بالكونعا ىلىنگەن تۋ: استانالىققا ايىپپۇل سالعان پوليتسەي جازاعا تارتىلادى
«زاڭ بۇزۋشىلىققا جول بەرگەنى ءۇشىن پوليتسيانىڭ ۋچاسكەلىك ينسپەكتورى پەرنەشيەۆتىڭ ۇستىنەن تارتىپتىك ءوندىرىس قوزعالدى، تارتىپتىك ءوندىرىس استانا قالاسىنىڭ ەسىل اۋداندىق ىشكى ىستەر باسقارماسىندا قارالىپ جاتىر»، - دەدى دەپارتامەنت باسشىسى قانات سەيدعاپباروۆ.
باس پروكۋراتۋرا وكىلدەرىنىڭ مالىمەتىنشە، مەملەكەتتىك رامىزدەردى زاڭسىز قولدانعانى ءۇشىن جاندوس قۇرمانبايەۆقا ق ر ق ك 458-بابىنىڭ 1-بولىگى بويىنشا ايىپپۇل سالۋ تۋرالى اكىمشىلىك ءوندىرىس ماتەريالدارى قاداعالاۋ تارتىبىندە قارالدى.
«اكىمشىلىك ءىس ماتەريالدارىندا كودەكستىڭ 802-بابىنىڭ 2-بولىگىندەگى زاڭدى بۇزۋ تۋرالى جەتكىلىكتى مالىمەت تابىلمادى. وسىعان بايلانىستى 2015-جىلدىڭ 2- ناۋرىزىندا قۇرمانبايەۆقا قاتىستى اكىمشىلىك قۇقىق بۇزۋشىلىق ءىسى بويىنشا زاڭسىز حاتتاما مەن قاۋلىعا استانانىڭ ەسىل اۋداندىق پروكۋراتۋراسى قارسىلىق كەلتىردى»، - دەدى پروكۋراتۋرا وكىلدەرى.
قاراستىرۋ قورىتىندىسى بويىنشا قارسىلىق تولىقتاي قاناعاتتاندىرىلدى، استانانىڭ ەسىل اۋداندىق ىشكى ىستەر باسقارماسى 2015-جىلدىڭ 28- اقپانداعى زاڭسىز حاتتاما مەن قاۋلىنىڭ كۇشىن جويدى.
ەسكە سالايىق، 28- اقپان كۇنى جاندوس قۇرمانبايەۆقا بالكونعا ق ر مەملەكەتتىك تۋىن ىلگەنى ءۇشىن 396400 تەڭگە ايىپپۇل سالىنعان ەدى. ول قازاقستان تۋىن ءۇش جىل بۇرىن دۇكەننەن 30 مىڭ تەڭگەگە ساتىپ العانىن ايتتى. «مەن ءوز ۇلتشىلدىعىمدى ءبىلدىرۋى ءۇشىن ءاربىر قازاقستاندىقتا تۋ بولۋى كەرەك دەپ ەسەپتەدىم. مىسالعا، وليمپيادا نەمەسە چەمپيوناتتار كەزىندە قازاقستاندىقتار جەڭىپ جاتسا، مەن قۋانىشىمدى ءبىلدىرۋ ءۇشىن بالكونعا تۋدى ىلەمىن. وسىلاي ءۇش رەت ىستەدىم - ازيادا كەزىندە، وليمپيادا كەزىندە جانە بۇل جولى گەننادي گولوۆكيننىڭ جەڭىسىنەن سوڭ»، - دەدى قۇرمانبايەۆ. ول ايىپپۇلعا قارسىلىق كەلتىرەتىنىن مالىمدەدى.
زاڭگەر ميحايل كلەنچين استانا تۇرعىنىنا ايىپپۇلدىڭ زاڭسىز سالىنعانىن ايتتى. «زاڭگەر رەتىندە پوليتسەيلەردىڭ ونى قانداي دا ءبىر ستاندارتتار مەن تالاپتاردى بۇزعانى ءۇشىن ەمەس، تۋدى ءىلدى دەگەن دەرەك ءۇشىن ايىپۇل سالىپ وتىرعانى مەنى تاڭعالدىردى»، - دەدى كلەنچين.
