ق ر پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءۇش كەزەڭمەن وتەدى

بۇل تۋرالى بۇگىن ق ر پرەزيدەنتتىگىنە كانديداتتاردى مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ ءمالىم ەتتى.

«بۇگىن ءبىز سىناققا تۇسەتىن سۇراقتاردىڭ بارلىعىن بەكىتتىك. ول ءۇش كەزەڭنەن تۇرادى. پرەزيدەنتتىككە كانديداتتىڭ مەملەكەتتىك ءتىلدى ەركىن مەڭگەرگەن دەڭگەيىن انىقتاۋ ءۇشىن بىرىنشىدەن، كانديدات وسى ليگۆيستيكالىق كوميسسيا ۇسىنعان تاقىرىپتاردىڭ ءبىرىن تاڭداپ، كولەمى 2 بەتتەن اسپايتىن جازباشا جۇمىس جازادى. ونى جازۋعا ءبىر ساعات ۋاقىت بەرىلەدى. ەگەر ءبىزدىڭ كانديدات بەرىلگەن ۋاقىتتىڭ از ەكەندىگىن ايتار بولسا، وندا كوميسسيانىڭ تاعى جارتى ساعات قوسۋعا قۇقى بار. ودان ارتىق ۋاقىت بەرىلمەيدى»، - دەدى م. جولداسبەكوۆ.

ونىڭ اتاپ وتۋىنشە، ەكىنشى كەزەڭگە لينگۆيستكالىق كوميسسيا بەكىتكەن قازاقتىڭ كلاسسيك قالامگەرلەرىنىڭ كىتاپتارى بار. پرەزيدەنتتىككە كانديدات سول كىتاپتاردىڭ ءبىرىن تاڭداپ، كولەمى ءۇش باسپا بەتتەن اسپايتىن ءماتىندى ىرعاعىنا كەلتىرىپ وقيدى.

«ودان وتكەننەن كەيىن لينگۆيستيكالىق كوميسسيا بەكىتكەن تاقىرىپقا بايلانىستى دايىندالىپ، 15 مينۋت سونىڭ توڭىرەگىندە ەركىن سويلەۋى ءتيىس جانە وعان دايىندالۋعا دا كوميسسيا 1 ساعات ۋاقىت بەرەدى. وسى ۇلكەن ءۇش سىناقتان كانديدات وتكەننەن كەيىن كوميسسيا وزدەرىنە بەكىتىلگەن بولمەدە باس قوسادى. كانديداتتاردىڭ تابىسى مەن كەمشىلىگىن تالقىلاپ، پرەزيدەنت بولۋعا لايىقتى ما، ءوزىنىڭ مەملەكەتتىك ءتىلىن مەڭگەرگەن بە، ءوز انا ءتىلىن باعالايتىن ادام با، دەگەن ماسەلەلەردى تالقىلاپ، قورىتىندى شىعارادى»، - دەدى كوميسسيا ءتوراعاسى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى