نازاربايەۆ ۋنيۆەرسيتەتىندە نوبەل سىيلىعىنىڭ لاۋرەاتى جۇمىس ىستەيدى
بۇگىن مەملەكەت باسشىسى نازاربايەۆ ۋنيۆەرسيتەتىنىڭ زەرتتەۋ ورتالىقتارى مەن NURIS پيلوتتىق تەحنوپاركىن ارالاپ كوردى. نىساندى ارالاۋ بارىسىندا پرەزيدەنت ەلەۋلى جەتىستىكتەرمەن جانە ۋنيۆەرسيتەتتە جۇزەگە اسىرىلىپ جاتقان عىلىمي- يننوۆاتسيالىق قىزمەتتىڭ ناتيجەلەرىمەن تانىستى.
نۇرسۇلتان نازاربايەۆ عىلىمي قىزمەتكەرلەردىڭ اتقارعان جۇمىسىنا جوعارى باعا بەردى. قازاقستان پرەزيدەنتى سونداي-اق NURIS جانە ءومىر تۋرالى عىلىمدار ورتالىعى عالىمدارىنىڭ عىلىمي زەرتتەۋلەرىنىڭ ناتيجەلەرى ەلىمىزدىڭ يگىلىگىنە، ونىڭ دامۋى مەن حالقىن ساۋىقتىرۋ ءۇشىن ءتيىمدى پايدالانىلۋى ءتيىس ەكەنىن اتاپ ءوتتى.
ۋنيۆەرسيتەت بازاسىندا ءۇش عىلىمي ورتالىق قۇرىلعان: ەنەرگەتيكالىق زەرتتەۋلەر ورتالىعى، ءپانارالىق ورتالىق جانە ءومىر تۋرالى عىلىمدار ورتالىعى، ولاردا مەكتەپ پروفەسسورلارى جانە 160 تان استام عىلىمي قىزمەتكەر جۇمىس ىستەيدى. ولاردىڭ كوپشىلىگى شەتەلدىك ۇزدىك ۋنيۆەرسيتەتتەردە ءبىلىم العان. اراسىندا حالىقارالىق دەڭگەيدەگى جەتەكشى عالىمدار مەن شەت ەلدەردەن ورالعان قازاقستاندىق زەرتتەۋشىلەر دە بار.
«عىلىمي ورتالىقتاردا ەنەرگەتيكا، ماشينا جاساۋ، شيكىزاتتى تەرەڭ وڭدەۋ، اقپاراتتىق- كوممۋنيكاتسيالىق تەحنولوگيالار، ءومىر تۋرالى عىلىم سياقتى ەل ءۇشىن باسىمدىعى بار باعىتتار بويىنشا زەرتتەۋلەر جۇرگىزىلەدى. ماسەلەن، بولاشاقتىڭ ەنەرگياسىن دامىتۋ جوبالارى ءۇشىن الەمگە ايگىلى عالىم- استروفيزيك، كوسمولوگ، نوبەل سىيلىعىنىڭ لاۋرەاتى دجوردج سمۋت شاقىرىلعان»، - دەلىنگەن باسپا ءسوز پاراعىندا.
ۋنيۆەرسيتەتتىڭ عىلىمي ورتالىقتارى ءوز باعدارلامالارىن ا ق ش- تىڭ، ەۋروپانىڭ، جاپونيانىڭ تانىمال عىلىمي- زەرتتەۋ ورتالىقتارىمەن ىنتىماقتاستىقتا جۇزەگە اسىرادى. ۋنيۆەرسيتەتتە بارلىعى 170 عىلىمي جانە تەحنيكالىق جوبا ىسكە اسىرىلىپ جاتىر، ولارعا ستۋدەنتتەر دە بەلسەنە قاتىسادى.
