پان گي مۋن ماۋسىم ايىندا قازاقستانعا كەلۋى مۇمكىن
سەنات سپيكەرى قاسىم-جومارت توقايەۆ ب ۇ ۇ باس حاتشىسىنا نۇرسۇلتان نازاربايەۆتىڭ فورۋم جۇمىسىنا قاتىسۋعا شاقىرۋ تۋرالى جەكە جولداۋىن تابىستاۋ ءۇشىن نيۋ-يوركقا ءىس ساپارمەن باردى.
«ءسىزدىڭ V سەزگە قاتىسۋىڭىز حالىقارالىق قوعامداستىققا ەگەر ءدىني يەرارحتار مەن ساياساتكەرلەر تاراپىنان كەلىسىمدى ارەكەتتەر مەن ءوزارا قولداۋ باردا ادامزات دامۋعا ارنالعان جاعدايلاردى ودان ءارى قامتاماسىز ەتە وتىرىپ، قازىرگى زامانعى جاھاندىق سىن-قاتەرلەرگە ءتيىمدى تۇردە قارسى تۇرا الادى دەگەندى ۇعىندىرار ەدى»، - دەدى توقايەۆ.
ب ۇ ۇ باس حاتشىسى ۇلتارالىق جانە كونفەسسيالىق بەيبىتشىلىك پەن كەلىسىمنىڭ قازاقستاندىق مودەلىن جوعارى باعالاپ، نۇرسۇلتان نازاربايەۆتىڭ باستاماسىمەن وتەتىن ءدىني فورۋمنىڭ ماڭىزدى ەكەنىن ءارى ديالوگتىڭ ءتيىمدى الاڭى ەكەنىن ايتتى. پان گي مۋننىڭ ايتۋىنشا، ب ۇ ۇ سەزدى قولدايتىن بولادى جانە الەمدىك قوعامداستىقتا ماقساتتار مەن تاپسىرمالاردى دامىتۋ ماقساتىندا قازاقستانمەن ارىپتەستىك جاسايدى.
سەنات سپيكەرى نيۋ-يوركتا ب ۇ ۇ باس حاتشىسىنىڭ ورىنباسارىمەن، ب ۇ ۇ باعدارلامالار دامۋىنىڭ اكىمشىسى حەلەن كلاركپەن، ۇيىمنىڭ جوعارى قىزمەتتەگى قىزمەتكەرلەرىمەن جانە ءىرى قورلاردىڭ جەتەكشىلەرىمەن كەزدەسۋلەر وتكىزدى.
الەمدىك جانە ءداستۇرلى دىندەر كوشباسشىلارى سەزىنىڭ حاتشىلار القاسىنىڭ جەتەكشىسى بولا وتىرىپ، توقايەۆ الدا بولاتىن شارا جايلى اقپارات بەردى. وسى جىلى رۋحاني فورۋمدا مىنا تاقىرىپتار تالقىلانادى: ءدىني جانە ساياسي كوشباسشىلاردىڭ ادامزات الدىنداعى جاۋاپكەرشىلىگى، ءدىننىڭ جاستارعا دەگەن اسەرى، ءدىن مەن ساياساتتىڭ ءوزارا ارەكەتتەستىگىندەگى تەندەنتسيالار مەن كەلەشەگى، الەمدىك كوشباسشىلار مەن ءداستۇرلى ءدىني كوشباسشىلارىنىڭ بەيبىتشىلىك، قاۋىپسىزدىك جانە ۇيلەسىمدىلىك ماقساتىنداعى ءوزارا قۇرمەت پەن تۇسىنىستىكتىڭ نەگىزىندەگى ديالوگى.
