ق ر پرەزيدەنتى سايلاۋىنا تۇسۋگە ءتىپتى، كورىپكەل دە، جۇمىسسىز دا نيەت بىلدىرەدى - م. جولداسبەكوۆ

2011-جىلى وتكەن كەزەكتەن تىس سايلاۋ بارىسىندا ورىن العان جايتتار جايىندا ب ا ق وكىلدەرىمەن بولىسكەن كوميسسيا ءتوراعاسى م. جولداسبەكوۆ: «كوپتەگەن ادامدار اينالدىرعان ەكى بەت جازبا جۇمىسىندا 16 قاتەدەن باستاپ، 32, 36, 46, 52 قاتەگە دەيىن جىبەردى. بۇل ءبىر، ەكىنشىدەن، كەلگەن كىسىلەردىڭ كوپشىلىگى جۇمىسسىز جۇرگەن ادامدار بولدى. بىرنەشە ەكستراسەنستەر كەلدى. ماسەلەن، ءبىر كىسى: «پويىزبەن الماتىدان پاۆلودارعا كەتىپ بارا جاتىر ەدىم، استاناعا كەلگەندە پرەزيدەنتتىك سايلاۋ ەسىمە ءتۇسىپ، سىزدەردىڭ الدارىڭىزعا كەلىپ وتىرمىن»، دەيدى. ال ءبىر ايەل تاڭەرتەڭ شاي ءىشىپ وتىرعاندا ەسىنە سايلاۋدىڭ جاريالانعانى ساپ ەتە ءتۇسىپ، سودان ءبىزدىڭ الدىمىزعا ءوزىن كانديدات رەتىندە ۇسىنۋ ءۇشىن كەلىپتى. مىنە، وسىنداي جايتتار ورىن العان بولاتىن»، - دەدى.

ونىڭ ايتۋىنشا، اعىمداعى جىلى پرەزيدەنتتىك كانديداتتار 1 ميلليون 60 مىڭ تەڭگە جارنا تولەۋ كەرەك بولسا، 2011-جىلى ونىڭ كولەمى 800 مىڭ تەڭگە قۇراعان. ال سول جىلى كانديدات رەتىندە تىركەلۋگە كەلگەن ءبىر ازامات اقشاسىنىڭ جوق ەكەندىگىن ايتىپ، ونىڭ ورنىنا سەكسەۋىل ۇسىنسا، ەندى ءبىرى كوميسسيا مۇشەلەرىنەن قارجىلاي قولداۋ سۇراعان.

«الدىمىزدان تالاي ازامات ءوتتى، ءبارى قازاقستان ازاماتتارى، ءبارىنىڭ دە قۇقىعى بىردەي. ءبىراق پرەزيدەنت بولاتىن ادام حالىقتىڭ تاعدىرىن ويلاۋى كەرەك قوي. پرەزيدەنت بولاتىن ادام ەڭ بولماعاندا ءبىر مەكەمەنى باسقارۋى كەرەك قوي. جۇمىسسىز جۇرگەن، جۇمىسقا ەشكىم الماعان ازامات ەرتەڭ ونىڭ بەتىن ارمان قىلسىن، قۇداي ساقتاسىن، پرەزيدەنت بولاتىن بولسا، مەملەكەتتىڭ تاعدىرى نە بولماق؟»، - دەدى ول.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى