دەۆيس كۋبوگى: قازاقستان مەن يتاليا كوماندالارى اراسىنداعى قارسىلاستار انىقتالدى - فوتو

ەستەرىڭىزگە سالايىق، بۇل جارىس وسى دەمالىس كۇندەرى قازاقستان مەن يتاليا كوماندالارى اراسىندا استاناداعى ۇلتتىق تەننيس ورتالىعىندا وتەدى.

«دەۆيس كۋبوگىنە 120 دان استام ەل قاتىسادى جانە ءبىز قازاقستان مەن يتاليا كوماندالارىنىڭ 1/8 ويىندارىنداعى كەزدەسۋىنە كورەرمەن بولۋىمىز كوپ نارسەنى اڭعارتادى. بىرىنشىدەن، بۇل ەلىمىزدە تەننيستىڭ قانداي دەڭگەيدە دامىپ كەلە جاتقانىن بىلدىرەدى، ويتكەنى ءبىز وسى سپورت ءتۇرىن دامىتۋدا كوپتەگەن جۇمىستار اتقارىپ جاتىرمىز. تاعى ءبىر ايتا كەتەتىنى، 1922-جىلدان بەرى دەۆيس كۋبوگىنە قاتىسىپ كەلە جاتقان يتاليا سياقتى ازۋلى كوماندانى ءوز جەرىمىزدە قارسى الۋ ءبىز ءۇشىن ۇلكەن ماقتانىش. مىقتىسى جەڭىسكە جەتسىن!» - دەپ اتاپ ءوتتى ق ر تەننيس فەدەراتسياسىنىڭ باس حاتشىسى ءادىل بورلىبايەۆ.

جەرەبە قورىتىندىسى بويىنشا كورتقا العاشقى بولىپ ميحايل كۋكۋشكين شىعادى. ول يتاليالىق سيمونە بولەليمەن شەبەرلىك سىناسادى. ءدال وسى كۇنى اندرەي گولۋبيەۆ تە اندرەاس سەپپيمەن وينايدى.

6- ناۋرىزدا اندرەي گولۋبيەۆ پەن فابيو فونيني، سوسىن الەكساندر نەدوۆەسوۆ پەن پاولو لورەنتستسي باق سىناسادى.

8- ناۋرىزدا ميحايل كۋكۋشكين مەن اندرەي گولۋبيەۆ يتاليالىق تەننيسشىلەر اندرەاس سەپپي جانە سيمونە بوللەليمەن جارىسقا تۇسەدى.

ايتا كەتەيىك، قازاقستاننىڭ ۇلتتىق ەرلەر كومانداسى بەس جىل قاتارىنان الەمدىك تەننيس ەليتاسىنىڭ قۇرامىنا ەنىپ، ۇزدىك وندىقتا تۇراقتاپ كەلەدى.

سوڭعى بەس جىل ىشىندە ەرلەر قۇراماسى تۋرنيردىڭ شيرەك فينالىنا 3 رەت شىقتى. بىلتىر دا شيرەك فينالعا جولداما الىپ، 3:2 ەسەبىمەن شۆەيتسارلىقتارعا جول بەردى. ولار ءوز كەزەگىندە دەۆيس كۋبوگىنىڭ جەڭىمپازدارى اتانعان بولاتىن. ال يتاليالىقتار جارتىلاي فينالدا شۆەيتساريا قۇراماسىنان ۇتىلدى.

قازاقستان دەۆيس كۋبوگىنە وسىمەن 19 رەت قاتىسقالى وتىر. الەمدىك توپتا - 5 جىل (2011 -جىلدان بەرى) قاتارىنان وسى دوداعا اتسالىسىپ كەلەدى.

ويىندار استاناداعى ۇلتتىق تەننيس ورتالىعىندا 6-8- ناۋرىز ارالىعىندا وتەدى.

اۆتور: ءابۋ-اسقار مەكەش ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى