ە. قارين: پرەزيدەنتتىك سايلاۋ - تاكتيكالىق قادام ەمەس، تەرەڭ ماعىنالى ستراتەگيالىق شەشىم

بۇل تۋرالى بۇگىن «قازاقستانداعى پرەزيدەنتتىك سايلاۋ - 2015: عالامدىق سىناقتاردىڭ الدىن الۋ» اتتى دوڭگەلەك ۇستەل بارىسىندا ق ر پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين ءمالىم ەتتى.

«پرەزيدەنتتىك سايلاۋدىڭ ءارقايسىسى ەل تاۋەلسىزدىگى دامۋىنىڭ جاڭا كەزەڭىنە سەرپىن بەرىپ وتىردى. 2015-جىلعى سايلاۋ ناۋقانى دا سول ماقساتتا وتكىزىلگەلى وتىر. بىرىنشىدەن، نەگىزگى ورتالىق كۇشتەردىڭ گەوساياسي تەكەتىرەستىڭ كەسىرىنەن الەمدىك ساياسات تۋربۋلەنتتىك اۋماققا ەندى. ۋكرايناداعى، اۋعانستانداعى، سيرياداعى قاقتىعىستار مەن الەمدىك ساۋدا-ەكونوميكالىق سوعىس، ءوزارا سانكسيالار، سونداي-اق كۇن وتكەن سايىن بۇل گەوساياسي احۋال ودان ءارى ۋشىعىپ بارادى.

ەكىنشىدەن، پوستكەڭەستىك ايماق جاڭا ەلەكتورالدى سيكلگە بەت بۇرىپ كەلەدى. اسىرەسە، ورتالىق ازيالىق اۋماقتا. جاقىندا تاجىكستاندا پارلامەنتتىك سايلاۋ ءوتتى. قىرعىز پارتيالارى دا سايلاۋ ناۋقانىنا بەلسەندى دايىندالىپ جاتىر. ءبىزدىڭ ستراتەگيالىق سەرىكتەستەرىمىز - وزبەكستاندا، بەلارۋستا، ءازىربايجاندا پرەزيدەنتتىك سايلاۋ وتەدى دەپ جوسپارلانۋدا»، - دەپ اتاپ ءوتتى ول.

ونىڭ ايتۋىنشا، ەكونوميكالىق، گەوساياسي وقيعالاردى بولجاۋ قيىن بولىپ بارادى، سول پروتسەستەرمەن بىرگە بارشا الەم، مەملەكەتتەر وزگەرۋدە.

«بىزگە قازىر وڭعا، سولعا تەڭسەلمەي، وسى تۋربۋلەنتتىك كەزەڭنەن امان-ەسەن ءوتىپ كەتۋىمىز وتە ماڭىزدى بولماق. الدىمىزداعى جىل قانداي بولارىن ەشكىم بىلمەيدى، الەمدىك قاۋىمداستىق احۋالدىڭ كەلەسى كەزەڭى قانداي بولارىن دا بولجاپ-بىلە الماي وتىر. سوندىقتان سايلاۋ وتكىزۋ جونىندەگى باستاما - جاي عانا تاكتيكالىق قادام ەمەس، بۇل بەلگىلى ءبىر جاعىمسىز سەناريلەرگە توتەپ بەرۋگە مۇمكىندىك بەرەتىن تەرەڭ ستراتەگيالىق شەشىم. قازاقستان ءوزىنىڭ دامۋ جولىنىڭ جاڭا كەزەڭىنە اياق باسۋدا. وسى تۇرعىدا، سايلاۋ - الەمدەگى اۋمالى-توكپەلى كەزەڭنەن ءساتتى وتۋگە باعىتتالعان قادام. سايلاۋ پرەزيدەنت باستاعان مەملەكەت دامۋىنىڭ جاڭا ستراتەگيالارى اينالاسىندا حالىقتى توپتاستىرۋعا، ورتاق مۇددەگە جۇمىلدىرۋعا قاجەت»، - دەيدى ە. قارين.

سونىمەن بىرگە، ينستيتۋت ديرەكتورى، ساياساتتانۋشى ە. قاريننىڭ بايانداۋىنشا، سايلاۋ ەلدەگى ساياسي پروتسەستەردىڭ جەدەل دامۋىنا، پارتيالىق ۇيىمداردىڭ بەلسەنە تۇسۋىنە دە ىقپال ەتەدى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى