قازاقستاندا تۇڭعىش رەت ناۋقاسقا مايىتتەن الىنعان بۇيرەك سالىندى
بۇيرەگى الماستىرىلعان جەتكىنشەك - قوستاناي قالاسىنىڭ تۇرعىنى. ول سوڭعى 6 جىلدان بەرى ورتالىقتىڭ نەفرولوگيا جانە دياليز بولىمشەسىندە «سوزىلمالى بۇيرەك جەتىسپەۋشىلىگى» دەگەن اۋرۋ بويىنشا تىركەلىپ كەلگەن. وعان 20- اقپاندا ستەپنوگورسك قالاسىنداعى ەمحانالاردىڭ بىرىندە قايتىس بولعان 29 جاستاعى ازامات دونور بولدى.
رەسپۋبليكالىق ترانسپلانتاتسيا ۇيلەستىرۋ ورتالىعى مۇشە ترانسپلانتاتسياسىن جاساۋعا شەشىم شىعاردى. «ۇلتتىق مەديتسينالىق حولدينگ» ا ق- نىڭ ءۇش ەنشىلەس ۇيىمى: «ۇلتتىق عىلىمي كارديوحيرۋرگيالىق ورتالىعى» ا ق، «ۇلتتىق ونكولوگيا جانە ترانسپلانتولوگيا عىلىمي ورتالىعى» اق مەن «انا مەن بالا ۇلتتىق عىلىمي ورتالىعى» ا ق ماماندارى ستەپنوگورسك قالاسىنا بارعاننان كەيىن بۇيرەكتى ەلورداعا جەتكىزگەن.
دارىگەرلەر وتا جاسالعاننان كەيىن بالانىڭ جاعدايى ءبىرقالىپتى ەكەنىن، ونىڭ ورتالىقتىڭ جانساقتاۋ بولىمىنەن «انا مەن بالا» ۇ ع و- نىڭ بۇيرەك ورتالىعىنا اۋىستىرىلعانىن جانە ناۋقاسقا ءتيىستى تەراپيا جاسالىپ جاتقانىن حابارلادى.
انا مەن بالا ۇلتتىق عىلىمي ورتالىعىندا جاسالعان كۇردەلى وپەراتسياعا ق ر دەنساۋلىق ساقتاۋ جانە الەۋمەتتىك دامۋ مينيسترلىگى مەن «ۇلتتىق مەديتسينالىق حولدينگ» ا ق قولداۋ ءبىلدىردى.
«2011-2015-جىلدارعا ارنالعان «سالاماتتى قازاقستان» مەملەكەتتىك باعدارلاماسىنىڭ نەگىزگى ماقساتى - ەلدىڭ ورنىقتى الەۋمەتتىك-دەموگرافيالىق دامۋىن قامتاماسىز ەتۋ ءۇشىن قازاقستان ازاماتتارىنىڭ دەنساۋلىعىن جاقسارتۋ. قازىرگى تاڭدا ەلىمىزدە اتالعان جوبانى جۇزەگە اسىرۋ ءۇشىن ءتۇرلى جۇمىستار اتقارىلىپ كەلەدى. سوڭعى ۋاقىتتا ەلىمىزدە وتاندىق ترانسپلانتولوگيا سالاسىن دامىتۋدا بەلسەندى جۇمىستار اتقارىلىپ كەلەدى. وعان دالەل رەتىندە جىل سايىن جاسالاتىن مۇشە ترانسپلانتاتسياسى كولەمىنىڭ ارتۋىن ايتۋعا بولادى»، - دەلىنگەن ورتالىقتىڭ باسپا ءسوز قىزمەتى تاراتقان حابارلامادا.
