قازاقستاندا تاعى ءبىر گەنەرال ۇستالدى
«2- ناۋرىزدا ساعات 20:00 شاماسىندا الماتىدا ۇيىمداسقان قىلمىستىق توپ باسقارعان دەگەن كۇدىكپەن گەنەرال-مايور ءامىرحان امانبايەۆ ۇستالدى»، - دەدى سۇحباتتاسۋشى اگەنتتىككە.
بۇل رەتتە ول 55 جاستاعى ءامىرحان امانبايەۆتى ۇستاعان كەزدە ونىڭ دەنساۋلىعى كۇرت ناشارلاپ، جەدەل جاردەم شاقىرىلعانىن ايتتى.
دەرەككوز اقپارىنشا، امانبايەۆ قارجى پوليتسياسىنىڭ مەملەكەتتىك قىزمەت جانە سىبايلاس جەمقورلىققا قارسى ءىس قيمىل اگەنتتىگى بولىپ قايتا قۇرىلعاسىن ونىڭ باس پروكۋراتۋرا دەپارتامەنتىنىڭ باستىعى قىزمەتىنە تاعايىندالعانىن ايتتى.
«اعىمداعى جىلدىڭ اقپان ايىندا جالعان كاسىپكەرلىكپەن اينالىسقان، ۇيىمداسقان قىلمىستىق توپ قۇرعان دەگەن كۇدىكپەن ونىڭ بۇرىنعى قول استىنداعىلارىن، الماتى بويىنشا ەكونوميكالىق جانە جەمقورلىق قىلمىسپەن كۇرەس دەپارتامەنتىنىڭ قىزمەتكەرلەرىن ۇستاعاننان كەيىن كۇدىكتى مالىمەتتەر شىعا باستادى. ال ءامىرحان تاپاش ۇلىنىڭ جاقىن ادامدارى بۇرىنعى باستىقتارىنا قارسى اقپارلار بەردى. وسىلايشا، امانبايەۆ باس پروكۋراتۋراداعى جوعارى لاۋازىمىنان ءوز ەركىمەن كەتۋىنە تۋرا كەلدى»، - دەپ تولىقتىردى سۇحباتتاسۋشى.
ءامىرحان تاپاش ۇلىنىڭ جاقىن ادامدارى بۇرىنعى باستىقتارىنا قارسى اقپارلار بەردى. وسىلايشا، امانبايەۆ باس پروكۋراتۋراداعى جوعارى لاۋازىمىنان ءوز ەركىمەن كەتۋىنە تۋرا كەلدى.
ءار جىلدارى ءامىرحان امانبايەۆ قوستاناي جانە قاراعاندى وبلىستارىنىڭ پروكۋرورى، ادىلەت مينيسترلىگىنىڭ تىركەۋ قىزمەتى جانە قۇقىقتىق كومەك كورسەتۋ كوميتەتىنىڭ ءتوراعاسى، ادىلەت ءمينيسترىنىڭ ورىنباسارى بولعان.
2012-جىلدىڭ اقپانىنان باستاپ الماتى قالاسى بويىنشا ەكونوميكالىق جانە جەمقورلىق قىلمىسپەن كۇرەس دەپارتامەنتىنىڭ باستىعى. 2014-جىلدىڭ كۇزىندە ەكونوميكالىق جانە جەمقورلىق قىلمىسپەن كۇرەس اگەنتتىگىنىڭ قايتا قۇرىلۋىنا بايلانىستى باس پروكۋراتۋراعا جۇمىسقا اۋىسقان.
ەسكە سالساق، 2015-جىلدىڭ اقپانىندا الماتىدا ۇيىمداسقان قىلمىستىق توپ قۇرىقتالدى. ول ۇزاق ۋاقىت بويى مەملەكەتتىك ورگاندارداعى لاۋازىمدى تۇلعالاردىڭ، سونىڭ ىشىندە قارجى پوليتسياسىنىڭ بۇرىنعى قىزمەتكەرلەرىنىڭ بۇركەمەلەۋىمەن جالعان كاسىپورىندار قۇرۋ ارقىلى اقشالاي قاراجاتتى قولما قول اقشاعا اينالدىرۋمەن اينالىسىپ كەلگەن.
ۇيىمداسقان قىلمىستىق توپ قاتىسۋشىلارى 20 جالعان كاسىپورىن قۇرعان، 2012-جىلدىڭ قازانىنان باستاپ 2014-جىلدىڭ جەلتوقسانى ارالىعىنداعى ولاردىڭ اينالىمى 60 ميللياردتان استام بولعان.
ال ولاردىڭ قىزمەتىنەن بيۋجەتكە تولەنبەگەن سالىق تۇرىندەگى شىعىن 4 ميللياردتان اسقان. سوتقا دەيىنگى تەكسەرۋ اياسىندا ۇيىمداسقان قىلمىستىق توپتىڭ 8 قاتىسۋشىسى الماتى ءى ءى د ۋاقىتشا ۇستاۋ يزولياتورىنا قامالدى. ولار: س. يلين، ۆ. فەدوتوۆ، ب. باۋدينوۆ، ت. كاريموۆ، ا. زۋباريەۆ، د. ابديەۆ، ر. ەسەنجانوۆ جانە ن. شاۋكەروۆ.
«كازتاگ»
