تۇركى حالىقتارىنىڭ رۋحاني مۇرالارىن الەمدىك دەڭگەيدە ناسيحاتتايتىن ۋاقىت جەتتى - ع. مۇتانوۆ
بۇل تۋرالى بۇگىن الماتىدا تۇركسوي حالىقارالىق ۇيىمى كافەدراسىنىڭ اشىلۋ ءراسىمى بارىسىندا ءال- فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىم مۇتانوۆ ءمالىم ەتتى.
ونىڭ ايتۋىنشا، بۇل ءۇشىن تۇركى حالىقتارىنىڭ ءتىلىن، ادەبيەتىن جانە مۋزىكالىق مادەنيەتىن زەرتتەيتىن ءتۇرلى عىلىمي- زەرتتەۋ ورتالىقتارى بىرلەسە ارەكەت جاساۋلارى كەرەك.
«تۇركى حالىقتارىنىڭ مادەنيەتى تالاي تاريحي ۇدەرىستەردى باستان كەشكەن كونە جانە باي مادەنيەت. ەۋرازيا ورتالىعىنىڭ دالالىق ايماقتارىندا ءومىر سۇرەتىن قازاق، وزبەك، قىرعىز، تۇركىمەن جانە باسقا دا تۇركى حالىقتارىنىڭ ءداستۇرلى مادەنيەتىنىڭ ەۋرازيالىق مادەنيەتتە باسىمدىققا يە بولۋى - زاڭدى قۇبىلىس. تەك وكىنىشكە قاراي، وسىنداي باي رۋحاني مۇرا ءالى كۇنگە دەيىن عىلىمي- تاجىريبەلىك تۇرعىدا تولىق زەرتتەلمەي، الەمدىك دەڭگەيدە وزىنە لايىقتى ورنىن الا الماي كەلە جاتىر. ارينە، اسىل مۇرالارىمىزدى ساقتاپ، دامىتۋ ءۇشىن قىرۋار جۇمىستار اتقارىلۋدا. ءبىراق توقمەيىلسۋگە استە بولمايدى»، - دەدى ع مۇتانوۆ.
بۇل زاماندا ءاربىر ۇلت پەن ەتنوستىڭ الدىندا ءوزىن ساقتاپ قالۋ بويىنشا جاڭا مىندەتتەر تۇرعاندىعىن جەتكىزدى.
«جاياۋدىڭ شاڭى شىقپاس، جالعىزدىڭ ءۇنى شىقپاس» دەگەن ءسوز بار ەمەس پە. وسىنداي كۇردەلى زاماندا جەكە اداسىپ سۇرلەۋ ىزدەگەنشە، ءتۇبى ءبىر، ءتىلى ءبىر تۋىسقان تۇركى حالىقتارى عىلىم، ءبىلىم، رۋحانيات سالاسىندا ءبىر- بىرىنە كومەككە كەلىپ، بىرىگىپ قيمىلداعاندا عانا تىعىرىقتان شىعار ورتاق جول تابىلاتىنى انىق»، - دەدى رەكتور.
بۇگىنگى شاراعا تۇركيا، ازەىربايجان، وزبەكستان، تۇركىمەنستان جانە قىرعىزستاننىڭ قازاقستانداعى ەلشىلىكتەرى مەن كونسۋلدىقتارىنىڭ قىزمەتكەرلەرى، الماتى قالاسىنداعى قازاقستان حالقى اسسامبلەياسى جانىندا قۇرىلعان تۇركىتىلدەس ەتنومادەني بىرلەستىكتەردىڭ وكىلدەرى، سونىمەن قاتار قازۇۋ عالىمدارى، وقىتۋشىلارى مەن ستۋدەنتتەرى قاتىستى.
اۆتور: جاپپاربەرگەن ايبوتا
