پوروشەنكو مارقۇم بوريس نەمسوۆتى بوستاندىق وردەنىمەن ماراپاتتادى
پوروشەنكو وپپوزيتسيونەردىڭ ۋكراينا مەن رەسەيدىڭ بوستاندىعى ءۇشىن كۇرەسكەنىن ايتتى. «ءبىزدىڭ جانە ءسىزدىڭ بوستاندىعىڭىز ءۇشىن» - بۇل تاريحي ۇران بوريس نەمسوۆتىڭ ءومىر بويعى ديەۆيزىنە اينالدى. سوندىقتان مەن ونى بوستاندىق وردەنىمەن ماراپاتتايمىن دەپ شەشتىم. جارقىن بەينە. ءبىز، ۋكرايندەر ءۇشىن بوريس رەسەيدىڭ پاتريوتى جانە ۋكراينانىڭ دوسى بولىپ قالا بەرەدى. ەگەر قالاساڭ، بۇل ەكەۋىن قاتار الىپ جۇرۋگە بولاتىنىن ول ءوزىنىڭ ومىرىمەن دالەلدەدى»، - دەدى پوروشەنكو.
ۋكراينا پرەزيدەنتىنىڭ سايتىندا رەسەيدىڭ ساياساتكەرى ءارى مەملەكەت قايراتكەرى بوريس نەمسوۆتىڭ ۋكراينانىڭ ەگەمەندىگى مەن اۋماقتىڭ بۇتىندىگى ءۇشىن قولداۋ كورسەتكەنى حابارلاندى. «2004 تە سارعىلت ءتۇستى ريەۆوليۋتسيانى قولدادى. ۋكراينا مەن رەسەيدە دەموكراتيالىق جەتىستىكتەردى تاراتۋعا نيەت ءبىلدىردى جانە كرەملگە يدەولوگيالىق قىسىم كورسەتۋگە شاقىردى.
2013-جىلى ەۋرو مايدانعا قولداۋ كورسەتىپ، سول ءۇشىن وعان يانۋكوۆيچتىڭ تارتىبىمەن ۋكراينادان شىعۋعا تىيىم سالىندى. 2014-جىلى رەسەيدىڭ قىرىمعا باسقىندىعىن ايىپتادى. رەسەي تۇرمەسىنەن ۋكراينالىق ۇشقىش نادەجدا ساۆچەنكونى بوساتۋدى تالاپ ەتتى. ماسكەۋدە 2015-جىلى 27- اقپاندا ءولتىرىلدى»، - دەلىنگەن حابارلامادا.
بۇدان بولەك، پوروشەنكو ۋكراينانىڭ حالىق دەپۋتاتى، ەۋروپا كەڭەسىنىڭ پارلامەنتتىك اسسامبلەيا دەلەگاتسياسىنىڭ مۇشەسى نادەجدا ساۆچەنكوعا «ۋكراينا باتىرى» اتاعىن بەردى. ەسكە سالا كەتەيىك، ول رەسەيلىك جۋرناليستەردى ءولتىردى دەپ ايىپتالىپ، رەسەيدە سوتتالعان بولاتىن. «نادەجدا ۋكراينالىق قاجىماس رۋح پەن باتىلدىقتىڭ، ۋكراينانى قالاي قورعاپ، ءسۇيۋدىڭ نىشانى بولىپ ەسەپتەلەدى. ءبىزدىڭ جەڭىسىمىزدىڭ نىشانى. ءبىز ءسىزدى تۇتقىننان شىعارۋ ءۇشىن ءبارىن جاسايمىز. سىزگە «ۋكراينا باتىرىنىڭ التىن جۇلدىزشاسىن» تاپسىراتىن مۇمكىندىگىم بولادى دەپ ۇمىتتەنەمىن»، - دەدى پوروشەنكو.
ەسكە سالا كەتەيىك، بوريس نەمسوۆ اقپاننىڭ 27-سىنەن 28-ىنە قاراعان ءتۇنى ءولتىرىلدى. سوڭعى مالىمەتتەر بويىنشا، وپەراتيۆتىك قىزمەتكەرلەر ونى ولتىرگەندەردىڭ اۆتوكولىگىن تاپتى. سونىمەن قاتار، كولىكتەن ولاردىڭ شاشى تابىلدى. ماتەريال ساراپتاماعا جىبەرىلدى. كۇدىكتىلەرگە ىزدەۋ جاريالاندى. ساياساتكەردى ءبىر ايعا جۋىق اڭدىپ جۇرگەن قىلمىسكەرلەر رەسەيدىڭ كاۆكاز وڭىرىنەن شىققاندار بولۋى مۇمكىن. بوريس نەمتسوۆ 3- ناۋرىزدا ماسكەۋدەگى تروەكۋروۆسكوە زيراتىنا جەرلەندى. قىلمىستىڭ تەرگەۋ جۇمىستارىن ىشكى ىستەر مينيسترلىگى، فەدەرالدىق قاۋىپسىزدىك قىزمەتى مەن رەسەيدىڭ تەرگەۋ كوميتەتى جەكە باقىلاۋعا الدى.
