الماتى وبلىسىنىڭ اكىمى ۇزدىك سپورتشىلار مەن سپورت مەكەمەلەرىن ماراپاتتادى - فوتو
جيىن بارىسىندا وبلىس اكىمى سپورتتى دامىتۋ ماسەلەلەرىنە كەڭىنەن توقتالىپ، قول جەتكەن جەتىستىكتەردى سارالادى.
- قازاقستان رەسپۋبليكاسىنىڭ پرەزيدەنتى ن. ءا. نازاربايەۆ «قازاقستان-2050» ستراتەگياسىندا «دەنە شىنىقتىرۋ مەن سپورت مەملەكەتتىڭ ايىرىقشا نازارىندا بولۋى ءتيىس. ناق سول سالاماتتى ءومىر سالتى ۇلت دەنساۋلىعىنىڭ كىلتى بولىپ سانالادى» دەپ اتاپ وتكەن بولاتىن.
وسىعان وراي، ەلباسىنىڭ تاپسىرماسى اياسىندا وبلىس سپورتشىلارىنىڭ حالىقارالىق جانە رەسپۋبليكالىق جارىستاردا توپ جارۋى ءۇشىن بۇگىنگى كۇنى بارلىق جاعدايلار جاسالۋدا.
اتاپ ايتساق، 2014 - جىلى وبلىس سپورتشىلارى بارلىعى 1167 مەدالعا قول جەتكىزىپ، ەڭبەك سىڭىرگەن 2 سپورت شەبەرى، حالىقارالىق دارەجەدەگى 24 سپورت شەبەرى، ق ر 125 سپورت شەبەرى مەن 495 سپورت شەبەرلىگىنە ۇمىتكەرلەر انىقتالدى، - دەپ اتاپ ءوتتى اماندىق باتالوۆ.
وبلىس اكىمى ءوز بايانداماسىنان كەيىن ءوڭىردىڭ ۇزدىك سپورتشىلارى مەن جاتتىقتىرۋشىلارىن ماراپاتتاۋ ءراسىمىن وتكىزدى.
ۇزدىك 6 سپورتشى مەن 8 جاتتىقتىرۋشىعا وبلىس اكىمىنىڭ ديپلومى تابىستالىپ، ولارعا 150 مىڭ تەڭگە كولەمىندە اقشالاي سىيلىق بەرىلدى. ولاردىڭ ىشىندە مارگاريتا ەليسەيەۆا، توقتار كاركاتەروۆ، نۇرجان جۇماجان، ەربول دۇكەنبايەۆ، الەكساندر گەتالو مەن دميتري سوليانين بار.
سونداي-اق وبلىس اكىمىنىڭ اتىنان ديپلومدار مەن 500 مىڭ تەڭگە كولەمىندەگى اقشالاي سىيلىقتاردى 2014 - جىلى ۇزدىك دەپ تانىلعان سپورتتىق مەكەمەلەر دە يەلەندى. ولاردىڭ قاتارىندا تالدىقورعان قالاسىنداعى №1 جاسوسپىرىمدەرگە ارنالعان وليمپيادالىق رەزەرۆ مەكتەبى، «جەتىسۋ» ۆولەيبول كلۋبى جانە قاراساي اۋداندىق سپورت ءبولىمى بولدى.
سپورتتىق جاڭالىقتاردى بۇقارالىق اقپارات قۇرالدارىندا تۇراقتى تۇردە ناسيحاتتاپ جۇرەتىن جۋرناليستەر دە وبلىس اكىمىنىڭ ديپلومدارى مەن اقشالاي ماراپاتتاۋىنان شەت قالمادى.
كەزدەسۋدە «جەتىسۋ» ايەلدەر ۆولەيبول كومانداسىنىڭ جەتەكشىسى ۆ. شاپران جانە سپورتشى ت. كاركاتەروۆ الداعى ۋاقىتتا بۇدان دا جوعارى جەتىستىكتەرگە قول جەتكىزۋ ءۇشىن ايانباي تەر توگۋگە ءازىر ەكەندىكتەرىن ءبىلدىردى.
