گۇلشارات جۇبايەۆا: رەجيسسەر بولسام، اتامەكەنىنە ورالعان قازاقتار تۋرالى كينو تۇسىرەر ەدىم

اتىراۋ قالاسىنداعى م. وتەمىس ۇلى اتىنداعى وبلىستىق قازاق دراما تەاترىندا بالەتمەيستەر، الماتى قالاسىنداعى ع. مۇسىرەپوۆ اتىنداعى قازاق مەملەكەتتىك اكادەميالىق - بالالار مەن جاسوسپىرىمدەر تەاترىندا حورەوگراف، اكتريسا بولىپ قىزمەت اتقارعان.

2014-جىلى بىشكەك قالاسىنداعى ب. بەيشەناليەۆ اتىنداعى قىرعىز مەملەكەتتىك ونەر ينستيتۋتىن بىتىرگەن. تاەكۆوندودان سپورت شەبەرى. ق ر تۇڭعىش پرەزيدەنتى قورى سىيلىعىنىڭ يەگەرى.

- سۇحباتىمىزدى قانداي سۇراقتان باستايىن، گۇلشارات؟

-  ماعان ءبارىبىر. قالاۋىڭىز ءبىلسىن.

- ءسىزدى وسى ۋاقىتقا دەيىن مەزى قىلعان سۇراق قانداي دەپ سۇراعىم كەپ وتىر...

- «كەلىن»... مەن قازىر وسى فيلم توڭىرەگىندەگى سۇراقتارعا جاۋاپ بەرگىم دە كەلمەيدى. «وسى رولگە قالاي ءتۇستىڭىز، نە ءۇشىن ءتۇستىڭىز؟» دەگەن سۇراقتار مەنى ابدەن مەزى ەتتى. مەنىڭ بارلىق ارتىستىك قابىلەتىمدى سول «كەلىنمەن» ولشەيدى. فيلم تۇسىرىلگەلى 8 جىل ءوتتى، ءالى كۇنگە دەيىن قۇلاعىما تىنىشتىق جوق.

- «مەنەن جۋرناليستەر وسى جونىندە سۇراسا ەكەن» دەيتىن ماسەلەلەرىڭىز بار ما؟

-  تەك قانا «كەلىنگە» ءتۇسىپ، ودان كەيىن شىعارماشىلىعىم توقتاپ قالعان جوق. «ءسىز كىمسىز، كا مىرزا؟»، «اكە سەرتى»، «م- اگەنت»، «قاراشاڭىراق» بار. ءبىراق، ءسىزدىڭ ارىپتەستەرىڭىز ولاردى ەلەپ-ەسكەرمەيدى، اينالىپ كەلىپ، «كەلىندى» ايتا بەرەدى... مەنىڭ ءبىر تۇسىنبەيتىنىم، وسى تاقىرىپتى قايتا-قايتا كوتەرە بەرۋدىڭ كەرەگى نە؟ بۇل -  مەنىڭ كينو الەمىندەگى العاشقى قادامىم. ول ءۇشىن مەنى جەكسۇرىن ەتىپ كورسەتۋدىڭ قاجەتى جوق. بۇل - «قازاق فيلم» مەملەكەتتىك دارەجەدە تۇسىرگەن فيلم. ماعان ول فيلمگە ءتۇسۋ وڭاي بولعان جوق. ىشتەي كوپ ارپالىسىپ بارىپ شەشىم قابىلدادىم.

الماتىعا ءبارىن تاستاپ كەلدىم. ءوز ماماندىعىم بويىنشا زاڭگەر دە بولعانىم جوق، جۇرەگىم ونەردى قالادى. مەنىڭ مۇنداي مۇمكىندىكتى جىبەرۋگە حاقىم جوق ەدى.

ونەردەگى العاشقى قادامىمنىڭ وسىلاي باستالعانى وكىنىشتى، ارينە. سول كەزدە «وسىنداي رولگە العاشقى جانە سوڭعى رەت ءتۇسىپ تۇرمىن» دەپ ايتقانمىن. فيلمنىڭ ورتاسىنا كەلگەندە جىلاپ، ارى قاراي تۇسكىم دە كەلمەدى. كينوعا تۇسەردە مەنى قانشاما اعالار «بۇل - قازاق ونەرى. كينو مەملەكەتتىڭ قارجىسىنا تۇسىرىلگەلى وتىر. وسى فيلم ءۇشىن قانشاما ادام جۇمىس ىستەپ جاتىر. موينىڭا جۇكتەلگەن مىندەتتى اياعىنا دەيىن جەتكىز!» دەپ كوندىردى. جان-جاعىمداعى ارتىستەر دە، رەجيسسەر ەرمەك تۇرسىنوۆ تا ماعان قولداۋ كورسەتتى. ماسەلەنىڭ باس-اياعىندا بولماعان كىسىلەر قازىر عالامتوردا مەن تۋرالى «ول قىز باسقا ەلدەن كەلگەن» دەپ جاعىمسىز پىكىرلەر جازىپ جاتىر ەكەن. ءيا، مەن ورالمانمىن، ونى جاسىرعان دا ەمەسپىن، جاسىرمايمىن دا.

- ءسوزىڭىز اۋزىڭىزدا، ءسىزدى ءبىر سايتتا رەسەيدىڭ كراسنودار ايماعىندا دۇنيەگە كەلگەن دەپ جازىپتى. سول راس پا؟

- ول جاقتا ءبىز ازعانتاي ۋاقىت تۇردىق. قازىر وندا مەنىڭ تۋىستارىم تۇرادى. ءوزىم وزبەكستاندا تۋىپ-وسكەنمىن. 2001-جىلى وتباسىمىزبەن اتىراۋعا كوشىپ كەلدىك. اتا-انام مەنىڭ ونەر ادامى بولعانىمدى قالامادى. سول كىسىلەردىڭ اقىلىمەن زاڭگەر ماماندىعىن الدىم. ءبىراق، ءبارىبىر مۋزىكالىق ۋچيليشەدە العان بىلىمىممەن اتىراۋ قالاسىنداعى م. وتەمىس ۇلى اتىنداعى وبلىستىق دراما تەاترىنا ءبيشى بولىپ ورنالاستىم. سوندا جۇمىس ىستەپ جۇرگەنىمدە، رەجيسسەر تالعات تەمەنوۆ مەنى بايقاپ قالىپ، الماتىعا شاقىردى. وسىلايشا، مەنىڭ الماتىداعى ءومىرىم باستالدى.

- ءسىزدىڭ ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا حورەوگرافتىڭ اسسيستەنتى بولىپ جۇمىس ىستەگەنىڭىزدەن حاباردارمىز. ال قويىلىمداردا قانداي رولدەرىڭىز بولدى؟

- تەاترداعى رولدەرىم ماعان كينوعا تۇسكەننەن كەيىن بەرىلە باستادى. وعان دەيىن حورەوگراف، پەداگوگ بولىپ قىزمەت اتقاردىم. كەرەمەت اكتريسا بولدىم دەپ ايتپايمىن. «بۇلبۇلدار تۇنىندە» كىشى سەرجانتتىڭ، «تۇنشىققان سەزىمدە» ءنازيدىڭ ءرولىن سومدادىم. ءبىراق، مەنىڭ كاسىبي ءبىلىمىم بولعان جوق. قازاقتا «شىمشىق سويسا دا، قاساپشى سويسىن!» دەگەن ءسوز بار. مەن ءارتىسپىن دەپ ساحنانى بوساتپاي، كەز كەلگەن رولگە ۇرىنا بەرگەندى ءجون سانامادىم. كاسىبي ءبىلىم العاننىڭ ءجونى بولەك ەكەن.

- اكتەرلىك ماماندىقتى وقىپ العىڭىز كەلمەي مە؟

- تەاتردا جۇرگەندە ت. جۇرگەنوۆ اتىنداعى قازاق ۇلتتىق ونەر اكادەمياسىنا تۇسكەن ەدىم. سول كەزدە تۇرمىسقا شىقتىم، اقىلى بولىمدە وقىدىم. وسى سەبەپپەن وقۋىمدى بىشكەككە اۋىستىرىپ، سول جاقتان ءبىتىرىپ شىقتىم. ماماندىعىم - كينو جانە تەليەۆيزيا سالاسىنىڭ پروديۋسەرى.

- ەركىن راقىشەۆتىڭ «م- اگەنت» اتتى فيلمىنە ءتۇستىڭىز. ول كىسىمەن بىرگە جۇمىس ىستەگەن قالاي ەكەن؟

- ەركىن راقىشەۆ - بولمىسى قازاقى رەجيسسەر. فيلمدەرىن قولجەتىمدى باعامەن تۇسىرەدى. جالپى، ءاربىر اكتريسا ءارتۇرلى رەجيسسەرمەن جۇمىس ىستەپ كورگىسى كەلەدى. ەركىن اعادان كوپ نارسە ۇيرەندىم.

- بۇل رەجيسسەردى كەي ماماندار «اۋەسقوي» دەپ تە سىناپ جاتادى...

- ەركىن اعا اۋەسقوي رەجيسسەر بولسا دا، حالىققا نە كەرەك ەكەنىن جاقسى تۇسىنەدى. ونىڭ كوزقاراسى كاسىبي رەجيسسەرلەردىڭ كوزقاراسىنان بولەكتەۋ. ارتىستەرگە ەركىندىك بەرەدى. اۋەسقوي، كاسىپقوي دەپ بولە بەرۋدىڭ قاجەتى شامالى دەپ ويلايمىن. ىزدەنىپ جۇرگەن ازاماتقا قولداۋ كورسەتۋ كەرەك.

- «م- اگەنتتە» ەلەستىڭ ءرولىن وينادىڭىز. الماتىعا العاش كەلگەنىڭىزدە، ءسىزدى تانىستارىڭىزدىڭ «زۆونوك» دەپ اتاعانى راس پا؟

- ءيا، ول راس. تەاترداعى ارىپتەستەرىم دە كوپ ايتاتىن. مەنى جاپوندىق فيلمنىڭ قورقىنىشتى كەيىپكەرىنە ۇقساتسا كەرەك.

- ءوزىڭىزدى «ءسىز كىمسىز، كا مىرزادا؟» توبەلەسكىش قىزدىڭ وبرازىندا كوردىك. «م- اگەنتتەگى»، «كەلىندەگى» جانە تەلەسەريالدارداعى رولدەرىڭىز ءبىر-بىرىنە ۇقسامايدى، ءوزىڭىزدى ءارتۇرلى قىرىنان كورگىڭىز كەلەتىندىگى بايقالادى. قاي وبراز جانىڭىزعا جاقىن؟

- ماعان ەڭ جاقىن وبراز - «اكە سەرتىندەگى» شىناردىڭ وبرازى. درامالىق رولدەردى جاقسى كورەمىن. رولدەرىمدى ءبىر-بىرىنە ۇقساتپاۋعا تىرىسامىن. بۇل ەرەكشەلىگىمدى ءسىز عانا ايتىپ وتىرسىز. جۋرناليستەر ماعان كەلگەن كەزدە تەك قانا «كەلىندى» ايتادى (كۇلدى).

بولاتىن ءىس بولدى، كينو جارىققا شىقتى. ودان كەيىن دە مەنى جالاڭاشتاناتىن ساحنالارى بار ءبىرتالاي فيلمگە شاقىردى. مەن ءۇزىلدى-كەسىلدى قارسى بولدىم. «ءبىر رەت سونداي فيلمگە ءتۇستى، دەمەك، بارىنە تۇسە بەرەدى ەكەن» دەپ ويلاعان بولار.

- «كاراۆان» گازەتىنە بەرگەن «يا نە حوچۋ بىت پوستەلنوي اكتريسوي» دەگەن سۇحباتىڭىزدى وقىعان ەدىم.

-  ءيا، وسى ءسوزدى مەن بارلىق جەردە ايتىپ ءجۇرمىن. ءبىر قىنجىلتاتىنى، كينوعا تۇسكەن كەزدە مەنى «قازاق ونەرى ءۇشىن قۇرباندىققا بار!» دەپ اقىل ايتقان ونەردەگى اعالارىمنىڭ بىردە-بىرەۋى كەيىن باسۋ ايتا المادى، اراشا تۇسپەدى.

تويلارعا بارىپ، ءان ايتىپ، ءبي بيلەر الدىندا مەنى «كەلىن» فيلمىنە تۇسكەن اكتريسا» دەپ ورتاعا شاقىرادى. جۋرناليستەر ۇيگە كەلىپ، اتا-ەنەمدى، بالا-شاعامدى ءتۇسىرىپ كەتەدى. «كەلىن» تۋرالى ايتپاڭىزدارشى» دەپ قانشا وتىنسەم دە، فيلمدەگى تۋرا جالاڭاشتاناتىن تۇستى كورسەتىپ، وزدەرىنە رەيتينگ جاسايدى. نەگە «قاراشاڭىراقتان» نەمەسە «اكە سەرتىنەن» ءۇزىندى المايدى؟ بولماسا، مەنى نەگە جاي عانا اكتريسا دەپ ايتا سالمايدى؟ وتباسىمىزبەن بىرگە باعدارلامانى كورەمىز دەپ تەلەديدار الدىنا جينالامىز. ال، كورەتىنىمىز رەيتينگ قۋعان ارزان حابار بوپ شىعادى.

- «كەلىندى» كەز كەلگەن جەرگە جاپسىرا بەرمەڭدەر!» دەپ نەگە الدىن-الا ەسكەرتۋ جاسامايسىز؟

- ايتىپ ءجۇرمىن، ءبىراق، مەنى تىڭداپ جاتقان ەشكىم جوق!

- سيۋجەتتەردى قاراسام، اتا-ەنەڭىز ءسىزدىڭ ونەرىڭىزگە قۇرمەتپەن، تۇسىنىستىكپەن قارايتىن سەكىلدى. قايىن اتاڭىزدىڭ ءسىزدى «اق بۇلتتان جاساپ العان قىزىم» دەپ ەركەلەتەتىنى راس پا؟

- ول راس. اتا-ەنەمە ريزامىن. ول كىسىلەر مەنى ۇنەمى قولداپ وتىرادى.

-  ءسىز ساحنالىق كوستيۋمدەر تىگەسىز، الەۋمەتتىك جەلىدە ءوزىڭىز ازىرلەگەن تاعامداردىڭ مازىرىمەن بولىسەسىز، پروديۋسەرلىك ورتالىعىڭىز دا بار. وزىڭىزگە وسى ارەكەتتىڭ بارلىعى سىنعا ۇشىراعان ءرولىڭىزدى اقتاپ الۋ سەكىلدى كورىنبەي مە؟

- جوق، بۇل اقتالۋ ەمەس. بۇل - مەنىڭ جاقسى كورەتىن ءىسىم.

- الەۋمەتتىك جەلىلەردىڭ بەلسەندى قولدانۋشىسىز. ءسىزدىڭ ءومىرىڭىز حالىقتىڭ كوز الدىندا ءوتىپ جاتىر. كەيبىر ارتىستەر سۇحباتتان قاشادى. ولاردىڭ عالامتوردا جەكە اككاۋنتتارى جوق، سوندىقتان بولار، قۇلاعى دا تىنىش. وسىنداي قۇپيالىلىققا قالاي قارايسىز؟ ءسىزدىڭ تاراپىڭىزعا ايتىلىپ جاتقان نەگاتيۆ پىكىرلەردى، بالكىم، ازىراق وقىپ-بىلەر مە ەدىڭىز دەگەنىم عوي...

- جولداسىم كەيدە ماعان وسى ماسەلە بويىنشا ەسكەرتۋ جاسايدى. سوڭعى كەزدە ءبىزدىڭ ۇيدە كۇندە ءتۇسىرىلىم بولىپ كەتتى. بالا-شاعاممەن، اتا-ەنەممەن بىرگە تۇراتىن قازاقتىڭ قاراپايىم كەلىندەرىنىڭ ءبىرىمىن، ءبىر ازاماتتىڭ نەكەلى جارىمىن. حالىق مەنىڭ شىنايى ومىردە قانداي ادام ەكەنىمدى، قازىرگى تۇرمىسىمدى كورسىن. ونىڭ نە قۇپياسى بار؟

- «فەيسبۋك» الەۋمەتتىك جەلىسىندە بەيتانىس كىسىلەردىڭ سىزدەن وزدەرىنە ۇشاققا بيلەت ساتىپ اپەرۋىن وتىنگەنىن جازعان ەدىڭىز.

- حالىق ءبىزدى وتە اۋقاتتى تۇرادى دەپ ويلايدى (كۇلدى). جولداسىم ەكەۋمىز العاش وتباسىن قۇرعان كەزدە پاتەر جالداپ تۇردىق. پاتەردەن پاتەرگە كوشىپ جۇرگەن كەزدە «وسى ۇيدە ۇزاق ايالداي تۇرساق ەكەن» دەپ ارماندايتىنمىن. بەس جىل ىشىندە جەر الىپ، ءۇي سالىپ، اتا-ەنەمىزدى الماتىعا كوشىرىپ اكەلدىك.

- ءبىر سۇحباتىڭىزدا «مەنى شەتەلدىكتەر توبەلەسكىش قىزدىڭ رولىنە كوپ شاقىرادى. فيلمگە تۇسۋگە مەنىڭ ءتىل بىلمەگەنىم كەدەرگى بولىپ وتىر» دەپ ايتىپسىز. جالعىز كەدەرگى سول بولسا، دۋبلياج بار ەمەس پە؟

- ارينە. ءبىراق، ودان باسقا دا ماسەلەلەر بار. كەلىسىم بەرەيىن دەسەم، ول فيلمدەر ءبىزدىڭ ەلدە تۇسىرىلمەيدى. ال، مەن 3-4 ايلاپ وتباسىممەن بىرگە ارى-بەرى جۇرە المايمىن. مەن ءۇشىن وتباسىمنىڭ بەرىكتىگى ماڭىزدىراق.

- ءسىز رەجيسسەردىڭ اكتريساسىسىز با؟

- ارتىستەر ءوزىنىڭ ويىنداعى دۇنيەسىن رولىنە قوسقىسى كەلەدى، ول - زاڭدىلىق. ءبىراق، رەجيسسەر ءبارىبىر ءوزىنىڭ دەگەنىن ىستەتەدى. ءوز تۋىندىسى بولعاندىقتان، ول كەيىپكەرىن كوبىرەك تانيدى. سوندىقتان، رەجيسسەردىڭ ايتقانىنان شىقپاۋ كەرەك دەپ ويلايمىن.

- جاقىندا ءسىزدىڭ «ءومىردى سۇيگەندەرگە» دەگەن العاشقى ءانىڭىز جارىق كوردى. ساحناعا ءان ايتىپ شىعۋىڭىزعا نە سەبەپ بولدى؟

- بۇعان دەيىن دە ءان ايتىپ جۇرگەنمىن. ال، «ءومىردى سۇيگەندەرگە» مەنىڭ العاشقى اۆتورلىق ءانىم دەسەم بولادى. ءسوزىن رينات زايىتوۆ، ءانىن ۇلىقپان جولداسوۆ جازدى. ءبىراز ۋاقىت «ءان ايتسام قالاي بولادى؟» دەپ ويلانىپ ءجۇردىم. ءبىر كۇنى لاكي كەسوگلۋ اعامىزبەن اقىلداستىم. ول كىسى ەلىمىزدەگى ەڭ مىقتى دەگەن ۆوكاليستەردىڭ ءبىرى عوي، داۋسىمدى قويدى، ۇزاق دايىندالدىق. ەكى جىل دايىندىقتان سوڭ، لاكي كونستانتينوۆيچتىڭ رۇقساتىمەن وسى ءانىمدى جازدىردىم. مەن كۇندە ءان جازدىرىپ، بەينەبايان ءتۇسىرىپ، انشىلىك جولدى قۋام دەمەيمىن. حالىق ءوز باعاسىن بەرە جاتار. قابىلداسا، قابىلدايدى، بولماسا، رەنجىمەيمىن. باستىسى، مەن جۇرەگىمە جاقىن دۇنيەنى جارىققا شىعارعىم كەلدى.

- ءانشى، ءبيشى، تىگىنشى، اكتريسا... ءسىز ءوزىڭىزدى كىم رەتىندە كورەسىز؟

- اكتريسا! كاستينگتەرگە ءجيى بارامىن. وتپەي قالىپ جاتقان سىناقتارىم دا بار. فيلمگە تۇسۋگە شاقىرتۋ تۇسسە، جولداسىم ەكەۋمىز اقىلداسامىز. ول فيلمنىڭ سەناريىن باستان-اياق وقىپ شىعادى، پروديۋسەرلەرمەن ءوزى سويلەسەدى. قازىر جولداسىم دا كينوعا ءتۇسىپ ءجۇر (كۇلدى). قايبىر جىلى ءبىر باعدارلامادا مەن تۋرالى «ول قىزدىڭ «كەلىننەن» كەيىنگى تاعدىرى قيىن بولدى، كۇيەۋىمەن اجىراسىپ كەتتى» دەگەن جالعان اقپار ايتىلىپتى. مۇنى كورگەن ەنەم «حالىق كورسىن» دەپ، جولداسىم ەكەۋمىزگە ءبىر فيلمدە قاتار تۇسۋگە ۇسىنىس جاسادى. ول كەزدە مەن ەمىزۋلى بالاممەن ۇيدە وتىرعان ەدىم. وسىلايشا، كۇيەۋىم ەكەۋمىز «اكە سەرتىندە» بىرگە وينادىق.

-  وتكەن جازدا بەرگەن ءبىر سۇحباتىڭىزدا «قازىرگە دەيىن 400 دەي ساحنالىق كوستيۋم تىكتىم» دەگەن ەكەنسىز. الۋان-الۋان پەردەلەر، جاپقىشتار تىگەتىندىگىڭىزدەن دە حاباردارمىن. تاپسىرىس قابىلدايسىز با؟

- ءيا. بۇيىرسا، جاقىن ارادا تاپسىرىسپەن ۇلتتىق ويۋ-ورنەكتى جاپقىشتار شىعارا باستايمىن. وسى جىلى ۇلكەن ءبىر سەح سالساق دەپ جوسپارلاپ وتىرمىز. ءبىر-ەكى ايدان كەيىن ساحنالىق ەتىك، تۋفليلەر شىعارا باستايمىز. الدىمەن، قۇرال-جابدىقتارىن تۇگەندەپ الۋىمىز قاجەت. كيىمدەردى قازاقى ۇلتتىق ناقىشپەن، حالىققا قولجەتىمدى باعادا تىككىم كەلەدى. قازىر وسى باعىتتا ىزدەنىپ ءجۇرمىن. شۇكىر، بەتالىسىمىز جامان ەمەس سياقتى.

- «شابىت» ورتالىعىنىڭ جۇمىسىمەن قىسقاشا تانىستىرىپ وتسەڭىز.

- العاشىندا بۇل ورتالىقتا 2 قىزمەتكەر بار ەدى. جارتى جىلداي جارناما ءۇشىن تەگىن جۇمىس ىستەدىك. قازىر ۇجىمدا 50 ادام بار. تويلاردا قازاقتىڭ سالت-ءداستۇر، ءجون-جورالعىسىن (ۇيلەنۋ تويى، بەتاشار، قىز ۇزاتۋ، سىڭسۋ، مەرەيتوي، سۇندەت توي، بەسىك توي، تۇساۋكەسەر راسىمىنە تەاترلاندىرىلعان ساحنالىق كورىنىستەر) جاسايمىز. تويحانالاردى ساندەيمىز، تويباستاردان باستاپ، قىزدىڭ جاساۋىنا دەيىن تىگەمىز. ءانشى، ءبيشى، انيماتور، اسابالارىمىز بار.

- وسىنداي قوسىمشا جۇمىستار ءسىزدىڭ ونەرىڭىزگە كەدەرگىسىن كەلتىرەدى دەپ ويلامايسىز با؟

- شامام جەتكەنشە بارلىعىنا ۇلگەرۋگە تىرىسىپ ءجۇرمىن. مەن قول قۋسىرىپ وتىرا المايتىن تىنىمسىز اداممىن. ۇنەمى قايناعان تىرشىلىكتىڭ ورتاسىندا جۇرگەن ۇنايدى.

-  قانداي كەيىپكەرىڭىزدى كۇتىپ ءجۇرسىز؟

- تاماشا ءبىر درامالىق كەيىپكەرىمدى كۇتىپ جۇرگەن جايىم بار. اۋىر، پسيحولوگيالىق ءرول بولسا، ءتىپتى قاتىپ كەتەر ەدى. ەگەر، مەن رەجيسسەر بولسام، اتامەكەنىنە ورالعان قازاقتار تۋرالى ءبىر كينو تۇسىرەر ەدىم. ءار وتباسىنىڭ وتانىنا ورالۋ تاريحى ءارقيلى. ولاردىڭ اتامەكەنگە ورالعانداعى العاشقى اسەرى، كورگەن قۋانىشى مەن قيىنشىلىعى، وسىنداعى ورتاعا ءسىڭىسۋى تۋرالى ءبىر فيلم بولسا دەيمىن. كەيبىر قانداستارىمىز ەلىمىزدى جەرسىنبەي، قايتادان كەلگەن جاعىنا كەتىپ قالدى. وسىندا ءوز كاسىبىن اشىپ، ءوسىپ-وركەندەگەن باۋىرلارىمىز دا بار. سولاردىڭ تاعدىرىن فيلم ارقىلى كورسەتكىسى كەلەتىن رەجيسسەرلەر بولسا، اتامەكەنگە ورالعان قازاقتىڭ ءبىر قىزى رەتىندە ءوز يدەيامدى قوسار ەدىم. جاقسى تاقىرىپ ەمەس پە؟ مەنىڭشە، حالىقتىڭ جانىنا جاقىن فيلم بولاتىن سياقتى.

- اڭگىمەڭىزگە راحمەت!

اڭگىمەلەسكەن روزا ارەن
«اينالايىن سايىتى»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى