشينيسى ايتجان ابەنوۆا «ارسەلورميتتال تەمىرتاۋ» كومپانياسى كومىر دەپارتامەنتىنىڭ قاراعاندى وبلىسىن الەۋمەتتىك- ەكونوميكالىق دامىتۋعا قوسىپ وتىرعان ۇلەسى جايىندا ايتتى.
ءوڭىر باسشىسى كەزدەسۋگە قاتىسۋشىلاردىڭ بارلىعىن كەلە جاتقان مەرەيلى مەيرامدارىمەن قۇتتىقتادى.
- ەسەلى ەڭبەكتەرىڭىز ءۇشىن سىزدەرگە ۇلكەن راحمەت ايتقىم كەلەدى. سىزدەر وتباسى بەرەكەسىن كەلتىرۋمەن قاتار ءار سالادا جەمىستى قىزمەت اتقارىپ جۇرسىزدەر. بارشاڭىزعا اماندىق پەن تابىس تىلەيمىن، - دەدى كەزدەسۋ سوڭىندا نۇرمۇحامبەت ابدىبەكوۆ.
